Кыйлы — шыр

Удмурт Дунне
By Удмурт Дунне Декабрь 5, 2012 14:00

Кыйлы — шыр

Шырпиос

Та вакытэ ӵапак дырыз Выль ар сярысь сюлмаськыны, ӝӧк вылэ пуктоно сиёнъёс сярысь малпаськыны.

Матэктӥсь ар — кыйлэн. Со яратэ кроликез, лудкечез сиыны. Выль ар ӝӧк вылэ та пӧйшуръёслэсь сӥльзэс пыжыса пуктоно, соку ар вӧй вылтӥ кадь ортчоз, котыр ласянь удалтоз, улон бусьтыргес луоз. Консерваосты кый уг гажа, солы парыса дасям пӧсь сиён кулэ. Сӥль вӧзы ватсано вож турынъёс.

Салатъёсты чеберъяны луоз кыйлэн вылтусыз выллем. Тросгес кутоно курегпуз. Лэсьтыны быгатоды губиен я чорыген омлет, эн вунэтэ кыйлэсь яратоно куртчонзэ — курегпузлэсь лэсьтэ шыр.

Асьтэды одӥг нунал ке но узыр шӧдэмды потэ ке, сьӧд яке горд мызь ӝӧк вылады пуктэ. Кыйёс туж бырйиськисесь, ческыт сиён вӧзы сюэз юзматӥсь юон но пуктыны эн вунэтэ.

Пыжем кролик
Кулэ: одӥг кролик, яблок уксус, лавр куар, пӧсьтурын, чеснок, укроп, петрушка, базилик, сельдерей, розмарин, гвоздика, корица яке лимон.
Кролик сӥльлэн шӧмыз аспӧртэмлыко. Небытгес но ческытгес карон вылысь юдэм кроликез нимысьтыз дасям маринадын 6-10 час возёно. Егит кроликез котыны луоз вуэ, йӧлэ. Сӥльлэн зыныз шӧдӥськыку, суретэ ватсано виналэсь яке яблоклэсь уксус (1 литр вулы 1 чечы пуньы уксус). Яке огшоры кезьыт вуын 1-2 уй пукетоно, ӵем вошъяса. Суретэ ватсано лавр куар, сугон, кӧжыен сьӧд пӧсьтурын, сылал, чеснок, петрушка, укроп, базилик, сельдерей, розмарин, гвоздика, корица яке лимон.
Суретын возем бере пыжыны яралоз ини. Пӧсь таба вылын сӥль юдэсъёслэсь кыкнапалзэ ик пырсатоно но, мур кастрюляе поныса, пичи тыл вылын час пала пӧзьтоно. Юдэсъёсын вандылэм сӥлез пыжыны малпады ке, нырысь ик сое йӧлэ веттылэ. Кролик сӥлез сиёно пӧсь дыръяз.

Кый
Кулэ: горбуша (1 консерва банка), пӧзьтыса дасям 2 курегпуз но 2 картошка, сыр, сылалтэм огреч, чеснок, сылал, майонез, вож турынъёс.
Консерваысь чорыгез небӟытоно, ватсано вуштон пыр поттэм курегпуз, картошка но сыр. Ваньзэ сураса тусьтые пононо, кый выллем карыса. Салат вылэз чеберъяно векчи юдэм огречен. Кыйлэн синмыз — оливки яке сьӧд пӧсьтурын, кылыз — ӵужкушман, котырзэ вож турынэн чеберъяно.

Апельсин юдэс
Кулэ: 300 грамм пӧзьтэм курег сӥль, 2 курегпуз, 3 пуньы кукуруза, 2-3 сылалтэм огреч, 200 грамм шампиньон яке мукет губи, 1 йыр сугон, 1-2 пӧзьтэм ӵужкушман, 70 грамм сыр, майонез.
Та салатэ апельсин уг кутӥськы ке но, солэн тусыз апельсин юдэслы кельше. Губиез но сугонэз, векчи юдыса, таба вылын ӧжытак пырсатоно. Курег сӥлез но курегпузэз юдоно, огречез но ӵужкушманэз бадӟым вуштон пыр поттоно. Нырысь ик тусьтые пононо курег сӥль, собере огреч, губи, кукуруза, курегпуз но ӵужкушман. Радъёс вискы майонез зырӟоно сетка выллем, нош ӵужкушман вылэ — шунды тылсиос кадь. Ӵапак со вылэ ик пононо векчи вуштон пыр поттэм сыр.
Пыжем яблок
Кулэ: 4 яблок, 60 грамм сакыр, 30 грамм шунтэм вӧй, 40 грамм пушмульы, сылал, 20 грамм пызь.
Улмоосты ӝыныё вандыса, шорзэ басьтоно. Небӟытэм мульыез пызен, сылалэн но вӧен суралтоно, улмоосы тыроно но пӧсь гуре пыжыны пуктоно. Таӵе улмоез тужгес но ярато нылпиос. Сое сиыны луоз йӧлвылэн яке мороженоен.

Шырпиос
Кулэ: 200 грамм крабовой палочки, 200 грамм чурыт сыр, 2 курегпуз, 3-4 пуньы майонез, чеснок, сьӧд пӧсьтурын, редис, вож турын.
Пӧзьтэм курегпузэз, сырез но крабовой палочкилэсь оглюкетсэ векчи вуштон пыр поттоно, чеснокез нельконо но ваньзэ, майонезэн сураса, ог 20 минутлы кезьыт азе пуктоно. Дась суретэз пичи колӟоослы люкылоно, векчи вуштон пыр поттэм крабовой палочки пӧлын погылляно но шыръёс лэсьтоно. Та куртчонлы синъёс луозы пӧсьтурын, пельёс — редиска, быжзэ вандоно крабовой палочкилэсь. Тусьты шоры сыр юдэс поныны луоз.

Глинтвейн
Кулэ: 1 ӟенелик горд вина, 6 гвоздика, 1 пуньы сакыр, ӝыны лимонлэн сокез, мускат мульы но корица.
Горд винаез, мискае кисьтыса, ӧжыт шунтоно. Вань специосыз отчы ватсаса, сурано. Вина быректыны кутскиз ке (пӧзьтыны уг яра), тыл вылысь басьтоно но ӵоксэтэн ворсано. Ог 10-15 минут пукетыса, глинтвейн юыны дась.

Валентина Емельянова

Удмурт Дунне
By Удмурт Дунне Декабрь 5, 2012 14:00