Мониста уй

Удмурт Дунне
By Удмурт Дунне Декабрь 21, 2012 13:07

Мониста уй

Туспуктӥз Евгений Бикузин

Верос

Брангурт клуб доры вуыкуз ик, Лада жаляз, пыдаз колоша ӧз кутча шуыса. 26-тӥ куартолэзе 10 часэ ӝыт Удмурт Элькунысь Пичи Пурга ёросысь быдэс дуннелы тодмо Брангурт кунооссэ куазь пумитаз ведраысь кадь жаль-жаль зорен.

Ижысь потэмзы бере ик автобус укноын шим-шим пеймыт луиз: пилемъёс секыт зорен напчизы, сюрес урдсысь кызъёс, Обыдалэн нюлэсэз сямен, пӧртмаськись выжыкылэ выйтӥзы кадь. Уд но малпа, городысь делегациен «Евровидение» финалэ дырто шуыса! Быдэс автобус тыр татын — журналистъёс, артистъёс. Мылкыд пирсэкъя: трансляциез учкыны уз вуттэ, кытчы ке ӝимозы яке воксё ышозы, сюресэз уз шедьтэ…

— Кӧня коньдон жильдэмед! Тракт дурын сылӥд-а мар-а? — сализ гольтрес куараё бускелез, Чинзано, но, шукырес ӵошатонэзлы шумпотыса, быдэс автобус тыр гагактӥз. Киыз утыр монистаез исаны сузьтӥське. Удалтӥз ук пырултэм журналистэн ӵош пуксьыны!

Ладалэн удмурт дӥсез репортёрлы маймыл эктэм порма потэ — экзотика но тӥни. Та монистаен пель дораз шукконо вал — пиньыз шалтыр! мед усьылысал… Таӵе малпанъёс Ладаез шулдыртӥзы, Брангуртэ вуэмзэс ик ӧз шӧды. Кызьы меда калык пумиталоз ансамбльзэс? Дась-а мукетызлы «няньлы» — оло нош зомбиос кадь экранэ мертчемын?

Клуб дорысь тылъёс но куараос зорез сайязы кадь. Автобусысь потыкуз, Чинзано Ладалы кизэ мычиз. Лада туфлиеныз дэрие лёгиськиз. Акылес кавалерезлэн штаназ но пазьгиськиз.

Клуб котырын тачак калык, адямиос котмыса урамын сыло, тамак кыско, ӟабыльто, пырало-потало. Клубысь тыл пиштэ — пушказ мар ке но осконтэмез лэсьтӥське! Нош кытын меда егит артист, Марк? Кырӟаны потаз ни шат? Лада дыртӥт-вуттӥт ӝокыт юрт пушкы зымиз.

Клубын тымиськемын, калык гужгетэ но шумпотэ. Кудӟем, мынясь гурт воргоронъёс шораз мальдо, татын ик Ижысь вуэм блоггеръёс — огез перепеч сие, мукетыз хот-дог куша. Сэргын кин ке ноутбуказ мертчемын, техникъёс трансляциез радъяло, палэнынгес котмем ӟольгыри кадь нылашъёс ӟабыльто но серекъяло. Доразы Чинзано утыр тэтчиз — ӵош ужась эшъёсыз, вылды.

Мар веранэз, йырысеныз пыдозяз удмурт дӥсе дӥсям нылэз шифонэ но чибинь бурд туникаосы шобырскем чеберайёсын уд ӵошаты. Ладалэн чыртыяз — секыт чыртывесь, соосызлэн — чильк-вальк бижутерия. Лампа тылъёс улын синэз висьыто.

Кытын Марк?.. Лада пумен тулкымъяське, сюлмыз тэтчыны дась. Актовой залысен песянай ымныръёслэсь йырыз ик берганы ӧдъяз кадь. Тани соос — брангурт клонъёс! Кӧня бабуш, кӧня дедуш, кӧня огшоры, лачмыт гурт калык! Малы соосты ваньзэсты уг луы вал Бакуе ӵошатсконэ келяны? Быдэс гуртэн? Кытын нош Марк?!

— Брангурт песянайёс сцена вылэ потозы 14-тӥ номерен! — кеськиз, вань гульымзэ кесьыса, трансляциез нуись ӟуч нылаш. Пуконъёс вылын пукись калык интыысьтыз ик тэтчиз — киоссэс ӝутӥзы, шуланы кутскизы, омырын лобыштӥзы удмурт куншетъёс…

— Бабушкаос, ми тӥледын! — чузъяськиз вӧзаз ӟырдыт куара. Горд йырсиё студентка Лиза радиоысь журналистка вылэм. — Чырткем! Вуиды-а? Ми кышкамы ни, бере кылёды шуыса!

— Калыкмы туж кема бичаськиз. Шофёрмы но ӝожтӥське — городысь вуэм машинаос жаг мында, пе.

— Ой, кыӵе люр-ляр! Ми татын 6 часысен ини. Калык лӧптэмын, туж ӟеч пумитаз. Макем мон данъяськисько соосын! — Лиза Ладалы кизили песянайёсын флажок мычиз. Лада кагазэз учкытэк кырмиз, азьлань вамыштӥз.

— Маркез ӧд адӟылы-а?
— Мар ке… мар?
— Я, номыр но.

— Лада, привет! Ну, наконец-то! Ку-о тӥ выступать карыны дась? — утыр кырмиз сое трансляциез удмурт кылын нуись Стёпа.
— Чырткем! Мон — котьку.
— Кылемъёсыз но тубо, лэся. Классно! Сцена сьӧрын гримёрка, отчы мынэ! Таиз номер бере тӥ потӥськоды, собере Марк. Не тормозите!
— Марк татын?
— Сцена сьӧрын пуке.

Лада пыдзэ ик ӧз шӧды ни — диджейёс вӧзтӥ гылӟиз но, туфлиеныз пу сцена вылтӥ коккетыса, висъетэ тубиз.

Марк сьӧрлось залын огназ, гитаралэсь сиоссэ золъяса, пуке вылэм.
— Ӟечбур! Тон но татын? — паймыса кадь пальыштӥз Лада.
— Умой. Татын, о-о.
— Ку нош вуиды?
— Журналистъёс вайизы, ӟуч редакциысь.
— Синучкон вань-а?
— Сэргын.
— Кыӵе редакциысь?
— Корпоративазы кырӟай вал.

Лада ӝужыт синучкон доры вамыштӥз, дукессэ бирдыяз. Синучконысь Марк шоры лушкем уӵыръяз: мар меда соид малпаське? Ӝужыт, сьӧдкысъем лусьтро пияш, шортыез кузь, вольыт, быгыто пыдъёссэ усьто, пеляз кортэн нуйтэм пасез вань. Пичи чиньыен со пасе пырысал… Тунсыко.

— Кыӵе ӝокыт татын! Марк, туннэ мае кырӟалод?
— Диджейёсын ӵош эктоно кадьзэ дасям вал. Номыр тунсыкоез ӧвӧл.
— Кыӵе усто! Брангурт песянайёс пересесь ини, нош удмурт культураез егитъёс ӝутыны кулэ. Тон — ӟечок.
— Кинлы со кулэ…
Ӧс усьтӥськиз но, залэ артистъёс питыразы. Висъет соку ик тымиськиз… Марк гитаразэ кутӥз но кыре потӥз.

* * *
— Калыкез трос люкаськоз, не ссы.
— Нош музеязы кинэз ке луиз ке?
— Уз луы отын нокин но, ваньзы трансляциез учкозы.
— Мар ке кышкасько ик мон.
— Ачим ваньзэ каро, тон сак гинэ ул.
— Трос-а уксё сётозы тыныд со вуж баракла понна?
— Нош тон тодӥськод-а, одӥг мониста кӧня манет сылэ? Кызь сюрс пала! Антиквар лавкаын сое урмыса басьтозы. Лошок кадь эн выры.
— Ну и мар? Малпаськод, азвесьёссы лач-лач сандыкъёсазы тыремын, милемыз возьмаса кыллё? Сьӧразы кутӥзы, дыр!
— Уз кутэ. Границаетӥ поттэмзы уз луы. Выронэз укыр трос. Бабушкаосыд пересесь, монистаос секытэсь. Муляжъёсын мынӥзы соос…

* * *
— Кыӵе мон акыльтӥ та пересьёслэсь! Котькытын песянайёс! Номыр но рос-просэз, егитэз, кужмоез ӧвӧл. Куасьмем силёос — телевидениын, театрын, газетын. Удмуртэз — котьку вуж, пересь.
— Ну тон верад, Тома! Коть шыпытгес-а, мар-а астэ возь. Брангурт бабушкаос удмуртлыкмес быдэс дуннелы презентовать каризы ук! Мар ке уг валаськы мон тонэ. Шимес выриськод. Вай ай горд помададэ.
— Басьты, косметичкаын. А мар? Света, зэм верасько мон. Малпаськы ай, удмуртлыкен кин выре? Школьникъёс но пенсионеръёс. Дееспособной калыклэн дырыз ӧвӧл вырыны соин.
— Ма тани, ми выриськом ук.
— Ми артистъёс. Таиз мукет.
— Потоно ни, нылъёс!
— Мае эктӥськом?
— «Можгинский».

Ансамбльысь питырес нылкышноос сцена пала вырӟизы. Лада но соосын ӵош тубиз. Ачиз со «Азвесь дауре» толэзь пала гинэ ветлэ ай, эктонъёсты ӧз на дышеты. Туннэ Ладаез кырӟато. Аслаз гуртысьтыз ик бичам репертуарзэ быдэстоз.
— Тӥ понна эктэ Ижкарысь «Азвесь даур» ансамбль. Пумиталэ!

Экранъёсысь Кипр кырӟасез кысӥзы. Жингыртӥзы улэп арганъёс.

* * *
Бӧрысь ӧтёзы шуыса тодэмез бере Ладалэн мылкыдыз пуксиз. Бен, укыр егит ай со азвесь даурзэ пумитаны… Уй омырен шоканы потӥз. Клуб котыр котырскыса, мукет ӧс-липет дорозь вуиз: татын Брангурт музей шуыса пул ошемын. Ӧс борды пыкъяськыса, синзэ кыниз гинэ, ӵаштыртэмез кылӥз. Пеймытысь Чинзано кылдӥз. Культура юрт сьӧрын одӥг гинэ туалет вань — куакъёс пӧлы ватскем пулэсь киоск порма. Отысь лыктэ вылэм. Сэргы пушнер пӧлы ватэм горд винаен бутылказэ кыскиз.
— Лада, чебере, вина юод-а?
— Уг. Мыным сотэк но умой.
— Нош зор уз быры, шуо. Учкы ай, ведраысь кадь кисьтэ. Кынмод.
— Кынми ке, пыро.
— Ну и мар, малпаськод, бабушкаос вормозы-а?
— Вормозы!
— Вормизы ке, кыӵе инты басьтозы, хи-хи?
— Нырысетӥ!
— Ноку но уз басьтэ соос. Россилы «Евровидение» кулэ ӧвӧл. Ӝоген тани Сочиын Олимпиада. Коньдон жильдон муг сюроз.
— Со чик но озьы ӧвӧл!
— Эх, наивной мусочике. Ме, винаен гылты куректондэ.

Лада ачиз но ӧз вала, малы гучык лэсьтӥз. Чинзано укыр крутойяське, сое гуртысь шузи нылок кожа, лэся. Ладалэн вожез потӥз. Шуак вазиз:
— А давай на спор? Мон шуисько, вормозы, тон шуиськод — уз.
— Ма ойдо. Тон ке вормид, бордад ноку уг ёры ни, мон ке ворми — тон монэ чупалод, а? Мон шуисько, соос уз ворме. Ну, оло, куатетӥ инты басьтозы…
— Мон ке ворми, кинэ косо, сое ик чупалод. Вераським-а?
— Хм. Нош картэз вань ке?
— Кин шуиз, со ныл луоз шуыса?
— Я, эн шузияськы, пичи на тон.
— Нош мынам пияше вань ке?
— Вань ке но, татын ӧвӧл ук.
— Кытысь тодӥськод…

Залысен нуисьлэн куараез гудыртӥз:
— Нош али сцена вылэ потэ удмурт егит кырӟась, эстрадалэн выль кизилиез, Брангуртъёс понна вань сюлмыныз висись Марк Кононов!
— Ой, мон пыри учкыны! — кеськиз Лада но шупчиз…

* * *
— Милям Ӟиллёямы Троицае шай вылэ быдэс гуртэн люкасько ке, оломар луисько! Йырсизы югыт, куро кадь, синъёссы бездыт… Эшшо ик, ветло шайгуос дортӥ, номыр уг адӟо — кудӟыса усьыло… «Ойдолэ ми доры, ми доры ойдолэ!» Чрезмерное удмуртское гостеприимство мне не нравится.

— Тамара! Ну тон ӟукыртӥськод туннэ… Вай-ай мыным зыретэз.
— Тӥ сиське, сиське! — таза куараен кузёяськиз куно пумитан висъетын культура юртлэн кивалтӥсез. — Тӥ понна ӝӧк пуктӥмы. Кин сиёз на? Городысь журналистъёс-а, мар-а? Артистъёсмес куноятомы!
— Ку-о бабушкаос выступать каро ни?
— Дас ньылетӥ номерен.
— Али нош кин?
— Али Албания кырӟа…
— Учите албанский! — палэнысь кылӥськиз гольтрес реплика. Сэргын блоггеръёс кемалась виски ӟузьыло ни. «Векчи бурдъёс» но соос палан, кынмиллям, лэся.
— Ма, вай ай-ко мон та нылъёсты дӥсяло! Воксё ведь городскойёс, номыре но уг валало… — та кылъёсын клуб кузё гримёркае шонтӥз.
— Марк, понод-а мыным вина? — ӝӧк сэргы интыяськемез бере возьдаськысагес куриз Лада.

Марк, бутербродзэ палэнтыса, вина коробка доры сузьтӥськиз:
— Тыныд гордзэ яке тӧдьызэ?
— Гордзэ. Тон уд юиськы шат?
— Мон сыӵе жумми ни татын… Ӝоггес бертоно вал.
— Мон но жади. Пӧсь ӧвӧл ке но, туж ӝокыт. Шоканы кыре поталом-а?
— Оло, ӧжыт бергес.

Ӟуч журналистъёс пӧлысь ӝужыт, сьӧд йырсиё нылаш Марклы кеськиз:
— Марк! Пойдём к нам! У нас есть виски! Редакция угощает.

Марк мыньпотӥз, соглаш кариськыса, йырыныз шонтӥз, бутербродзэ куртчиз.
— Мон татчы уг кыльы ни, туж зын, — вазиз Лада, урод учкиз нылаш пала но зурак берытскиз — дэрем сӧзулэз гинэ чилектӥз.

* * *
— Бурановские бабушки выступят уже через один номер! Все мы болеем за бабушек, не так ли? Вы готовы? Да! — кылӥськиз клуб ӧс сьӧрысь. Нуись нылаш асэныз ачиз вераське, кожалод.

Ладалы кырын но не то пӧсь, не то кезьыт потэ. Клуб сьӧрын нокин ӧвӧл. Жаль-жаль зоре. Музейлэн ӧсэз дорысь липет улэ ватсконо ке шат: отын ышыгын шыпыт, калыкез но ӧвӧл. Мылкыдыз буйгалоз, оло.

Малы меда Марк сое уг яраты? Оло, со номыре но сыӵезэ — «традиционнойзэ» — уг яраты? Соку Лада куштыны дась та секыт чигвесьёссэ-поскесъёссэ, кышетъёссэ но кесясал! Туалаез кыске, дыр, Маркез: вай-фай, ноу-хау, бум-бум… Пати фор эврибади дэнс! Камон энд дэнс! Бум-бум!..

Ладалэн тодаз лыктӥз, дукес кисыяз тамакез вань шуыса. Ансамбльысьтызы Тамара возьыны сётӥз — эктыны дукестэк потазы. Малы меда адямиос кыско? Мылкыдэз капчиятэ шат со? Озьы медло. Нош кенжытонэз но ӧвӧл…

Зор улын кин ке дораз дыртӥсь адскиз. Ма, Марк, лэся!
— Лада, отын бабушкаос кырӟало ни. Мар татын кариськод, ваньзы залын ук?
— Уг поты чик но учкеме. Зажигалкаед вань-а?
— Вань… — Марк абдраз, лэся. Ярам, озьы ик кулэ.

Лада тамаксэ кенжытӥз. Пеймытын пичи тыл ӝуатскиз. Азвесь зундэсэн чеберъям чиньыосыз вискын дырекъя. Липетысь секыт шапыкъёс усьыло.
— Мын, песянайёсыд шоры учкы, — вазиз нылмурт мылкыдтэк.
— Уг поты мынам… пересьёсты учкеме. Мон егитсэ, чеберзэ учко.

Кыӵе ке валантэм шыпыт луиз. Зор но дугдӥз кадь. Лада Марк шоры учкиз, дыртытэк тамак пумзэ поттӥз, солы мычиз:
— Уг кыскиськы ук мон. Потэ ке, кыскы.
— Тодӥськод-а, мынам али йыры бергаз кадь та суредлэсь, — вазиз каллен пияш. — Пеймыт уй, удмурт дӥсен нылаш — но тамак.

Таос ог-огзылы туж уг тупало. Сыӵе йӧспӧртэм.
Марк тамаксэ ӧз куты. Ладалэн пушказ ваньмыз тымиськиз кадь. Одӥг тамаклэсь шуак кудзӥз кадь.
— Кыӵе шузи… Кыӵе шузи тон. Вылтусъя гинэ учкиськод. Вай кидэ!

Лада Марклэсь кизэ кырмиз но секыт азвесь мониста улэ шуак донгиз, пӧсям ненег гадьыз борды ӝиптӥз. Отын, удмурт дэремлэн пужъятэм кыретэз улын, жуммыса дырекъяз егит мугорыз. Марклэн киыз шуак лябӟиз. Лада тамаксэ ым дураз вуттӥз но пушказ мур кыскиз йырез поромытӥсь ӵынэз. Собере, лулӟыса кадь, Марклэн ымныраз бус-ӵынэз шокчиз…
— Тон иса чиньыеныд — лайкра майкаме шӧдӥськод-а? Тани. Нош таиз логотип — резиналэсь лякем Lacoste. Тани со. Сыӵе ик мон, мукетъёсыз кадь. Туала.

Лада ӟеч тодӥз — тузӥ логотип интыяськемын ӵапак нонокез вылын… Та малпан золгес бичатӥз сое.
— Логотипез… шӧдӥсько, — вазиз Марк, чиньыез ненег гылӟиз ноны бирдызэ эркияны…

Лада шуак валаз — Марклэн ненег но кужмо ымдурыз сое чупаны матэктэ.
— Йоп-помать! — шуак кылӥськиз корка сэргысь. Кытысь-марысь кык пиосмурт кылдӥз. Арлыдзыя но, туссыя но валантэмесь.

Йӧноезгес кема малпаськемез бере вазиз:
— Прикурить не найдётся?

Лада ачиз но ӧз шӧды соос пала вакчи кылем тамак пумзэ мычемзэ. Воргоронъёс кенжытӥзы.
— Почему «Евровидение» не смотрим? — юаз лапегез.
— Не обращайте внимания, приятного вечера! — чурыт вазиз кыкетӥез. Кыкназы ик шыпыт кошкизы.

Марклэн киыз каллен гинэ мониста зӥбет улысь потыны вырӟиз. Лада сое ӧз возьы ни.
— Отын бабушкаос кырӟало, ойдо учком.
Кыкназы ик каллен вырӟизы. Зор шлачкетъяз на — соос ӧз дыртэ.
— Кинъёс со вал меда?
— Сторожъёс, дыр, кыӵе ке.

* * *
— Бабушки молодцы! Ба-буш-ки! Ба-буш-ки!
Лада валаз, песянайёс Баку сцена вылэ туж усто потазы шуыса. Экранын акылес макесо кыӵе ке нылокъёс кылдӥзы.
— Лада, кырӟалод-а? — кырмиз сое китӥз Стёпа.

Васьки, васьки урам кузя
Гын колоша пӧськытӥ…
Напырасно мон васькиськем
Чын последной пи понна…

Кошкись вуэ кошкисько вал
Кикур пасьта бӧз понна.
Пинал йырме быдтӥсько вал
Ӵуж йырсиё пи понна…

Залын шыпыт луиз, ваньзы трансэ усизы, кожалод. Песянаезлэсь кылэм кырӟан котьку сямен ик сыӵе мылкыдэ вуттэ.

Шулдыр ӧвӧл со, мар веранэз. Нош мар шулдырез, зэм но? Тани Брангуртэз быдэс дунне тодоз, нош мукет удмурт гуртъёс кызьы ке куашкамын вал, озьы ик кылёзы… «Зарни шедьтон дыръёсмы но, азвесь шедьтон дыръёсмы, учкиськоды ке, али учке, али сяська дыръёсмы…»

Куно пумитан сэргы пыремез бере Лада адӟиз: Марк ӟуч нылашъёс котырын берга. Шонерзэ вераса, нылъёс бергало — эктэмъясько, нош Марк, кияз ӵужалэс юонэн тырмем чаркаез бергатыса, соос шоры учке но серекъя. «Нош мон, со кырӟаку, кыӵе эктӥ, кыӵе эктӥ! Мед гинэ адӟоз шуыса… Со нош монэ ӧз но кылзы!»
— Лымы тэди, лымы тэди… — векчи куараен нёръяло удмурт зыбынъёсын шобыртэм нылокъёс. Клуб кивалтӥсь соосты дӥсям ни. Кыӵе ке кӧйгес журналист ваньзэсты айпадэн туспуктэ. Марк ӟыгыртэ нылокъёсты — ваньзы ӵош, гор-гор серекъяса, камера азе бекырско.

Лымы тӧдьы, леди
Сегодня меня встретит.
Эсьмаса, пойду погуляю,
Мон тонэ совсем не знаю.
Туж возьдаськисько,
Юало: и чо?
Мон совсем удмурт,
А ты красивая тут…
Ты совсем уже дась,
Я должен сказать: да.
Но мон верало: уг.
Потому что я УГ.

Лада егит поэтлэсь Богдан Анфиногеновлэсь кылбурзэ тодаз вайиз. Та дэремез куштоно, али ик! Сьӧраз сарафан кутӥз вал. Котмиз ке, мед котмоз. Соку сое но, городысь айпад-нылокъёсты сямен, шобыртозы пасё-пасё зыбынэ, но кыӵе ке кудӟем мурт соку ик твиттере поттон вылысь фото пуктылоз. Собере федерал газетъёс гожтозы: нош тазьы пусъё брангуртъёслэсь вормемзэс гуртооссы. Фотография быдэс Интернет вотэсэз котыртоз но Ладаез дунне кизили кароз. Соку Марк солы синмаськоз.

— Лада, тыриськид ни-а? Автобусмы кошкыны дасяське.
— Кызьы?! Ми йылпумъянъёсты но ум возьмалэ? Нырысетӥ интыез тодытэк кылём?
— Ма, соос, час-кык ортчыса, тодмо луозы ай. Куара сётон да мар. Артистъёс жадизы ни. Дорын тодод ай!
— Кин ке нош кыле на-а?
— Журналистъёс кылё, пе.
Чинзаноез шедьтоно, чилектӥз малпан. Чинзано сое уз кельты…

* * *
— Обломчик.
— Нушы! Кулэ вал-а юаны, марлы соос «Евровидениез» уг учко?
— Нош мар соос отын костасько?!
— Мар егитъёс каро уйин пеймыт сэргын?
— Люкетӥм, ха-ха.
— Асьмемыз гинэ медаз кырме табере. Свидетельёс вань.
— Оло, план «б»? Тылпу поттоно?
— Таиз укыр… Урамын зоре. Ӵын сяна уз луы.
— Куара сётон дыръя пыралом. Усьтон тупаны кулэ.

* * *
— Марк, келя монэ туалетозь! Мон кышкасько… Урамын мужикъёс трос, — пыдлось куаразэ поттыса бурсӥз вискиен шупам ымдуро нылок.
— Ася, каллен-каллен, вай кидэ! — Марк редакциысь нылашез кускытӥз кутӥз но потон доры люкаськем калык пыр азбаре поттӥз.
— Нош кызьы луоз удмурт сямен «бабушки, вперед!»?
— Песянайёс, азьлань.
— Песя-най-ёс, азьла-а-ань!

Клуб азе люкаськем воргоронъёс пумитаз гурак вазизы, лӧпкытскизы.
— Адӟиськод-а, кыӵе татын дикой калык… Соослэн ваньзылэн монэ туемзы потэ. Ужас.
Марк нылашез сьӧрос доры вайиз, соиз синзэ питырес кариз:
— Та-а туалет? Малы президент татчы выль туалет пуктыны указ ӧз гожты? Кызьы мон отчы пыро-о?

Ася шонаськыса тубиз но пу ӧс сьӧры ышиз.
— Тӥ маин бертӥськоды? — вазись луиз Марклэн тыбыр сьӧрысьтыз. Лада, векчи сарафанэн, котмемын.
— Мон… редакциосын.
— Мыным бертыны нокинэн.
— Аппаратураез нуисьёслэн интызы луоз, дыр.
— Валамон. Валамон… — Лада берытскиз.
— Сыл! — Марк сое китӥз кырмиз. — Кынмод… Эн ветлы гольык.
— Мед. Кынмеме но кулэме потэ. Мон аппаратура пӧлын гинэ бертыны ярасько.

Лада сэргы кот турын вылэ пуксиз, отын ик винаен бутылкаез сылэ на вылэм. Чик но кезьыт ӧвӧл. Татын пукоз.

Ася кыре Марк азе потӥз. Кылемез уйвӧтын кадь вал: солярий бере пеймыт луэм киосыз пияшез кыйёс кадь эгесазы но мугорзэ бордаз ӝиптӥзы. Лада кизэ бутылка доры сузьтӥз, утыр пушнераськиз — синкылиосыз пазьгиськизы. Ася но Марк дуннеез вунэтӥзы кадь — ӟыгыръяськыса сыло. Кияз бутылкаен Лада кот турын нёпоысь султӥз но фонарен югдытэм азбар пала вамыштӥз. Пумитаз кыӵе ке тордэм пиёк сюриз:
— Мон тонэ яратӥсько.
— Пшол!
Сьӧраз чузъяськиз паймем куара:
— Мар?!
— Мын, со пияшез тышка, — бурсӥз Лада, шораз учкытэк.
— Кинэ? Кинэ тышкано? Щас…

«Кытчы меда пегӟоно? Сомында тылъёс, адямиос…»
— Лада, красавица, тон мар тазьы ветлӥськод? — азяз кылдӥз палдыны валасьтэм Чинзано. — Нош кытын удмурт дресс-код? Кияд мар? Ви-на?
— Эн ёры.
— Чаль ай, ӟыгырто. Дасяло тонэ чупаськыны… Ӝоген тани результатъёсты тодомы.
— Соос вормозы!
— Уз.
— Вормозы! Вань удмуртъёс понна соос вормизы ини.
— Ноку но уз ворме соос. Кемалась вормиз ни глобализация. Тон но, детка, удмурт дэремдэ кылид.
— Ах тон… — Лада Чинзаноез гадяз мыжгиз куаш-куаш.
— Тон мар мыжгаськиськод, дура!
— Му мед ньылоз тонэ. Со потребительской отношениеныд ӵош!
— Мар вотянка кадь выриськод!
— Мар вера-ад?! — тордэм пиёк возьмаса гинэ улӥз кадь: кытысь-марысь доразы тэтчиз но журналистэз кот турын вылэ погыртӥз. — Тани тыныд, шуйно! — Чинзанолы сач! пель дораз вуттӥз.
— Дугдэ! Дугдэ! — кеськыса вуттӥз Лада.

Со вакытэ доразы бызьыса вуизы мукет гуртоос но журналистъёс. Ася но, Маркез донгыса, жугиськон интые ширтӥз. Кудӟемез ик ортчиз, лэся, утыр айфонзэ поттӥз. Кӧня ке гурт пиос мыжгаськись эшсэс Чинзано бордысь ишкалтӥзы, соиз нош, муз вылысь султӥз гинэ, пунэмамзэ берыктон вылысь пиёк вылэ омырскиз.

— Денис, дугды! — кеськиз Ася но кырмиськиз Чинзанолэн киыз борды. Соизлы соку ик ангесаз мыжыкен сюриз.
— Тонэн ваньмыз умой-а? Тонэ нокин вӧсь ӧз кары? Лада? — нылмурт соку ик ӧз вала, кин сое ненег ӟыгыртӥз. Ӝужыт шуныт мугор уродэзлэсь но кырсезлэсь палэнтӥз кадь. Марк, курткаеныз шобыртыса, бордаз ӝиптэ вылэм.
— Монэн… умой ваньмыз, — шокан пась шедьтытэк, вазиз Лада.
— Пичие, тон воксё жадид но кынмид ни ук. Ойдо пыром.

Жугиськисьёс вӧзтӥ ортчыкузы, Лада но Марк синйылтӥзы: одӥгез блоггер ваньзэ камерае гожъя.
— Тадэ али ик кыс, яке ымныр посудаяд ляко! — урмиз огез мыжгаськись бугай.
— Уг быгатӥськы, мон журналист ук, — серектӥз репортёр.
— Горячая точка, — лӧптыса кеськиз тамак пурккетӥсь мукетыз кар куно.
— Пиос, уг валало таосыд. Дышетоно луоз.

Гурт пиос омырскизы городысь вуэмъёс вылэ. Асялэн айфонэз дэрие пезьдӥз. Чинзано жоб кылъёсын бугай вылэ тэтчиз. Блоггеръёс клуб пала чигнаны ӧдъязы. Бызьыса вуиз охрана… Клубен кивалтӥсь урмыса киыныз шона. Брангурт пиос ӧвӧл, пе, та. Ваньмыз сураськиз одӥг сильзор нёпое.

***
— Финляндия куара сётэ… 8 балл! — гудыртӥз Стёпа, экранысь голосованиез комментировать карыса.
— У-у-у! — шултӥз зал.
— Та жугиськон сярысь одӥг сми но медаз поттылы… — шыпыртӥзы журналистъёс пӧлын. Чинзаноез пыртӥзы куно пумитан висъетэ.
— Шедьтэ айфонме, со отын — туалет палан костаське! Шедьтэ айфонме! — нукыртэ Ася. «Лымы тӧдьы ледиос» шулдыр туссэс ыштӥллям, чус пуко.

Марк Ладаез артистъёслэн висъетазы нуиз.
— Тыныд куасьмоно, куасьмоно, валаськод-а?
— Кытчы ми мынӥськом?
— Татын эшшо одӥг ӧс вань — музеязы пырон со.
— Со ӵогамын ук.
— Так гинэ замок понэмын. Удмурт гуртъёсын котьку озьы.

Ладалэн серемез потӥз. Кыӵе ке клипын кадь, ваньмыз вылтӥ лобыштыса, соос выль, тодмотэм, буш интые сюризы отын, кытын соос сяна, нокин ӧвӧл. Брангурт песянайёслэн вашкала ауразы гинэ. Тузон зын. Борддор сьӧрысь трансляция куараос гудыръяло. Эстония сётэ сомында куара… Ирландия сётэ тамында куара. Та-ра-ра, тра-ла-ла.

— Кызьы малпаськод, бабушкаос вормозы-а? — юаз Лада, Марк сое огез вылэ мукетыз лачак тырем ӵушконъёс но шобретъёс вылэ чырмыт интыямез бере.
— Одно ик вормозы! Мон соос понна туж висисько.
— Кыӵе тон кот…
— Кыӵе нош тон шуныт… Мон малпасько, соос кемалась ини вормисьёс. Соос вормизы ми понна — мед ми вуоноез понна сюлмаськом.
— Эх, кыӵе тон, Лада, наивной… Кыӵе мусо но серемес та веранъёсыныд. Со понна ик тонэ… дышетэм потэ.

Марк мур шокчиз но Ладалэн ымдураз васькиз. Нылмурт синзэ кыниз. «Кыӵе умой… Со мынам гинэ. Мынам… Коӵышед но шумпотэ но, пуныед но шумпотэ. Мылы-кыды капчия но шумпотонэн пачылме».

Сюлэмыз йыг-йыг вазьыса, Лада шӧдӥз, кызьы Марк солэсь сучыр котмем сарафанзэ кыле. Шат со али сое гольык кельтоз? Шат со татын ик…

Ӵапак та вакытэ вадьсысьтызы кыкетӥ ӧсын ӵаштыртэм кылӥськиз. Ӧс усьтӥськиз но, музее пыризы кык воргоронъёс.
— Пома-а-ать… — шултӥз лапегез «сторож».
— Опять таосыд! — шулӟектӥз мукетыз.
— Мар тӥледлы кулэ? — куалектӥз Марк но, Ладаез сайяса, тэтчиз.
— Да номыр но, — вазиз ӝужытэз куно, лапегзэ берен ӧс доры валтӥз.
— Нош тон мар татын музей добра вылын кыллиськод? — ваменскыса пурӟиз пичиез. — Тон мар, вандал-а, мар-а? Пшол татысь!
— Дугды! Я, дугды, — итӥськиз кыкетӥез. — Молодые люди, это территория музея, здесь находиться нельзя.
— Опять прогоните нас смотреть «Евровидение»? — вазиз пумитаз Марк. — Вы вообще кто такие? Работники музея? Что-то не похоже!
— Проветриваем помещение. Понял?
— Ур-ра!!! Кылӥды-а?! Вормизы! — кеськиз шуак Лада. — Бурановской бабушкаос вормизы! Вор-ми-зы!

Борддор сьӧрын бомба пуштӥз, кожалод: вань калык куаразэ поттӥз, диджейёс дымбыр-йыг крезьгур ӝуатӥзы, нуисьёс бӧтьырто: «Брангурт песянайёс — нырысетӥ интыын!» Лада Марклэн чыртыяз кечырскиз, собере шуак воргоронъёс доры тэтчиз но кеськиз:
— Вормизы, валаськоды-а? Табере «Евровидение» Бурановоын луоз!
— Ур-ра! — ӧжытак театрально кунултӥз ӝужытэз воргорон пичизэ. — Ур-ра!
— Ур-ра! Вормизы! — бере ӧз кыльы лапег эшез. — Вае тӥледыз чупало.
— Ми-и вормисьёс луим, эше! We are the champions, my friend… — нёръяны ӧдъяз Лада. — Кызьы тӥляд нимды?
— Саша.
— Мон но Саша.
— Ми вормим, Сашаос! Асьмеос ваньмы вормим!

Марк шузимем синмын Лада шоры, воргоронъёс шоры долказ. Сэргысь ӵог вылысь айшетэн дэремез кыскиз но нылашлы куштӥз:
— Ме, кот дӥсьтэ вошты.
Собере берытскиз но гримерка пала вамыштиз.
— Марк, тон кытчы? — ляб куараен нёртиз Лада. Дэремез берен џоге ошыса, сьќраз бызиз.
— Уж борды! — чурыт шуиз бадӟымез Саша, Лада ӧс сьӧры ышем бере.
— Сандык! — возьматӥз кыкетӥез.
Сэргысь бадӟым сандыкез ури-бери усьтӥзы. Кулэ ӧз луы нокыӵе усьтон но — ворсэтсэ корт бодыен чигтӥзы.
Сандыкын — ӵушконъёс, ӵушконъёс, ӵушконъёс… Пужъятӥз Пугачёва, Байсарова, Конева… Одӥг монистаез но ӧвӧл. Чал-чал буш.
— Шайтан мед басьтоз таосты! Ваньмыз юнме.
— Тьфу.

***
«Беспрецендентная победа: Бурановские бабушки заняли первое место. Село Бураново ликует!» — чоръяз Брангурт инфо-центр. Твиттерын выльёсыз иворъёс мычиськизы ни: «Брангуртысь гопник тодмо репортёрез погмаз», «Вормон понна нюръяськон: кызьы тышкало куноос вуэмъёсты» но со выллем.

— Кошконо ини татысь, бертоно, — вазиз сазёмем Ася, сӥям перепеч куртчыса. Вӧзаз ӝӧк вылын тэшкам айфон кылле. Лызэктэм синмо Чинзано йырыныз шонтӥз, жальмыт учкиз Лада шоры.
— Чуп карон приздэ келяд, — вераз Лада. — Табере чупалод сое, кинэ мон косо.
— Уг поты ни чупаськеме… — нукыртӥз Чинзано. — Йыр тэшка…
— Асяез.
— Монэ? Кулэ ӧвӧл монэ чупаны, мон шедьто ачим, — гор-гор серектӥз Ася.
— Вераськимы — чупа.
— Придётся, — шокчиз Чинзано. Вождэс эн вае, дорогая! но Асялэн перепечо ымдураз лякиськиз.
Пӧсь кофеен пырем Марк интыяз ик сылмиз.
— Марк, тон милемын бер-тод-а? — номыр луымтэ кадь юаз Ася.
— Уг…
— Уд ке уд. Чинзано, одӥг интымы вань, иське, — мыняз Ася.

Марк кыре потӥз. Зор быриз. Ӟардон палан льӧлектӥз. Клуб котырын кӧня ке машинаос сыло на. Соос пӧлын Лизаен Стёпа.
— Стёпа, монэ кутоды-а? — ӝожмыт юаз Марк.
— Кутом, конечно! Лада куриз тыныд но инты кельтыны. Со ӧз вера шат?
— Вераз… Юай гинэ, оло, вунэтӥды.
«Лада… — мыняз Марк. — Мусо нылаш. Малы сое азьлогес ӧй синйылты? Мыным инты кельтэм… Малы сокем сюлмаськиз? Кельшисько, лэся, солы? Оло, туннэ дорам ӧтёно?»

Машина доры матэктӥз Лада: кияз сумкаез, удмурт дэремез, сарафанзэ берен дӥсям. Мускыт на, шӧдске, мугорыз, синэз бичатыса, сарафан пыртӥз адске… Лиза руль сьӧры пуксиз, нырулӥсь Стёпаез сайкатӥз:
— Лада, Марк, пуксе ни! Вырӟомы, югыт луэ.

Марк Ладалэсь котыръёссэ багажнике понӥз. Собере синмаз учкиз но вераз:
— Лада, мыным Зинаме ваёно на…
— Кыӵе Зина? — ӧз чида черетскытэк Лада. Пыдаз зырен шуккизы кадь.
— Мон ӝог гинэ. Возьмалэ!

Иське, ваньмыз юнме? Быдэсыз та шумпотонэн но сюлмаськемен зуркатэм уй — мылес, юнме быдтэм дыр? Юнме вормизы Брангурт песянайёс? Юнме куанӥз вань калык? Юнме жингыразы чигвесьёс? Юнме лобазы куншетъёс? Юнме? Юнме… Кыӵе ке Зина ваньзэ ӧвӧлтэм кариз!

— Ойдо, кошком, Лизӥ, — мылкыдтэм вазиз Лада, машинае пуксьыса.
— Кошком? Нош Марк? Сое ум возьмалэ ни?
— Со кыӵе ке нылаш доры кошкиз.
— Вот сволочь!
— Зинаез, пе, ваёно.
— Ма… тазьы умой ӧвӧл ук кошкыны, Лада.
— Мон нокыӵе но Зинаен ӵошен уг мыны. Уг мыны!
— Я, я, буйгатскы! Тӥни ук Маркед лыктэ ни.

Марк кузь вамышъёсын багажник доры вуиз, отчы чехолэн гитаразэ понӥз. Лада машинаысь потӥз:
— Яке мон, яке Зина. Кин ке но одӥгез, валад-а?
— Мар тон, Лада… — паймыса вазиз Марк. — Зина — со мынам гитарае ук!

Ладалэн сюлмыз соку ик лопырскиз кадь, ымдураз сайкыт пальпотон пушйиз. Ӧз возьы серекъямзэ.
— Тон гинэ, Лада, — шокчиз Марк.

Ӟыгыртыса, каньылак пыртӥз сое машинае. Чиньыосыз макес вылтӥз гылӟизы но, юн кырмыса, бордаз ӝиптӥзы.

Автомобиль вырӟиз. Ваньмыз интыяз пуксиз кадь. Уй ортчиз — солы пумит инвис сьӧрысь востэмак ӝуатскизы нырысетӥ шунды тылсиос. Лада Марклэн алвылаз умме усиз. Ум пыр шӧдӥз, кызьы пияшлэн кужмо киосыз шобыртӥзы гадьзэ. Шобыртӥзы но ненег гинэ маялляло… Ум йылтӥз Лада малпаз: «Монистае луысал ке, такем возьыттэм ӧй исасал… Ярам, туж умой. Умой, ӧвӧл ни шуыса».

Дарали Лели

Удмурт Дунне
By Удмурт Дунне Декабрь 21, 2012 13:07