Школаын дышетскись. Верос

Удмурт Дунне
By Удмурт Дунне Январь 29, 2013 10:44

Школаын дышетскись. Верос

Юни Тоссаваинен

Юни Тоссаваинен

Юни Тоссаваинен (Jouni Tossavainen) — фин кылбурчи но прозаик. «Sivullisia» яке «Аутсайдеръёс» — гожъяськисьлэн тямысэтӥ книгаез. Татын гожтэмын 157 муртлэн ужан интыязы асьсэды воземзы сярысь. Кызьы калык пӧлын улыса, ужаса но адями огназ кыле. Ваньмыз со гожъямъёс Хельсинки карын улӥсьёслэсь бичамын. Нуналмысь улонзы сярысь мадись муртъёс верало сое, мар йыразы шукке. Книгае верамъёссы сыӵеен ик пыризы. Дэмласько тодматскыны одӥгеныз — нылпилэн малпанъёсыныз.

Школаын дышетскисьёс ӵемысь малпасько урок висъёс (переменаос) сярысь гинэ. Бен-бен, урокъёс дыръя но. Тужгес ик математикаын. Урок висъёс сяна, соослы кельше на физкультура. Пусъёно созэ но: математикаен дышетӥсь вазьгес тырше потыны пенсие.

Но малы мыным та сярысь гожтонтэм.

Нылъёс урок вискын котьку сямен, огазе люкаськыса, тодмооссы сярысь супыльто. Та вакытэ пиос футболэн шудо. Укыр кезьыт кариське ке, урок вис уг удалты.

Малы меда школаысен укыр вазь малпаськыны косо вуоно уж сярысь. Пӧрмоз-а мынэсьтым кырӟась, сиён пӧрась яке кизили-гожъяськись? Та ӧнеръёс пӧлысь берпуметӥез капчиен тодэ лыктэ, малы ке шуоно школаямы но вуылӥз гожъяськись. Нош кытысь тодод пиарщиклэн ужез сярысь? Та сярысь Google-ысь но номыр уд шедьты.

Школа бере пиналъёс пӧртэм кружокъёсы ветлыны ярато. Талы ӧвӧл паймоно. Малы дыртонэз доре, отын нокинэз ӧвӧл ке: анай-атайёс ужало яке тренажёр залын мугорзэс кыдато.

Школаын дышетскисьёс сюлмасько дорысь ужзэс лэсьтон сярысь. Нош куд-ог дыръя со уг пӧрмы. Сыӵе дыръёсы юрттэт курыны луоз агаедлэсь яке апаедлэсь, вань ке соос. Яке анайлэсь, яке тренажёр залысь бертэм атайлэсь. Нош атай анаез тренажёр залэ келяса кошкемын ке? Соку эшъёс ӝоггес юрттозы компьютер пыр.

Ӟеч дышетӥсь — со умой мылкыдо дышетӥсь, кудӥз анай кыл кадь сюлме биниське. Уродэз — укыр вожзэ поттӥсь, серекъяны быгатӥсьтэм но ӧжыт бере кылись.

Ӵукна султыны укыр секыт, озьы ке но — кулэ. Сыӵе дыръя одно ик ӟеч сиськоно, школаын нуназе сиськытозь чидан понна. Мон — дорамы ӟеч пинал, соин ик ӵукналы быдэ кык пуньы ӝук сиисько.

Школаын сиён ческыт, но дышетскисьёслэн та сярысь мукет малпанъёссы. Тужгес но нылъёслэн. Куаемзылэсь кышкаса, соос кӧтсы тырымон ноку уг сисько. Мукет учыр — пиос. Соос васямъёс кадь сисько, тужгес но — фрикаделькаос сётъяку.

Школа бере дышетскисьёс ас ужъёссыя кошко яке дырзэс эшъёсынызы ӵош ортчыто. Но доре бертоно юнматэм дыре. Соин ик огъёсыз чатэ пото куать часысен ик, нош мукетъёсыз песяйёссы соргетыны кутскем бере гинэ.

Шутэтскон нуналъёсы пиналъёслэн басьяськемъёссы пӧрмо анай-атайёслэн коньдон быдтэмзылы.

Фин кылысь берыктӥз Лукерья Шихова

Удмурт Дунне
By Удмурт Дунне Январь 29, 2013 10:44