Узырмон

Удмурт Дунне
By Удмурт Дунне Январь 18, 2013 17:12

Узырмон

22-18-1Верос

— Дышетӥсьлэн сумкаяз пырад но узырмид-а?
Та вакчи юан Олиез воксё онгратӥз. Тодаз соку ик лыктӥз толло вераськон. Дышетӥсьёслы уждун люкылӥллям. Классэнызы кивалтӥсь уксёзэ сумкаяз кельтэм, ачиз кузь перемена дыръя кытчы ке потэм. Со вискын коньдонзэ качась сюрем.

Ма, неужто дышетӥсе но мон вылэ сьӧлыка? Неужто кин ке озьы малпаны быгатэ?  Та юан Олилэсь ӟигарзэ воксё быдтӥз. Син азяз ик пеймыт луиз кадь. Пельыз жонгетыны ӧдъяз. Ымдуръёссэ выретыны кужым шедьтытэк, мырдэм кылымон оло аслыз, оло вылӥегес вазиськыса, сипыртӥз: осто, Инмаре, осто, Инмаре…

Зэм, Олилэн телефонэз гинэ но ӧвӧл. Мар компьютер сярысь веранэз ни! Ма, берлоез солы кулэ но ӧвӧл на кадь. Дас аресъем мурт мар сокем-сокем кароз ай соин? Урокъёссэ лэсьтыны бер ӝыт пуксе. Школа бере уго сиён пӧрано, пудо сюдоно, скал кысконо, йӧлзэ интыяно. Азьвыл вань ужзэ анаеныз ӵош лэсьтылӥзы. Но али мумиз эмъясьёс киын. Олилы мазэ-созэ ӧз валэктэ. Школаысь бертыкуз, корка азязы сылэ вал ӝог юрттэт сётӥсьёслэн машиназы. Ӵужапаез нылашез бордаз ӝиптӥз но буйгатӥз: анаед йӧнаса бертоз, юртъер котырад мон юрттӥсько. Нош ачиз, артысь урамын улыса но, кык пол сяна ӧз кожалля на дораз. Анаез кыкетӥ арнязэ больницаын ни.

Оли, анаеныз маке умойтэм шуыса, ар талэсь азьвыл ик шӧдӥз ни. Атаез кытчы ке чиптэм-чаптэм ышем бере мумиз шулӟектӥз. Нылызлэсь ватыны выриз ик зар-зар бӧрдэмъёссэ. Изе ни кожаса, шобрет улын быдэс уйзэ куалекъялляз. Со куалекъянэз быдэс мугораз пыӵам, кожалод — отӥяз пуньызэ но кияз кутыны рос-прос ӧз быгатылы ни. Ӧйтӧд, кызьы фермаысь скалъёсты кыскиз, кызьы секыт ведраосыз ӝутъяз. Тазэ Оли ӧз тодылы. Анаезлэн лызэктэм ымдуръёсыз толэн-гужемен ӧз шуналлялэ. Ма, эстэм гур дорын но шунскыса утчалляз со. Тыбырыныз пыкъяськоз но, оло вӧсьсэ кылзыса, оло мур малпаськонэ усьыса, вырњылытэк кема-кема сылоз. Аслаз губырскем тыбырзэ шонертэмез но уг луы — олокытӥзэ гинэ шунтэ. Сыӵе дыръя Оли дораз матэктыны ик кышкалляз, шораз вазьыны но ӧз дӥсьтылы. Ымзэ усьтӥз, куаразэ поттӥз ке, анайзэ кыӵе ке бадӟым, аслыз гинэ тодмо ужезлэсь куспетӥ кароз кадь йӧтылӥз.

Анаезлэн шуныт гур бордысь ишкалскемез шоры учкыса, Олилэн сюлэмыз вирын пыласькылӥз. Вырӟылытэк сылэмысьтыз, лэся, мумизлэн паллян пыдыз котькуд учыре зубектылӥз. Пыд вылаз лёгиськыны но, сое воштыны но быгатытэк, кӧня ке пол музэ пограське вал. Ӵапак сыӵе дыръя ни Оли анаез доры бызе, кунултэ, пыкъетлы пӧрме. Мумиз нылызлэсь быдэс йырлы ӝужыт ке но, сыӵе дыръя со лапкалляз кадь. Оло, соин но Олилэн анайзэ, пичи нуныез музэн, бордаз ӝиптыса, алвылаз лэйкатэмез потыны кутске. Но дыдылэн киосыз пурысьтам йырсизэ маялляны гинэ сузё.
Сыӵе югдурын кыксы но, асьсэлэсь лябзэс шӧдыса, синвуоссэс ӵушыло но пӧртэм сэрегъёсы пегӟо. Анаез кайгузэ возьматыны, дыдыезлэсь мылкыдзэ сӧрыны кышка. Оли малпа: синвуме адӟыса, анаелы эшшо но уродгес луоз.

Анаезлэн сотэк но капчи дыръёсыз шер луо. Берлозэ серекъямзэ Оли олоку кылӥз. Анаез ужысь бертэ, пудозэ утялтэ но выдыны дыртэ. Нылыз пӧзьтэм шыдзэ  тэркые ӝутэ но анаез доры бызе ни — лымыз ик выж вылэ пальккаське. Сӥль юдэссэ бен туж шер шедьтод отысь. Но мумиз сютэм медаз выды. Картошсэ ке но кушалоз, пӧсь лымыныз ке но шуналоз. Но анаез чалмытак но вӧсь каремезлэсь кышкаса кадь нылзэ палэнтэ. Сыӵе дыръя Олилэн аслаз но одӥг ымтыр но шыдзэ ӟуземез уг луы.

Школаын сиськыкуз но, анайзэ малпаса, Оли куддыръя гуньдэ. Аслэсьтыз няньзэ кушатэк кисыяз лушкем понэ — куддыръя одӥг колды но няньзы доразы уг луы ук.
— Осто, Инмаре, одӥг шорем нянез школа столовойысь кисыям понӥсько ик, — сипыртэ онграм Оли. — Но со мыным сётэмез ук. Яке со но лушкаськем ни? Лушкаськем ке, простить кар монэ. Но дышетӥсьлэсь уксёзэ мон ӧй лушка! Начар улэмысьтымы, мон вылэ малпало шат? Зэм, со нуналэ лавкае пырай, 3 улмо басьтӥ, 200 грамм кампет. Ӵужапай уксё сётӥз. Анаед ӝоген бертоз шуэмысьтыз озьы октӥськи. Муми бертӥз ке, сое куноято. Кампет йырвизьлы ужаны кужым сётэ, мылкыдэз љутэ, шуо ук. Ӵош дышетскись эшъёсы ноку ӧз адӟылэ на вал ческыт сиён басьямме.

Соин ик паймизы: узырмид-а, мар-а, пе. Ма, неужто, дышетӥсьлэсь уждунзэ ворай малпазы?!
Олилэн шальтыртӥсьсэ кияз рос-прос кутылэмез но ӧвӧл. Толэзь талэсь азьвыл  классэнызы Ижысь цирке дасяськизы. Оли но бурдъяськиз: ноку но улэпкын адӟеме ӧвӧл слонэз!

Анаезлы шумпотыса вераз: отын, пе, кыйёс но луозы. Но мумиз, дыльдызэ ньылыса, гуньдылыса-гуньдылыса вазиз: маин мынод, нылы, уксёмы ӧвӧл ук — ваньмыз эмъюмлы кошке — висён бордысьтым нокызьы уг лэзиськы ни. Мумиз оскытыны выриз, берло ӵошенназы Иже мынозы шуыса. Но нылаш берпуметӥ кылъёссэ воксё ӧз кылы ни. Кӧтыз но солэн сокем зол ӝож ӧз луы —  анаез азьын ассэ янгышен шӧдон мылкыдыз золгес бугырскиз. Ассэ тышкаськиз: анаед висе, нош тон кытчы ке ӝуткаськид!

Эшъёсыз бератаз ушъ-яськылӥзы клоунъёсты адӟеменызы, ческыт вата сиеменызы. Куд-огез пышкылыны но выриз: тынад анаед цирке гинэ но уксё ӧз шедьты. Олилэн сыӵеос шоры лек кылъёсын ожалскемез потэ вал. Но пиньзэ гинэ гизьыр-р-р куртчиз. Соослэн анай-атайзы тазаесь — уз валалэ, малпаз, эшшо но золгес серем карозы. Анайзэ сотэк но куд-огез шӧртчиос мыскылляны выро: собрание но, пе, гужам дэремен лыктэ, нылзэ ӟеч дышетскемез понна ушъяло, нош со дэремысьтыз пужыосыз шоры учке.

Тае кылыса, Оли уката золгес куртче пиньёссэ: «Будо, визь люкало но эмъясь луо. Асьтэос ик мон доры йӧнатӥськыны вуоды ай. Уг каргаськиськы. Но мон тӥледыз ваньдэсты эмъяны выро. Асьтэлы ик мыскыл кылъёсты понна возьыт луоз ай».

Озьы буйгатыны выре вал со ассэ классазы лушкаськон сярысь ивор чузъяськемлэсь азьвыл. Нош табере?
— Эмъясе но мыныны дӥсьтод на меда? — асэныз вераське Оли. — Ваньзы шорад чиньыен уз возьматэ-а, вор шуыса?! Мар кароно? Осто, Инмаре, кызьы улод тазьы? Кызьы калыклэн син шораз учкод меда? Нош анаелы кылӥськиз ке? Висись мурт таӵе иворлэсь, йӧнам интые, уката уз шулӟекты-а?

Анаез сярысь малпан Олилы ӟигар сётӥз. Пукон интыысьтыз ӝутӥськиз но дышетӥсьсэ утчаны кошкиз. Быдэс школаез котыртонъяз борддорысь вань туспуктэмъёс, пумитаз сюрем адямиос — ваньзы — шораз лек пыкылыса кадь учко. Ваньзы верало кадь: лушкаськись!
Дышетӥсьсэ ӧз пумита. Соин ваче син вуиз ӵукна гинэ. Гордэктэм синъёссэ мырдэм шораз ӝутыса,

Оли сипыртӥз:
— Александра Ивановна, мон уксёдэс ӧй басьты…
Соиз оло кылӥз нылашез, оло ӧз — номыр ӧз куареты. Оло оскиз, оло ӧз — журналзэ усьтӥз но бугыръяськыны кутскиз. Котькуд бамзэ берыктэмез Олиез сюлоен кадь шуккиз. «Тон, тон, тон!» — шуиз кадь ӵаштыртэм куара. Оли сылыны ӧз чида ни. «Мон ӧй», — шуиз но катьтэммыса ик кошкиз.

Урокысен ини дышетӥсез ваньзылы кылымон вазиськиз:
— Муртлэн сумкаяз ноку но эн пыралэ. Со — муртлэн.
«Кызьы та кылъёсты валано? Ас вылам золтоно?» — аслэсьтыз ачиз нош юаз Оли. Со куспын ик, классын кин ке шиетӥз:
— Кылӥд-а, Ольги?
Дышетӥсь уретӥз:
— Тырмоз! Ойдолэ урокмес кутском.

Соку но Оли ӧз вала мар малпаны. Дышетӥсез доры нимысьтыз матэктылыны со ӧз дӥсьты ни. Ма, нуналъёс но огыр-бугыр луизы — анайзэ больницаысь лэзизы. Мумизлэн тусаз шунды ик пырем кадь. Сиськыны кутскем. Эстэм гурен уг ӟыгыръяськы ни. Ӝӧк вылазы нянь но вань ни. Холодильниказы сӥль но кынме. Талэсь бадӟым узырлык вань шат?

Ӝыны толэзь ортчем берегес кылӥськиз: мукет дышетӥсьлэн но сумкаяз пыраллям. Отын бугыръяськыкуз ик, кырмиллям Олиен ӵош дышетскись узыр семьяысь нылашез. Олиез ас вакытаз со ик онгратӥз вал: дышетӥсьлэн сумкаяз пырад но узырмид-а?

Елена Сараматова

 

Удмурт Дунне
By Удмурт Дунне Январь 18, 2013 17:12