Пожъёсты кельтом ӧс сьӧры

Удмурт Дунне
By Удмурт Дунне Декабрь 4, 2012 16:45

Пожъёсты кельтом ӧс сьӧры

Р. Резенова мыртпум компотэныз

Редакциын ужасьёсын алигес вуылыны кылдӥз Глазов ёросысь Люм гуртэ. Чай юыны Раиса Резенова доры пыромы шуэммылы, паймись ӧз луы. Со, пе, дышемын куно пумитаны.

Электровеник
Раиса Ивановна удмурт кылъя дышетӥсь, Люмысь 9 классъем школаез ворсамзы бере ужа Дондыкарысь шор ёзо школаын. Нош куноос зэмзэ но со доры ӵемысь кожало, уката ик гуртазы удмуртлыкен герӟаськем ужрадъёс ортчо ке. Ми но, ёросысь «Лӧпшо Педуньлэн бенефисаз» вуэмъёс, тыр ӝӧк сьӧры сюримы. Вакчи дыр куспын азямы пуксизы пӧсь картофка, сылалтэм бакча сиёнъёс, варення, чечы.

Пӧраськон сэреген артэ интыяськем мурӝолэз ӧс гинэ висъя, кытчы ке пыдлось выж улэ пыроно ӧвӧл. Ӵажмыт мурӝолысь висъетъёсы нимаз-нимаз интыямын бакча сиёнъёс. Но син шоры соку ик йӧтӥзы банкаосын тыро ӝажыос. Сыӵе узырлыкез адӟыса, синъёс ик палёмизы. Ма, кӧня дыр ӵоже сылалтоно-пӧзьтоно ваньзэ сое тырмытон понна!

Резенова серекъяса вера:

— Инкуазь ми палан узыр. Туж яратӥсько узы-боры бичаны, корзинаосы вакчи дыр куспын тырмо, соин эшъёсы монэ электровеник шуо. Варення, компот пӧзьтыны но тырме, мултэссэ вузаны поттӥсько. Туэ 2 сюрс 800 манетлы боры вузай. Узы но ми палан тырмыт. Но тужгес яратӥсько мыртпум бичаны — нюрэмезез (морошкаез). Ёросамы со Люм палан гинэ будэ. «Иднакар» газетын ужасьёс, эшъёсы ваземме гинэ возьмаса уло, ӝогак вуо емыш бичаны. Мыртпумлэсь туж ческыт компот, варення пӧрме.

Раиса Ивановна губи интыосты но ӟеч тодэ. Эшъёсыз нош ик возьмало солэсь нюлэскы чортэмзэ. Бакча котырын но ужез пӧзе. Ваньмыз улӟе, будэ сюлмо киос улын, собере ӝӧк вылэ вуэ.

Чырмыт сямо нылкышно туж шумпотэ, куноосыз кӧлыны кылё ке. Милемыз но уйлы пумит сюрес вылэ лэземез уг поты вал. Ӵукнаяз, пе, ваньмы ӵошен перепеч лэсьтом. Та семьяын сямлы пӧрмем ни куноосты вазь ӵукна ик ӝуась гурысь поттэм перепечен утялтыны.

Юртазы газ пыртэмын ке но, кузё кышнолэн бадӟым гуртэк кылемез ӧз поты, сотэк, пе, коркалэн шунытэз но шулдырез быре. Собере семьязы но дышемын ни шутэтскон нуналъёсы но праздникъёсы пыжиськемъёсын утялскыны. Туж ярато, ваньзы ӵошен люкаськыса, пельнянь пӧраны.

Эксэй сиён
Выль ар матэктэмен сюлмаськонъёс йыло. Ворпоё шортъёс басьтыса, Раиса Ивановна эшъёсызлы, матысь адямиосызлы синпель кузьымъёс дася. Нош Выль арез кытын пумитан сярысь йырзэ чик уг висьыты, часлэсь 12 пол жугемзэ Резеновъёс улыно-вылыно шуныт коркаязы пумитало. Кузпалызлэн сузэрез семьяеныз доразы лыктэ на, атайзы. Выль ар ӝӧк вылын одно ик луоз пельнянь, отчы ватӥськемын коньдон яке пӧсьтурын. Кинлы кыӵе шуд пинь улаз сюроз ни.

Бӧрсьысь кӧня ке арзэ Раиса Ивановна кунооссэ пумита йӧспӧртэм салатэн — куке но ассэ соин утялтӥзы. Нимаське сиён «Мономахлэн изьыез». Дораз куное ваньдэс ӧтьыны уг быгаты бере, Выль арлы та салатэз ӵектэ асьтэлы дасяны.

Ыль ӵужкушманэз векчиятоно шоро-куспо вуштонэн, пӧлаз ватсано 1 стакан небӟытэм изюм но сомында ик векчиятэм пушмульы. Майонезэн суралтыса, ваньзэ сое гурезь выллем интыяно паськыт тэркылэн шораз. Дурзэ котыртоно сырен. Со понна 200-300 грамм сырез векчи вуштоно, пӧлаз ватсано 2-3 пилет векчи юдэм чеснок но 2 ыль курегпузлэсь ӵужзэ. Тазэ но суралтоно майонезэн. Изьыез чеберъяны кулэ луоз гранат.

Семьяосылы но, куноослы но туж кельше та пайдаё салат, шуэ Резенова. Ма, уз кельшы, пе. Киев Русен кивалтӥсь эксэйлэн Владимир Мономахлэн асьме дырозь вуэм данэз котькудӥзлы пичильтык ке но кужым сётоз азьлане вамыштон сюрес вылаз.

Кибашлы В. Резенов

Воргоронъёслэн кӧкыязы

Раиса но Валерий Резеновъёслэн кык пиоссы будо. Школаез азвесь медален йылпумъяса, Мишазы программистэ дышетске Глазовысь пединститутын, куинетӥ курсын ни. Нош Гриша дышетске Дондыкар школаысь укмысэтӥ классын. «Витьёс» гинэ бича, пыриське пӧртэм олимпиадаосы но конференциосы. Туж яратэ спортэз. Витетӥ классын дышетскыкуз, «Удмурт дунне» газетысь Тол бабай Гришалы шудон туп кузьмаз вал.

Раиса Резенова ассэ туж шудоен лыдъя, котыраз уго зэмос воргоронъёс. Кузпалыз Валерий Вениаминович Ижысь культпросветучилищеез йылпумъямын, трос аръёс ӵоже ужаз гуртысьтызы культура юртын. Туэ заочно йылпумъяз Глазовысь совхоз-техникумез. Электромонтёре дышетскыса, Глазовысь нефтебазае уже интыяськиз.

Воргоронлэн киыз котьмалы мынэ, компьютерен но выре, туспуктылэ, суредаське. Кышкатэк басьтӥськиз юрт пуктон борды но. 1997-тӥ арын фундамент кисьтыса, 2000-тӥ арын 4-тӥ ноябре корка пырон каризы.

— Ӵапак Удмурт кунлэн вордӥськем нуналаз тупаз, — шумпотэмзэ уг ваты Раиса Ивановна. — Прораб интыын вал атаймы Вениамин Васильевич. Со милям туж кибашлы. Корзина керттэ, муш вордэ. Мар ке пумысен гинэ уд вазиськы, котьку визь-кенеш сётоз, юрттоз.

Нош мар дэмлалоз лыдӟисьёсмылы Раиса Ивановна матэктӥсь Выль арен валче.
— Котькуд ар 31-тӥ декабре пыриськомы мунчое, вань пожъёсты кызьпу веникен улляськомы: вуоно арлы сьӧрамы номыр уродэз медаз выжы. Лыдӟисьёслы но ваньзылы сӥзисько 2013-тӥ аре чылкыт сюлэмъёсын но «Удмурт дунне» газетэн ӵош вамыштыны.

Лия Малых

Туспуктӥз Владимир Беломорских

Удмурт Дунне
By Удмурт Дунне Декабрь 4, 2012 16:45