Песянайлы акыльтӥз анай

Удмурт Дунне
By Удмурт Дунне Ноябрь 14, 2012 12:57

Песянайлы акыльтӥз анай

Тужгес ческыт сиён — дорын пӧрамез

2-тӥ ноябре Брангурт песянайёс «Нырысетӥ канал» пыр пӧраськыны быгатэмзэс возьматӥзы. Н. Королёвалэн но анаезлэн «Время обедать» программаязы соос вожвылъяськизы Америкаысь шеф-поварен Бенджамин Ошерен.   

Передача час но ӧз кыстӥськы. Жюриын пукисьёс пӧраськемъёсты веръяса, вормисьёсты шараязы. Брангурт песянайёсмы Америкаысь куноез 17:7 лыдын вормизы.

Та передачае кырӟасьёсмы ньыль кузя ветлӥзы: Галина Конева, Зоя Дородова, Алевтина Бегишева но Наталья Пугачёва. Ӝӧк сьӧры султытӥзы Галина Николаевнаез.

— Тодмо артистлэн ӝытаз кырӟаммы бере телевидение кожимы, — веранзэ мытэ Галина Конева. — Эшъёсылы верасько, пӧраськыны уг яратӥськы, коридорын гинэ пуко. Шутэтскыны маза ӧз сётэ, телеведущийёс «Галина Конева варит суп» шуизы но, мылкыды куашказ. Ма карод, гур котырын бергано луиз. Эшъёсы но тэк ӧз пуке.

Телевизор учкисьёслэн, оло, верамзы потоз, Брангурт песянайёс олокытчы но вуо, шутэтско, нош тросэз-а тодо меда, кӧня курадӟыто соосты камераос азьын. «Время обедать» передачаез дасян бордын ӵукна 9 час но ӝыныысен ӝытазе 4 час котырозь жуммытӥллям. Сиськыны но шутэтскыны дыр 5 минутъёсын гинэ сётылӥллям. Лумбыт пӧсь гур сьӧрын сылыса, бергаса, пыдъёссы ик тӧрналлям.

— Пӧраськон пумысен йырмес трос ик ӧм тӥялэ, гуртын мар сииськомы, сое ик лэсьтћмы, — веранзэ азьланьтэ Галина Николаевна. — Огдышемъя кубистаен, курег сӥлен шыд пӧзьтӥмы. Гуртын улӥсьёс вашкала дырысен гур котырын трос ӧз бергалэ, бадӟым гуре чугун горшокен шыд пукто но асьсэос кыре пото. Доразы бертыкузылы сиёнзы дась ини. Ачим сярысь ке верано, гур котырын бергатозь, тӥрен, пуртэн, молотэн, саникен ужало, кортӵог шукко.
Жюриын пукисьёс удмуртъёслэсь вань сиёнзэс вылӥ дунъязы. Шыдзы понна 8 балл пуктӥзы, кокроклы — 6 балл, шу кисальзылы гинэ 3 балл сётӥзы. Нош ресторан критик Брангурт песянайёслы Москваын ресторан усьтыны ӵектӥз. Америкаысь куно малпа вал асьме песянайёсмес капчиен вормыны, но ӧз пӧрмы.

— Мон понна тужгес ческыт сиён дорын пӧрамез луэ, — шуиз Галина Конева. — Ресторан сиёнлы дышемын ӧвӧл, солэн зыныз но шӧмыз чылкак мукет. Бен, нунал лумбыт пӧраськеммы кемалы вунонтэм кылёз, ноку но уг вунэты Наташа Королёвалэсь анайзэ. Малы ке мон солэсь чылкак акыльтӥ.

Курег сӥлен шыд

Кулэ: атас яке курег сӥль, кубиста — 0,5 килограмм, ӵужкушман — 1, сугон — 1, йыды (перловка) кеньыр — 4-5 пуньы, укроп — 15 грамм, сылал но пӧсьтурын.
Кык-куинь часлы азьлапал вуэ небӟытыны пуктоно йыды кеньырез. Курег сӥль пӧзьыны кутскем бере сое вуэ ватсано. Шыд лымез час пала пичи тыл вылын пӧзьтоно. Кубистаез, сугонэз, укропез векчи юдоно, ӵужкушманэз вуштон пыр поттоно но лыме пононо. Сылалзэ но пӧсьтурынзэ шӧмызъя ватсано.

Сяртчыен кокрок

Пушкесэзлы: 2 сяртчы, 2 пачка мак, нќкы вӧй, 5 пуньы сакыр.
Ыльняньлы: ӟег пызь, 2 курегпуз, 1 стакан ву, сылал шӧмызъя.
Ыльняньзэ пельняньлы кадь лаёно. Сяртчыез векчи корано но ватсано мак, вӧй, сылал но сакыр. Кокрокез кутэм бере пӧсь гурын ог 10-15 минут пыжоно.

Шу кисаль

Кулэ: быдэн 1 килограмм ӟег пызь но шу, ӝыны килограмм сакыр, 1 стакан ву.
Сакыр песокез вуын небӟытоно, отчы ӟег пызь но шу ватсано. Та суретэз духовкае 2-3 часлы пуктоно. Кисаль дась.

Валентина Емельянова

Удмурт Дунне
By Удмурт Дунне Ноябрь 14, 2012 12:57