Вакчи дыр куспын — выль бассейн

Удмурт Дунне
By Удмурт Дунне Январь 30, 2013 17:33

Вакчи дыр куспын — выль бассейн

basseinТуннэ ИжГТУ-ын дышетскисьёслэн бадӟым праздниксы — ӧсъёссэ усьтӥз выль бассейн. 25 метръем уян инты  туала куронъёслы котыр ласянь тупа, вуэз чылкытатон арбериос ужало. Кызьы ивортӥз ИжГТУ-лэн ректорез Борис Якимович, бассейнлэн дуныз 136 миллион манет тыр усиз, со пӧлысь 30 миллионэз гинэ Удмурт Республикалэн бюджетысьтыз.

Ижысь техникая университетын дышетскисьёслы удалтӥз, физкультурая урокъёссы выль бассейнын ортчозы. Студентъёс сяна, отчы ветлозы вань мылкыд карисьёс. Час куспын вуын 48 адями уяны быгатоз. Ужрадэз сӥё-дано усьтон дыръя шаерысьтымы вылӥ кивалтӥсьёс вуылӥзы. Ву вылын чебер эктыны быгатэмзэс возьматӥзы синхронной амалэн уясьёс, нош «Динамо» клубе ветлӥсь пиналъёс нырысетӥ рекордъёс возьматӥзы.

Озьы тӥни «Огъя Россия» партиен ялэм «500 бассейн» проектэ пыриськыса, ИжГТУ-ысь уян инты тужгес вакчи дыр куспын пуктэмын. Сое лэсьтон ужъёс мытӥзы вал кылем арын октябрь толэзе. Озьыен со но аспӧртэмлыко рекорд. Азьланяз мугорез кыдатонъя «Буревестник» центрын выль вормонъёс тросгес луозы на.

Валентина Емельянова

Туспуктэмез:  vizhevske.ru

Удмурт Дунне
By Удмурт Дунне Январь 30, 2013 17:33