Кионлэн пытьыез кузя

Удмурт Дунне
By Удмурт Дунне Январь 22, 2013 11:39

Кионлэн пытьыез кузя

belomorskihВерос

Кезьыт февраль тӧл таяз уе эшшо но шузимиз кадь. Писпу вайёсты ог-огзы борды шукке. Дауръёс ӵоже сылӥсь кызъёсты выжыенызы ӵош ишкалтыны выре, векчи лымы пырыосты пужнэ. Таӵе куазен умой кузё пунызэ но ураме уз улля, шуо. Нош кышномурт мазэ ыштэм таӵе куазен нюлэскын? Тӧл шорын гордэктэм ымнырысь, книга вылысь кадь, лыдӟыны луэ: умойлы осконзэ, ӵуказезэ ыштэм со. Бам вылаз синкылиос кынмиллям, йӧњектӥллям. Кышет улысь потэм тур-пар йырсиез гӧртэм.

Озьы ке но, пыдесозяз лымые выйылыса, Катьырна ас сьӧраз кыскыны выре валзэ. Гӧртэм живот берпум кужыменыз кыске бордаз думем дӧдьыез. Куро пушкысь, тур-пар куштэм котыр пӧлысь уд но адӟы дӥсен бинялтэм улэп комокез — 4-5 аресъем пиёкез. Дӧдьы сьӧры, пыдъёссэ мырдэм кыскыса, вамыштэ Лусьтро пуны. Кытчы соос ваньзы дырто? Азьпалазы пеймытэныз кышкатӥсь тэль но сютэм пӧйшуръёс гинэ. Ма, мышказы но адямиос ӧвӧл — кӧттырмостэм животъёс гинэ.

Кезьыт омырез пильыса ик, пель сьӧрын чузъяськиз кионлэн вузэмез. Оло, сое кылыса, ӟызы, лапег кышномурт, берпум кужымзэ люкаса, эшшо но золгес кыскиз биньгозыез. Вал но, тушмонлэсь зынзэ шӧдыса, чупресгес вамыштӥз. Нош лек тӧл весь но весь пужнэ лымы пырыоссэ, векчи веньёссэ мертчытэ ымныре. Тан-тан кынмем бамъёс уг ни шӧдыло тӧллэсь шачкетэмзэ.

Ӵукна пал тӧл буйгатскиз. Оло, нюлэс пушкысь кызъёс сое лябӟытӥзы. Пужым вайёсы бинялскыса, чусомиз, нырулыны ӧдъяз. Одӥг тыр толэзь гинэ югдытӥз на кезьыт тылыныз музъемез.

* * *
Пеймыт нюлэс пушкы Лёгор ас вакытаз ӝутӥз  пичи пӧйшуран корка. Семьязэ сюдӥз уго нюлэс: кутэм пӧйшуръёслэсь куоссэс вузаса, Лёгор коньдон поттӥз, сӥльзы мынӥз сиёнлы, кӧйзы но пуштӥрлыксы эмъяськыны яраз.

Тэльысь та корка сярысь гуртын одӥг-кыкез сяна ӧз тодэ. Котьма ке но Лёгор, татчы вуылыкуз, кельтылӥз кӧня ке керосин, ӟыгыртэт пу но  дэрае бинялтэм сукари. Тэлен ваче син кыльыса, пӧйшурасьёс корка дыртылӥзы, Лёгорез котьку но шуныт кылын тодазы вайылӥзы.

Та куштэм-вунэтэм пичи коркае ик дыртӥз огназ кылем, ултӥям Катьырна вить аресъем Гриша пиеныз. Пересь Лёгорез тӧдьыос капка азяз ик пуныез кадь шуккыса виизы, Педор пиез гордъёс сьӧры кошкиз шуыса. Кензэ, Катьырнаез, сюлоен жугыса, ураме куштӥзы. Ма кароз на ултӥям кышномурт? Гуртын ӵыжы-выжыоссы ӧвӧл, бускельёссы ӧсъёссэс ӧз усьтэ. Катьырна Гриша пиеныз быдэс дунне вылын огназ кылиз. Улон корказэс тарказы-сутӥзы, пудо-животсэс нуизы-вандӥзы-сиизы. Катьырна сюрес вылэ дасяськиз. Валзэс кыткыса, кышномурт пеймыт уйин, нокин адӟымтэ дыръя, пегӟиз. Ма, тӧл но лымы юрттӥзы — пытьызэ согизы-ӵужизы.

Ма луоз ӵуказе? Кызьы уломы? Тылскем гур азьын пукыса, нылкышнолэн йыраз малпанъёс бергазы. Кык пыдо сьӧсьёслэсь пегӟизы, нош татын мукетъёсыз — ньыльпыдоосыз.

* * *
Дас арлэсь кема ни Казан кион улэ огназ. Ас дораз матэ уг лэзьы мукет пӧйшуръёсты но, адямиосты но. Аръёс ӧз быгатэ сюлэмзэ буйгатыны, яраоссэ бурмытыны.

Та уйзэ но кион пумитаз аслаз яратоно интыяз — меӵ из гурезь йылын. Тыр толэзен ваче син кыльыса, пурысьтам йыраз бергатӥз кемалась ортчем вакытэз. Малпаськонзэ куспетӥ кариз нюлэс пушкысь чузъяськись куара. Шуэрскиз. Татын Казан кузё, нош кин солэн музъем вылаз пырыны дӥсьтэм? Казанлэн сюлэмыз ӧз чида — куара пумитэ потӥз. Пичи нюлэс кушын ог вить кионъёс  лукыр-лакыр кесяло валэз. Куанер живот улэп на, берпал пыдъёсыныз тушмонъёссэ ӵыжыны выре на, нош кужымез пумен кошке виясь вирен.

Казан шӧдӥз адями зынэз. Нырпелесаз мертчиз ӵын зын. Кытысь со? Мар со? Кызъёслэн йылсо вайёссы вискытӥ учкиз: куштэм коркалэн муръётӥз ӵын потэ, мӧзмыт тэль шоры уӵеръясь укноетӥ югытак-югытак тыл пиштэ. Артэ кионъёс валэз кесяло.

Та уе Казан урмем кионъёсты ас музъем вылысьтыз ӧз улля — мед кӧтсэс тырозы, куанеръёс.
Но инвис льӧлектыны кутскыку ик, Казан валлэн шӧез дорын вал ни. Вить пар ӝуась синъёс долказы нюлэс кузё шоры.  Казан шоразы лек ыргетӥз: кӧттэс тыриды, шутэтскиды, нош али умоен кошке. Кионъёс кышказы, берлань чигназы.

Ӧз, ӧз йӧтскылы Казан вал мылес борды. Яра шат эксэйлы ляльчиос бӧрсьы сиськыны? Уг, уг яра! Нош ма та? Лапас улысь ас бордаз кыскись зын лосъяське. Ас дораз ӧтись мумы зын. Казан ассэ вормиз, берлань чигназ.

* * *
Катьырна уйзэ кӧлытэк потӥз. Укно улад валэз кесякузы, кызьы чырым карод ни? Жаль ке но потӥз пудоез — корка сое уд пырты, ма быдэс толэз сое маин ке сюдоно ук. Асьсэос но мае сиёзы ай.

— Тулысозь чидалом  ай, — оло ассэ буйгатыны вырыса, оло  пизэ, шара вазиз кышномурт.

Та нуналзэ пиналэн кышномурт кӧтсэс тыризы куасьтэм нянь юдэсъёсын, турын-куарен пӧзьтэм лымы вуэн. Укно улын лошъяське валзылэн шӧйыз. Пот вылэм, кыз вайёсын шобырты. Нош кызьы дӥсьтод? Оло, урмемъёс ватскемын гинэ? Ярано коть, ӝыт пал усем лымы вань пытьыоссэс ватӥз-шобыртӥз. Озьы ке но Катьырна та уйзэ но умой ортчытыны ӧз быгаты.

Казан но ӧз чида. Пыдъёсыз асьсэос вайизы сое корка  доры. Ческыт, ас дораз ӧтись зын лябӟем ни. Кин со? Мыр-мыр учкиз но — лапас улын дыр-р-р куалекъя Лусьтро пуны. Инкуазь вормиз: пуны кионэз ас дораз лэзиз.

* * *
Нунал бӧрсьы нунал ортче. Катьырна нюлэс пушкын асьсэ коже гинэ улыны дышиз. Ма, пиез но аслыз уж шедьтӥз. Нуназе муминыз ӵош нюлэскы пота,  улвай бича — юртэз шунтоно ук. Катьырна корка сигысь вуж капканъёсты шедьтӥз, соосты лудкечъёсын пужъятэм интыосы пуктылӥз. Но нокинэ ӧз куты. Оло капканъёс уродэсь, оло лудкечъёс кескичесь. Киосыз ик юскиськизы: маин пизэ сюдоз? Кесям валлэсь лыоссэ коть пӧзьты! Сыӵе мылкыдын коркаысьтыз потэ ни вал — канжаськиз. Мар та? Ӧс куспын вием лудкеч. Кышномурт паймыса учкиз Лусьтро шоры, но пуны нискетӥз гинэ. Тодаз вайиз: улвай бичакуз, лымы вылысь бадӟымесь пытьыосты адӟиз вал. Пӧйшурлэн мугорыз секыт шӧдске — пытьыос муре выемын.

Тулыс вуэмъя Лусьтро быгыльскыны ӧдъяз. Берло гинэ кышномурт валатскиз: кион сюрес лёгем пунызы доры. Ӧс куспысь шедьтэм лудкечъёс но Лусьтролы ваемын вал. Ӵапак со лудкечъёс вылын соос толйизы.
Бер тулыс, льӧмпу сяськаяськыку, Лусьтро одӥг кучапи вайиз. Катьырна сое Льӧль нимаз.  Син пумъёстӥз яркыт-горд нюжаос кыстӥськизы уго.

* * *
Нырысь нуналъёсы синтэм Льӧль нонӥз но кӧлӥз гинэ. Кык арня ортчыса, мугорзэ умой вормисьтэм пыдъёсыныз вамыштӥз шунды пала. Яркыт сиос кышкатӥзы сое, берлань чигнамзэ ик ӧз вала. Чылкыт омыр кӧня ке пол кизьнытӥз. Озьы ке но, со нош ик шунды пала кыстӥськиз. Соку ик кинлэн ке бадӟымесь киосыз сое анаез дорысь ишкалтӥзы, выллань зӥргытӥзы. Озьы Льӧль тодматскиз котыр дуннеен но адямиосын.

Одӥг уй Лусьтро кучапизэ сайкатӥз. Льӧль шӧдӥз: лапас улэ нюжтӥське на эшшо одӥг живот. Йыраз чилектӥз малпан: атай.  Кышказ ке но, ӧз палэнтӥськы. Пичи нырыныз месӥськиз Казанлэн гоназ, шокыштӥз зынзэ.  Со дырысен Льӧльлэн улонэз кыклы люкиськиз: нуналзэ ортчытэ анаез вӧзын лапас улын,  уйзэ — бубиныз тэльын. Бадӟымгес будэмъяз Льӧль палэнтӥськыны выриз адямиослэсь. Пичи кучапиез уго нерад карылӥз Гриша.

Озьы ортчиз гужем.  Льӧль мугорызъя пуныослэсь бадӟымгес адӟиське, быжыз но кук висказ учке, утэмзэ но уд кылы.

* * *
Бер сӥзьыл Льӧльлэн улонэз воксё но воштӥськиз. Улон интыязы вуиз мурт адями — Игнат. Гуртысь узыр воргорон тодэм нюлэскы пегӟемъёс сярысь, вуэм Катьырнаез выльысь ултӥяны, аслыз ляльчи карыны.

— Кышномурт, малы дуно но кема возьмам куноез уд пумитаськы? — боз-боз куараен кеськиз пиосмурт но, йырзэ выллань урдыса, горыны кутскиз.

Тодмотэм куараез кылыса, кучапи лапас улысь йырзэ поттӥз. Ыргетыны ӧдъяз. Пиосмурт лек учкиз нылкышно шоры. Со куспын ик Льӧльлэн ныраз сурон сапегеныз вуттӥз. Куанер кионпи куаньгетыса лашкинтӥз нюлэскы.

— Пегӟид шуыса, малпад! Мынэсьтым уд пегӟы — музъем пушкысь но шедьто! — нюлэс кушын ӵашйиз Игнатлэн куараез. — Катя, лык дорам улыны, юртъере мынам бадӟым, ужась киос кулэ, ма, уйёссы валесме но шунтод… Яке дорам лыктӥськод, яке та сэрегдэ пеньлы пӧрмыто!

Вераз но берытскыса кошкиз. Нош боз-боз куараез али ке но Катьырналэн пельёсаз чингетэ на. Мар кароно? Пегӟоно! Выльысь пегӟоно. Кытчы? Урод малпанъёссэ вормыны турттыса, кышномурт ӟыгыртӥз пизэ.

* * *
Льӧль палэнтӥськиз нюлэскы. Нырыз али ке но вӧсь луэ на, йыраз малпан берга: ма понна? Озьы пегӟонъяз, Льӧль йыромиз. Котыр пеймытгес но пеймытгес луиз. Кучапи нискетыны ӧдъяз. Пумитаз вазиз шиетӥсь тӧл гинэ. Солань-талань вамыштӥз Льӧль. Йырыз воксё берганы кутскиз. Кӧтыз но сюма ни. Азьвыл солы сиён вуттылӥз атаез. Нош табере? Кытын со? Кытын мумиз? Огназ. Кышкыт. Мӧзмыт.

Льӧль тодытэк ик кылиз: Катьырна Гришаеныз вазь ӵукна ик сюрес вылэ потӥзы. Узыръёслэсь, ултӥямзылэсь пегӟиз со, кураськисьёслэн сюрес вылазы султӥз. Ма, сюлмаз оскон но кылдӥз: оло, кин ке жалялоз, улон сэрег но шедёз ай. Озьы кышномурт вордӥськем палъёсысьтыз кошконо луиз. Зор гылтӥз пытьызэ но зынзэ.

* * *
Льӧль шур доры васькиз, ву юиз, усем писпу выжыысь гутё шедьтӥз. Гутёе бен быдэсак ӧз тэры, йырыз кыре кылиз, озьы ке но кионлы со туж яраз. Музъем вылэ акшан лэзиськем бере гинэ валаз: урод инты. Яркыт пиштӥсь толэзь улын адӟиз:  ваське мӧйы гондыр. Льӧль татчыозь тодӥз лудкечъёс, векчи тылобурдоос но вучайыос сярысь гинэ. Гондырлэсь бадӟым мугорзэ адӟыса, чыртыыз ик пушказ кыстӥськиз, гутёяз мургес пыриз. Гондырлэн гонэз сьӧд-сьӧд чиля. Чорыг сиыса, лэся, таш-таш куаемын. Йырзэ уллань лэзьыса, ву юыны кутскиз. Кема ӧз сюпкеты — омырез зынъяны ӧдъяз. Шӧдӥз кионлэсь зынзэ. Гондыр котьку но кышкалляз кионъёслэсь. Быдэс мугорыз юзыр-кезьыр луылӥз, уллёез адӟыса. Палэнысь вузэмез кылӥз но нюлэс кузё, вуэтӥ секыт вамышъяса, пегӟиз.

Собере кионпи кылӥз: кӧльыос вылтӥ кин ке лыктэ. Йырзэ месӥз но паймиз: кузь пыдо койык. Льӧль уката мургес пыриз караз. Ӵукна гинэ кыре потыны дӥсьтӥз со. Кӧт сюма, маза уг сёты. Солань но талань уӵертӥз. Азяз пересь гондыр чорыг калтэ. Пурысь комок пала уг но учкы. Тяпыр-тяпыр сиське. Кӧтыз тырем бере кылем-мылемзэ музъеме согиз.

Гондырлэн берыз ышиз-а, ӧз-а — Льӧль ватос дорын вал ни. Та вакытэ кионпилэсь нокин но шудоез ӧй вал, дыр.
Озьы нунал бӧрсьы нунал ортчиз. Гондыр чорыга, нош Льӧль кунояське. Нош уйёссэ кионпи, пельёссэ сак карыса, кылзӥз нюлэс пушкысь  кион вузэмез. Льӧль ачиз но вузэмъяськиз, но ымысьтыз нискетэм гинэ потӥз.   Одӥг уе ӧз чида — кион вузэм пала дыртӥз.

Мур лымыен шобыртэм бусы кузя ог дас  кионъёс уйисько койык сьӧры. Койыклы секыт бызьыны, пыдъёсыз лымые выё. Кионъёс паськыт пыдъёсынызы куас вылын кадь гылӟо. Кӧня ке метр гинэ кылиз на нюлэсозь, отын койык быгатсал ни пегӟыны. Но чыртыяз мертчиськись сюриз. Льӧль.  Койык дугдӥз, каллен пыдесъяськиз но йырзэ мыкыртӥз. Кион уллё омырскиз вием пӧйшур вылэ. Сьӧсьёс буйгам бере уллёысь палэнтӥськиз егит пурысь мумы кион. Льӧль шумпотыса нискетыны ӧдъяз, быжыныз выретӥз. Шӧдтэк шорысь Льӧль азе тэтчиз мукет кион, вазерпиньёссэ поттыса ыргетӥз, мумы кионэз куртчиз, уллёе улляз. Вань выросъёсыныз возьматӥз кадь, кин татын кузё. Льӧль берлань чигназ. Со ӧз кышка, быжзэ пыдъёсыз улэ куныртыса, ӧз пегӟы — йырзэ выллань урдыса, кошкиз. Валаз кадь: уллёын со улыны уз быгаты.

* * *
Нунал бӧрсьы нунал ортче, шунды тулыс пала берыктӥське. Пичи нодтэм кионпиез уд ни тодма: ӵуштыр-паштыр гонэз вольк-вольк сьӧд луэм, пельёсыз чорк! сыло, пыдъёсыз кужмоесь, горд виштыосын синъёсыз  котыр эскерисько. Кион визьмаськиз: адямиосын пуктэм капканъёсты палэнтӥ ортчылӥз. Но одӥг пол Льӧль капкан вӧзысь шӧдӥз тодмо зынэз. Адӟемпотостэм адямилэсь зынзэ — узыр Игнатлэсь.

Адями но кион вискын кутскиз ож: кин кинэ вормоз. Игнат пуктылӥз капканъёс, нош Льӧль отчы шедем пӧйшуръёсты кесялляз. Трос ыштонъёс вайиз Игнатлы. Ма гинэ ӧз малпалля воргорон: капканъёссэ парсь кӧйын зыралляз, лудкеч пушкы яд понылӥз. Но сыӵе курике сюрылӥзы ӟичыос гинэ.
Тулыс вуэмъя воргоронлэн кионлы вожпотонэз эшшо золгес луиз. Аслыз шуиз:  пумисько тушмонэным, ыбо сое.

Нуназеосы куазь шуныт ке но возиськиз, уйёссы кынтылӥз ик, дырын-дырын лымы но усьылӥз. Сьӧсез али ӧд куты ке, отӥяз уз пӧрмы ни. Игнат ог 15-20 капкан пуктӥз. Койык сӥлен дэмӟытэм капкан котыр эшшо интыяз на ог дас капкан. Огаз ӧз шедьы ке, мукетаз пыдзэ чуртналоз.

Вазь ӵукна Льӧль сылӥз капканъёс вӧзын. Выль лымы зын нырпелесъёсы мертчиське, адямилэсь зынзэ соге. Олокытысь вырйылысь потӥз адями, пыӵал ыбем кылӥськиз. Кион вќзтӥ кулон вайись пуля лобиз. Льӧль интыысьтыз ишкалскиз, но пыдъёссэ корт пиньёс куртчизы, эшшо одӥг вамыш — мукет капканэ сюриз. Музъем вылын мозмытскыны вырыса погылляськонъяз Льӧль вань капканъёсты октӥз. Быдэс мугораз куртчылӥськизы соос. Котыр лымы льӧлектӥз. Озьы ке но, пунылэн ӟигарыз тырмиз на матэктӥсь адями шоры ыргетыны. Бен, ымпушкысьтыз потӥз вир шапыкъёсын шокыштэм гинэ.

— Ма, та воксё но кион ӧвӧл! — паймиз воргорон. — Жильыысь пегӟем пуны!
Вылаз Игнат, сялӟыса кошкиз, кионэз кулыны кельтӥз.
Кӧня дыр ӵоже лымы вылын кыллиз Льӧль — шуг вераны. Но шӧдӥз: адями киос калленэн мозмытыны выро мугорзэ.

— Я, чида кӧня ке, — небыт куараен вазиз пиосмурт.

Сумкаысьтыз басма юдэс поттыса, воргорон бинялтӥз кионэз но каллен вераз:

— Эше, быгатод-а ачид мыныны? Оло, ки вылам нуом?

Воргорон кионлэн чыртыяз гозы керттӥз но ӝутыса азьлань дыртӥз.

* * *
Ӝыт пал Игнат выльысь потӥз сюрес вылэ. Капканъёсы сюрем пуныез эскерыны малпаз. Но нокинэ ӧз шедьты.
Урод иворъёс огез бӧрсьы мукетыз кылӥськизы гуртэ: тӧдьыос, пе, чигнало, гордъёс вормо, куанеръёс колхозъёс кылдытъяло, пумитъяськисьёсты Сибире келяло. Жаль потэ Игнатлы ас киосыныз поттэм ваньбурзэ куанеръёслы люкылыны. Сибире но мынэмез уг поты.

Бен, одӥг шумпотон ивор вуиз ик. Катьырна, пе, бертэм. Пиеныз толзэ ортчытэм мукет гуртын, огназ улӥсь пересь кышномурт дорын. Нош али  берлань вуэм. Сюлэм угось вордӥськем интыосы кыске. Та иворез кылыса, Игнат киоссэ ик посыны кутскиз: Катьырна солэн луоз.

* * *
Уйзэ Льӧль пумитаз тылскем дурын. Кион вӧзын адями ке но вал, пӧйшур марлы ке шыпыт пукиз, пегӟыны ӧз туртты. Та дыре со пушкын сайказ пуны вирыз: возьмаз кадь, мед сое сюдозы, утялтозы, маялтозы.

— Куанер, — животлэсь бинялтэм пыдзэ эскерыса, вазиз Педор, — кинэн-о тон ӧд тэры? Мон но узыръёсын ӧй тупа, пумит султӥ. Юлтошъёсыным трос вир кисьтоно луим. Мон умой, шулдыр улон понна жугиськи, семьяме куштоно луи, сӧсырмыны шеди, — оло аслыз, оло кионлы улон сюрессэ мадьыны кутскиз пиосмурт. — Нош али бертӥсько вордӥськем гуртам. Отын монэ возьмало кышное но пие, пересь атае.

Нюлэс пушкысь кылӥськиз кион вузэм, бордаз итӥськиз мукетыз.

— Тынад эшъёсыд! — кион шоры учкыса, вазиз Педор.

Педор чалмытскиз, эскериськиз: оло  Льӧль но вазёз кионъёс пумитэ, оло пегӟоз. Кинэн со: кионъёсын яке адямиосын?

Кионъёс пумен матэ вуо. Воргорон валаз: кионъёс соослэн пытьызы кузя лыкто. Вир зын ӧте сьӧсьёсты. Воргорон уг кышка животъёслэсь — ки улаз тыл, ма, писпу вылэ но тубыны луоз. Льӧль гинэ жаль.

Льӧльлэн тыбыр вылысьтыз гонэз султӥз, синъёсыз воректӥзы горд тылъёсын. Педор но дыртӥз пыӵалзэ эскерыны. Котыр чал-чал луиз. Льӧль нюлэс пала тэтчиз, ыргетыны кутскиз. Пеймыт тэльысь учко вож тылын ӝуась синъёс. Тылскем пала одӥгез бӧрсьы мукетыз потӥзы ог куамын сютэм кионъёс. Котыртӥзы, дасяськизы виыны.

Педор валаса но ӧз вутты, кызьы Льӧль ачиз нырысь тэтчиз кионъёс пумитэ. Самой бадӟыменыз кырмиськыса, нюлэс пушкы ышиз. Педор кионъёс шоры ӝуась пу пумъёсын зӥръяз, ыбылӥз. Кионъёс чигназы,  Педор тылскем дуре огназ кылиз. Нюлэс пушкысь потӥз вужер, воргорон кышканзэ вунэтыса, дыртӥз со пумитэ. Льӧль.

Воргорон, сумкаысьтыз кӧня ке юдэс басма поттыса, бинялтӥз пунылэсь мур яраоссэ. Быдэс уйзэ чалмыт ке но вал, Педор чырым но ӧз кӧлы.

Та жугиськон адямиез но кионэз огазеяз. Педор сӧсырмем Льӧлен пичи пиналэн кадь выриз. Льӧль но пунэме ӧз кыльы — тау карыса учкиз шораз.

* * *
Гурт пала вуыкузы, Педор кожиз атаеныз пуктэм пӧйшуран корка. Шӧдтэк шорысь Льӧль чалмиз, котыр омырез ас пушказ кыскиз. Нокин но сыӵе зол уг шӧды кулонлэсь зынзэ пуны кадь. Шӧдтэк шорысь омырез пилиз кышномуртлэн кеськемез. Педор тодмаз яратоно Катьырнаезлэсь куаразэ. Льӧль но тодмаз сюдӥсь-утялтӥсь адямилэсь куаразэ. Горд вирен сураськизы кионлэн синъёсыз, со бызьыса корка пыриз.

Пагӟаос кузя тубыса, Педор адӟиз: Катьырна кылле выж вылын, куараез бырем ни, куаратэк викышъя, нош скамья вылын кылле Игнат, со вылын ыргетыса сылэ Льӧль. Педор кулакез керттылӥз, Катьырнаез ӟыгыртӥз.

Льӧль но буйгатскиз кадь. Быжзэ выретыса, кӧт вылаз выдыса, нюжтӥськиз гур улэ. Отысь, дӥсьтӥз кыскыса, поттӥз Катьырналэсь пизэ.

* * *
Дуннеын выльысь кузёяське тол. Инмысь каллен усе тӧдьы мамык, небыт шобретэн вале музъемез. Тӧл но чусомем, писпуослэн вайёсазы дэмӟыса,  нырулэ. Тыр толэзь инмын визнаса пуке. Котыр чал-чал. Кезьыт омырез пильыса, кылӥськиз кион вузэм куара. Бордаз итӥськиз мукетыз, егитэз.

Льӧль быдэс сюлмыныз биниськиз ке но Педор но семьяез борды, кион вирыз кыске нюлэскы.

Педор пуксиз Льӧль вӧзы. Тамаксэ кенжытыса, малпаськонэ усиз. Со вискын кылӥз вузэм куараез. Льӧль но пыд йылаз султӥз, жильыез сузьтӥськымон кыстӥськиз. Вузэм куара эшшо чузъяськиз. Ӝож куара. Мон огнам, шуэ кадь. Льӧль ымзэ усьтӥз вал пумитаз вазьыны, но Педорез тодаз вайыса, каллен выдӥз, пыдъёсыз вылэ йырзэ поныса, чусомиз.

— Валасько, эше, — тамак пумзэ пеймытэ зӥргытӥз Педор. — Бызь нюлэскы…

Пиосмурт кионэз мозмытӥз. Льӧль, эриклы оскытэк, кӧня ке сылӥз на, берло тём-пеймытэ ышиз. Педор капка азяз возьмаз на: оло берытскоз, оло пуны сюлэмыз берлань кыскоз?

Эшшо одӥг нунал ортчиз. Уй кузёяське котыр дунне вылын. Меӵ из гурезь йылын, толэзь шоры учкыса, пуке пурысьтам мӧйы кион. Казан со. Бордаз — пиез, Льӧль. Шедьтӥзы ог-огзэс.

Елена Вахрушева

Удмурт Дунне
By Удмурт Дунне Январь 22, 2013 11:39