Нылпи корка. Кыӵе амалэн быдтоно нылпи садъёсы черодэз?

Удмурт Дунне
By Удмурт Дунне Январь 25, 2013 10:08

Нылпи корка. Кыӵе амалэн быдтоно нылпи садъёсы черодэз?

М. Трониналэн кичӧлтэмезъя усьтэм нылпи коркаын пиналъёс быгатонлыксэс волято

М. Трониналэн кичӧлтэмезъя усьтэм нылпи коркаын пиналъёс быгатонлыксэс волято

Россилэн Президентэз Владимир Путин, кылем арлэн пумаз Федерал Собранилы вазиськыкуз, нимысьтыз саклык висъяз нылпи садъёслы. Угось быдэс кунамы соос уг тырмо.

Вордӥд ке, чида
Приволжск федерал округысь улосъёс пӧлын Удмурт шаер нылпиослэн вордскемзыя нырысетӥ интыын. Озьыен, нылпи садъёсъя ужпумез дыраз ӧд сермета ке, азьланяз эшшо но бадӟымесь шуг-секытъёс кылдыны быгатозы. Владимир Путин кылем арын декабре Федеральной Собранилы вазиськоназ  пусйиз: нылпи садъёсын интыосты йылтонэн ӵош луонлыкъёс кылдытоно нимаз ужась детсадъёсты усьтонлы но. Та ужпумлэсь шаерамы сэрттӥськемзэ чакласа возе Александр Волков.

Нимаз ужась нылпи садъёс Ижын вань ни: «Приватиссима», «Карапузленд». Таӵе детсадъёсын пиналэз возён толэзяз ог 6 сюрс манет тыр усе.

Но анай-атайёслэн таӵе садъёсы пиналзэс сётон мылкыдзы тӧлӟе отчы нырысьсэ вуылэмзы бӧрсьы ик. Соос угось интыяськемын трос висъето огшоры квартираосы, пиналъёсты чакласьёслэн нокыӵе дышетскемзы, кыӵе ке методикаос сярысь кылэмзы но ӧвӧл. Кышкытлыклэсь утиськонъя куронъёс но уг быдэсъясько. Марысь мар ке — кыл кутӥсез уд шедьты. Таӵе малпанъёссэс унояз Интернет-форумъёсын шараяло Ижысь анайёс. Ог-огзылы ӵекто: пиналыд сярысь чиньы йыл быдӟа ке но сюлмаськиськод ке — чида, возьма огшоры нылпи садэ чероддэ.

Четлыкын я дворецын?
Шаерысьтымы Дышетонъя но наукая министерствоысь Пиналъёсты школалэсь азьвыл визьноданъя управлениысь специалистъёс ивортэмъя, Ижын кӧня нимаз ужась детсадъёс, шонергес вераса, дорын-квартираын радъям садъёс — валэктыны секыт. Соослэсь ужзэс чаклась-эскерись ӧвӧл. Удыссэс соос ӵем дыръя азинто кулэ луись лицензиостэк. Нылпиосты возён условиос, соосты визьнодан программа, воспитательёслэн квалификацизы — ваньмыз та радъяське нылпи сад возисьлэн учкемезъя.

Таӵе садъёс тодэ вайыто гуртъёсын азьвыл аръёсы паськыт кутӥськись амалэз — бускельёслэсь, ӵыжы-выжыослэсь пӧртэм аресъем тэшкылиоссэс огазе люкан но семьяысь мӧйы муртлы оскон. Песяйёс йырзэс ӧз тӥялэ кыӵе ке дышетон программа пумысен. Одӥг гинэ пӧртэмлыкез: песянайёсмы нылпи утён вылын коньдон ӧз поттэ, тае Инмарен сётэм ужен лыдъязы. Нош нимаз сэрегъёсын интыяськем детсадъёслэн валтӥсь ужпумзы — пиналзэс кытчы интыяны ӟудэм анай-атайёслэсь уксёзэс кыскон. Нокин, валамон, уг сюлмаськы ни пиналэз кышкытлыклэсь утён сярысь. Та ласянь угось тылпу кысӥсьёслэн но, Роспотребнадзорлэн но куронъёссы ой-ой кыӵе чурытэсь.

— Вуылӥзы ми доры тылпулэсь утиськонъя службаысь специалистъёс, — вера Ижысь одӥгаз квартираын интыяськем нылпи садын утиськись Екатерина (нимтулзэ шараяны пумит луиз). — Условиосмес чакламзы бере шуизы: шекъёстэс палэнтоды — разрешение сётомы. Сигнализация пуктыны косӥзы, укноосысь кечат-вамат кортэз куштыны косӥзы. Ма, тазьы ик уломы, выльысь вуытозязы. Ми, воспитательёс — ужтэк пукисьёс. Ярам коть, асьмелэсь пиналъёсмес бордамы возьыны луонлыкмы вань. Котькуд пиналэз ум кутӥське — тодмоос пыр гинэ. Соос милемлы оско, — шуэ нылкышно.

Нимаз ужась нылпи сад статуслы Ижын тупа одӥгез гинэ — Якшур-Бӧдья сюрес вылын интыяськем Канифольный каргуртысь «Весёлый светлячок». Таизлэн кулэ луись документъёсыз вань, ужзэ радъя со кунысьтымы нылпи садъёс азе пуктэм куронъёсъя. Кышкытлыклэсь утиськон, чылкытлыкез чаклан ласянь ваньмыз умой. Интыяськемын та нылпи сад тузӥ юртын — со зэмос дворец кадь. Ижысь пиналъёсты отчы нуналлы быдэ нуэ-вае город администрация дорысь кошкись нимысьтыз автобус. Пиналъёсты визьнодан программазы но отын мудрон: воспитательёс ужало Монтессори системая. Пиналэз та садын утён нуналаз ог 800 манет пала усе. Нылпиосты группаослы уг люко, воспитательёс котькуд пиналлы нимысьтыз саклык висъяло. Макем пайдаё таиз амал — мукет ужпум. Но та детсад вылысь адӟиськомы: одӥг пиналэз утем понна гинэ толэзяз ог 17 сюрс манет люкаське бере, озьыен, нылпи сад нокыӵе шуг-секытъёстэк улэ-вылэ.

Зэм но, та садлэн вылыз но, пушкыз но тузӥ. Шудонъёс, кӧлан интыос, мебель — ваньмыз дуно. Нылпи садлэн кивалтӥсез Наталья Митрошина журналистъёслы дышемын ини — капчи мылкыдын юанъёссылы валэктон сётэ. Мар ватонэз: таиз частной нылпи сад ужа законъя, чакла пиналъёсты будэтонъя вань куронъёсты.

— Меӵак верало: нылпи сад вылын коньдон уд дуры, — шуэ Н. Митрошина. — Та садмес 10 ар талэсь азьло усьтӥзы мыло-кыдо анай-атайёс. Но татчыозь табыш поттыны ӧз кылды на. Зэм, пиналэз ми дорын утён дунтэм уг сылы. Но вань бичам коньдон кошке нылпи садлэсь юртсэ возёнлы (со 4 этажъем, 2 спорт площадкаез вань), ӟеч квалификациен воспитательёслы уждун тыронлы но уно мукет расходъёслы. Нялтас вераса, милемлы учредительёсмы юртто на — но со коньдон но уг тырмы. Возиськомы нылпи садамы 40 пиналэз. Валамон, милемлы утьыны пиналзэс сёто зӧк кисыё адямиос.

Кечъёсты кутэ дэбес анай
— Нимаз ужась нылпи садэз усьтыны сокем секыт ӧвӧл, — шуэ Дышетонъя но наукая министерствоысь пиналъёсты школалэсь азьвыл визьноданъя ёзэн кивалтӥсь Наталья Шевякова. — Разрешение басьтон понна ужбергатӥсь быдэстыны кулэ кышкытлыклэсь утиськонъя, озьы ик чылкытлыкъя куронъёсты. Пусйыны кулэ: муниципал кылдытэтъёс ужбергатӥсьлы котыр ласянь юрттыны дась — мед гинэ басьтӥськозы таӵе проект борды. Кылсярысь, Ижын тани кык пол ялӥмы нимаз нылпи сад усьтонъя конкурс. Та ивор паськыт вӧлмытэмын вал. Но шоркарысь вазиськись ӧз луы: быдэстоно куронъёс сярысь тодо но тӧлӟо. Со понна вазиськиз Дэбес палъёсын улӥсь анай — со ас мылкыдызъя усьтӥз частной нылпи сад.

Зэм но, Дэбес черкогуртысь трос нылпиё анай Марина Тронина, калыкез уже интыянъя биржа пыр субсидия басьтыса, нылпи сад усьтӥз. Семьяеныз выль юртазы улыны выжиз, нош вуж коркаяз сад усьтӥз. Быдэстӥз тылпу кысӥсьёслэсь, Роспотребнадзорлэсь но мукет ведомствоослэсь куронъёссэс. Коркаезлэсь быдӟалазэ чаклано ке, нылпи садын со возьыны быгатэ 9 пиналэз. Та нылпи сад муниципалитетлэн заказэз луэ бере, анай-атайёслэсь басьтӥськись дун кун садъёсын выллем — толэзяз ог 650 манет. Марина Тронина верамъя, садэз со коньдон дурон понна ӧз усьты. Трос нылпиё анай ӟеч вала детсадэ черодзэс витись анай-атайёсты. Дэбесын таӵеос, котькытын сямен ик, ичи ӧвӧл. Озьы та кышномурт кык кечез кутӥз: аслэсьтыз удыссэ но мытӥз, пиналзэс кытын утьыны ёрмись семьяослы но юрттӥз.

Дышетонъя но наукая министерствоысь специалистъёс оско: Дэбесысь кышномуртлэн вамышез адӟем карымон луоз мукетъёслы но. Та ужпумлы саклык висъяське ни федерал центр ласянь но. Нимаз сад усьтыны мылкыд карисьёслы Удмуртия али ик уксё висъяны дась. Иж город администрация оске: Ижын частной садъёсты усьтонлы чаклам 3 миллион манет туэ кутӥськоз, конкурсэ пыриськыны мылкыд карисьёс луозы.

Елена Никитина

Туспуктӥз Марина Подлесских

Удмурт Дунне
By Удмурт Дунне Январь 25, 2013 10:08