Чонари. Верос

Удмурт Дунне
By Удмурт Дунне Ноябрь 27, 2012 02:08

Чонари. Верос

Галина Романова

Верос

1

Интернет. Быдэс дуннеез аслаз вотэсаз возись маке. Киыз но, пыдыз но ӧвӧл ке но, адямиез кутэ. Кутэ но уг лэзьы ни. Лул-сюлэмзэ но сюпсьыны, йырзэ но сураны быгатэ. Со сярысь Оля табере ӟеч тодэ. Аркашеныз зарни сӥзьыл сюрес кузя вамышъян дауразы корказы интернет пыриз угось. Огшоры ӧз – чонариен. Ӧтьытэк, йыгаськытэк пыриз но тӧр шоразы ик пуксиз.

Оля Аркашеныз кызь арлэсь кема улэ ини. Газетын ӵош ужакузы тодматскизы. Ачиз тани шутэтске ни, кузпалызлы эшшо ог сизьым арзэ фотоаппаратэныз бызьылоно луоз на. Туспуктылӥсь со. Ужзэ туж яратэ. Газетъёсын сяна, туспуктэмъёсыз пӧртэм журналъёсын потало, адӟытонъёсын но соослы ӟеч дунъет сётыло.

Кузпалызлэсь шутэтскыны потэмзэ Оля чидатэк вите. Лумбыт ӵоже, ӵемысь ӝытъёсы но, пӧртэм ужрадъёсын бызьылыса, гуртазы жуммыса вуэ. Берло аръёсы Аркашезлэн тазалыкез лябӟизгес угось. Я пыдъёсыз зубектыло, я вирзӥбетэз ӝутскылэ. Сыӵе дыръя, Аркашсэ жаляменыз, Олялэн сюлэмыз ик шымырскылэ.

— Арки, со пурккетондэ коть ымад ӧжытгес тыр вал. Курытсэ но тросгес юиськод кадь… Пинал ӧвӧл ни ук…
— Тынад мар ужед! Ачим тодӥсько! — чутрак вераса куштоз но тӥни.

Олялэн йырыз кур уг луы. Сыӵе ини со: небыт, ненег лул-сюлэмзэ чурыт кылъёсын зӥбыны тырше. Маке сярысь юакуз-кенешыкуз но, Аркашез ныр улаз маке бурккетоз но, ужез быроз.

Одӥг ӝыт Аркашез бурдъяськыса вуиз. Кузпалызлэсь сыӵе дырзэ Оля кемалась ӧз адӟылы ни вал ке но, мылкыдзэ сюлмаськон зӥбиз: кыӵе ке шудонэ нош ӧз выйы меда? Кӧня ке ар талэсь азьвыл палсуй бандит шуон макеосын шудыкуз, сыӵе луылӥз, уждунзэ олокӧня толэзь ӵоже гуртэ ӧз нуллы. Пичияк утэ но, э-э, шумпотэ ук! Оляез ки йылаз нуллыны дась. Утэмзэ собере выльысь келя. Мылкыдыз озьы но уг усьы: вуонояз одно удалтоз, пе. Трос сюрс коньдон утыса, дуннеез котыръяло, туспуктэмъёсын возьматыло, пе. Ярам, со «бандитъёслы» пум понӥзы, сотэк, оло, гольык кыльысалзы. Огвакытэ пӧртэм лотереяосын шудыны ӧдъяз вал но, таиз висёнлы ӧз берытскы.

— Оли, редакциын интернет пыр туспуктэмъёсыным бам усьтӥ! — Аркашезлэн ымыз пельдорозяз. — Кӧня ке нунал куспын быдэс дуннеысь пӧртэм кунъёсысь адямиос отчы пыразы ни. Ужъёсме сыӵе ушъяло! Ваньмызлы «5» пукто.

Оля капчияк шокчиз: интернет шудон маке ӧвӧл! Ачиз но огдыре интернетын бергаз. Быдэс улонзэ журналистын ужаз бере, берло аръёсы отысь кулэ иворъёс, лыдпусъёс, нимтулъёс шедьтылыны дышиз. Собере интернетлэсь палэнскиз, кулэтэм жуг-жагъёсыз отын трос, оломаосын но йырзэ тырмытэмез ӧз поты. Аркашез но доразы интернет пыртыны ӧз сюлмаськы. Ужын вань, пе, мар юнме коньдон куштонэз. Нош дуннелэсь «шокамзэ» Оля телевизор пыр но тодыны быгатэ.

Со нуналысен Аркашезлэн пыд улаз музъем ик ӧз шӧдӥськылы кадь. Лобаса ветлӥз. Ӝытъёсы бергес но бергес вуылэмез пумысен шуылӥз: интернетэ пыртон понна котькуд туспуктэмлы вить минут дыр кулэ, пе, нош соос мынам, ачид тодӥськод, кӧня.

Одӥг пол Аркашез гуртэ ик ӧз берты. Редакциын ик, пе, диван вылын кӧло, солань-талань ветлыса, дырез юнме быдтэме уг поты.
— Интернет бамам сомында адямиос пырало! Котькудӥзлы юанъёссылы валэктоно, гожтэт гожъяно. Эн сюлмаськы, сютэм уг пукиськы, сиён басьтӥсько.

Ньылетӥ нуналаз гинэ Аркашез гуртэ вуиз. Ма, кузпалыз ик-а та? Жадемез шӧдӥське ке но, ымнырыз шумпотонэн пиштэ, синъёсыз чиляло. Ма но со чаляк куртчиз но кӧлыны выдӥз. Йырзэ миндэр вылэ поныса вуттӥз оло ӧз, соргетыны ӧдъяз. Куинь нунал ӵоже ныс-ныс изьытэк катьтэммиз, дыр.

Оля но аслаз валесаз вазьгес кӧлыны дасяськиз. Ӵош улыны кутскемзы дырысен понназы кӧлало. Кышнояськыкуз Аркашез куамын вить ареслэсь ортчемын вал ини бере, одӥг валесын солы ӝокыт потылӥз. Нырысь-валысь Олялэн кӧтыз ӝож луылӥз ик, собере дышиз.

Выдыса вуттӥз гинэ но, Аркашезлэн телефонэз пиккетӥз. Кин ке гожтэт ыстэм. Кузпалызлы уж ласянь, оло, маке кулэ ивор верало шуыса, Оля лыдӟоно кариськиз. «Дуное, мусое мынам, яратӥсько тонэ! Та уе тон сыӵе синмаськымон вал!» Мар та таӵе? Кӧня ке улыса, нош гожтэт вуиз: «Бугырес уйёсмы бере ныс-ныс кӧлӥськод, дыр, ини, чагыр синмо мусое. Тод: льӧль ымдуръёстэ ӟырдыт чупасько. Отысь котькуд точкаез монэ тодаз мед ваёз, монэ мед витёз». Час но ӧз ортчы, телефон нош пиккетӥз: «Тонэн артэ выдыны медӥсько вал но, ӧй быгаты. Кытын тон? Малы таӵе кема дорам уд вуиськы?» Котькуд гожтэт улын – Татьяна ним.

Олялэн кӧлонэз тӧлӟиз. Мар малпаны тодытэк, синзэ вӧлдэтэ мертчытӥз но кылле. Телефон ньылетӥзэ, оло, витетӥзэ пиккетэм бере Аркашез сайказ, гожтэтъёсты лыдӟиз но шумпотэменыз вӧлдэтозь тэтчаны дась вал, собере тамак кенжытӥз.
Картэз кухняын пукон вылэ султыса кыскылэ. Ӵынэз борддорлэн вылӥязгес лэсьтэм пичи решётка пасьёстӥ кошке. Со тамак кыскон куспын Оля умме усем кадь луэм-а, мар-а. Сайка но, Аркашез кухняын кинэн ке вераське. Сыӵе мыло-кыдо но шумпотыса лабыртэ.

Оля султӥз, кухня ӧсэз ӝубис кариз но адӟе: пукон вылысь васькытэк ик, Аркашез телефонэз пыр вераське. Ӧслы мышкин сылэ, кышнозэ уг адӟы.
— Мак сяськае тон мынам, шумпотонэ! Асьмеос одӥг писпу кадь: мон — модосэз, тон — куарез. Асьмос — кык ярдуръёс. Яратон вумы омыръяса быдтонтэм! Тон мынам ӵыж-горд улмое, сиыса кӧт тыронтэм чечыме. Мыным тонэн сыӵе умой! Кӧлонме но вунэтӥсько, мар каремме но уг валаськы ни. Ваньмыз сураськемын! Син азям тынад туспуктэмед гинэ, пель сьӧрам тынад куараед гинэ…

Оля сюлэм бордаз кутскиз но диван вылэ пуксиз. Нош кухняысь чебер кылъёс залэ но чузъясько, уй дуннеез кесяло, вырӟыто, бугырто…

Час но, кык но озьы кыстӥськиз, дыр. Олялэн чиданэз быриз, кухня ӧсэз ваяк усьтӥз.
— Мон ваньзэ кылӥ!
— Шудон со, Оля, — нокыӵе ик ӧз кариськы Аркашез, телефонзэ кысыса. — Интернет пыр яратонэн шудон. Тани учкы ай, одӥг нылкышно мыным кыӵе гожтэт лэзья: «Шундые тон мынам, яратӥсько тонэ. Чагыр синъёстэ чупасько, соос мон шоры гинэ мед учкозы». Тон монэ одӥг пол ке но «мынам шундые» шуылӥд-а? Ӧд. Тодэмед потэ-а, кытысь со кышномурт? Красноярскысь! Татьяна! Куспамы эн пыры. Мон сыӵе кайф басьтӥсько!

Оля чал-чал кылзӥз. Паймеменыз бакомиз угось. Со куспын нош жингыртӥзы.
— Пот татысь! — кеськыса сямен, чурыт вазиз Аркашез.

Оля ӧсэз ворсаз но выдӥз. Йырыз пӧртэм малпанъёсын сураськемын. Татчыозь улытозязы, кузпалыз сыӵе чебер вераськыны быгатэ шуыса, йыраз но ӧз лыктылы угось. Ма, кулэ дыръяз но ымзэ сиктанэн но уд бералты. Тодматскем беразы нырысьсэ ваче кыльыкузы, возьдаськеменыз синъёссэ ватылӥз. Самой мусо, чебер кылъёсыз «мынам Олие» вал. Солы но кышномурт туж шумпотылӥз. «Аркие тон мынам, ӟечоке» шуыса, йырзэ, тыбырзэ маялтылӥз. Мултэс кылъёстэк, ваньмыз валамон вал. «Вал» угось. Табере улонзы огдышем сямъя кошкыны ӧдъяз. Ог-огдэ ултӥян кылъёс но кытӥ-отӥ поталляны ӧдъязы. Юон бордысьгес кутскылӥз. Ымаз пыре ке, йырзэ ыштытозь юытэк, Аркашез дугдыны уг вала ни угось. Со курыт шакшылы луыса, кыӵе но учыръёсы ӧз сюрылы. Дуно фотоаппаратъёссэ но кӧня пол ыштылӥз… Нош учкод ке, кузпалыз сокем чебер вераськыны, сыӵе яратыны быгатэ вылэм. Ма, со зэмос кылбурчи ук! Татчыозь усьтӥськымтэ кылбурчи!

Кӧлыса вуттӥз оло ӧз, Аркашез вазь ӵукна ик ужаз кошкиз. Сомында аръёс ӵоже одӥг липет улын улӥзы, нош кузпалызлэсь сыӵе ӟырдыт мылкыдзэ, пӧсь сюлэмзэ, быгатонлыксэ чик ӧз тодылы. Кышномуртлэн гадь вылтӥз шунтэм вӧй кисьтӥськиз кадь. Аркашсэ яратонэз озьы выль сямен улӟиз, котырысьтыз дунне ик гомӟиз, оло. Олялэсь мылкыдзэ валаса сямен, ӵукез уӵы чирдэм шулдыртӥз. Чипсэ-чипсэ но кузь шултыса лэзе ук! Собере вакчи шултылыса чоккетэ, нош выль гурзэ кисьтэ. Город шоры ик кыӵе уӵы йыромем меда?

Аркашез шуэ, интернетын яратонэн шудон, пе, со. Ма, мед-а, мар-а шудоз. Оля вӧзаз ук, олокытӥ нылкышноосын костаськыса уг ветлы. Мӧйымон пала кыстӥськыкузы, тросэз воргоронъёс пинал даурзэс утчаны ӧдъяло. Инкуазь соосты сыӵе вордэм, лэся. Ассэ ачиз тазьы буйгатыса, Оля гань-ганьгес кариськиз.

Шутэтскон нуналэ Гербер шулдыръяськонэ ӵош ветлӥзы. Аркашез штанизэ гладить кариз, тӧдьы дэрем дӥсяз, пельдоръёстӥз пурысьтаны кутскем йырсизэ синучкон азьын вальк-вальк сыназ. Кузпалыз шоры Оля синмаськыса учкиз. Солэсь азьло котькытчы мед мыноз, ки улаз маке сюрем дӥсялоз но дыртыса кошкоз вал. Чакласа ӧд вутты ке, штани-дэремъёссэ кырсен чилятозязы ик нуллоз.

Герберын Оля мылысь-кыдысь шулдыръяськиз. Выльысь пиналмем лул-сюлмыз кырӟаз угось. Эшъёсыз но тодмоосыз солэсь мылкыдзэ эшшо ӝутылӥзы:
— Кызь арестэ куштэмед ук, Оли. Кыӵе эмъюм сыӵе юиськод?
— Яратон эмъюм, нылъёс, яратон эмъюм! — шуыса, Оля киоссэ лобӟыны сямен вӧлъя но пыдпыдэсысьтыз тыл потымон тапыртэ. Жингрес куараез, мукетъёсызлэсь висъяськыса, кыдёке чузъяське.

Со куспын Аркашез пӧсь шунды шорын лумбыт фотоаппаратэныз бызьылӥз. Кыкназы ик гуртэ жадьыса вуизы. Аркашезлэн чырым но вина веръямтэезлы Оля паймиз но, шум но потӥз. Азьло котькуд Герберын ньыльпыдъяськымон юылӥз. Фото пуктэмез понна котькудӥзлэн утялтэмез потылӥз угось.

Редакциысь интернетэ мыныны Аркашезлэн ӟигарыз ӧз тырмы ни, умме усиз. Кӧня ке шутэтскыса вуттӥз но, телефонэз жингыртӥз. Ури-бери султӥз, сотик шуонзэ кутыса, кухняе кошкиз. Корка пушез нош ик чебер кылъёс тырмытӥзы. Пельдэ ӵокта вал но, соос Олялэн сюлэмаз мертчо, жалятэк кесяло… Кыӵе ке Татьяналы сыӵе чебер чирдэ, нош Олязэ Гербер шулдыръяськонын но ӧз адӟы, одӥг туспуктэм но ӧз лэсьты. Бертыкузы но гажаса шораз учкись синъёсызлэсь палэнскылӥз.

Час пала вераськемзы бере Аркашез выльысь кӧлыны выдӥз. Умме но усьыса вуттӥз-а, ӧз-а, телефон нош жингыртӥз. Мар тамаша та?! Адямилы шутэтскыны но маза уг сёто. Оля ӧз чида ни, султӥз, Аркашез киысь телефонэз басьтыса, выж вылэ сэрпалтӥз.

— Эсэпсэ валасьтэм юмшась мумы пуны со — тынад интернет туганэд! Шизофреничка! Аферистка!
— Нош тон пересь карга! Пиньтэм воргорон но шорад учкоз на меда? Мон егит ай, выжыкыл дуннеын ке но чебер улэме потэ! — корка пилиськымон кеськыса, Аркашез телефонзэ выж вылысь кутӥз, дыртыса дӥсяськиз но пырс! потыса кошкиз.

Оля корка шоры пумыса кылиз. Бӧрд вал но, синкылиосыз уг пото. Кытчы кариськоно, мар лэсьтоно? Ноку но ӧз малпалля, картэзлэсь сизьым ареслы мӧйыгес луэмез сыӵе адӟонэ вуттоз шуыса. Ма, палэнысен соослэн пӧртэмлыксы чик уг шӧдӥськы. Тодмооссылэн верамзыя, Оля, оло, егитгес но адӟиське ай. Мугорыз пинал дыръяз кадь ик веськрес возиське, векчи кисыриос син котырзэ гинэ басьтэмын ай. Куд-ог воргоронъёслэсь шораз вӧё синъёсын учкылэмзэс но шӧдылэ. Нош Аркашезлэн лапеггес мугорыз лап-лап, пельпумъёсыз паськытэн но кукъёсыз вакчиен, лэся, гондыр кадь сумбрес адӟиське. Берло аръёсы кӧтыз мычиськыны ӧдъяз на. Нуналлы быдэ сямен сур, портвейн, олокыӵе но химиен сурам юон, жарить карем сиён си-ю ай. Пушкыз быдэсак сӧриськемын, дыр, ини. Кемалы меда тазьы тазалыкез тырмоз? Картэзлэн сыӵе лек ултӥям, вӧсь карем лул-сюлмыз но Аркашсэ жаляны быгатӥз на. Мар карод, кузпалыз нош ик «висьыны» усиз бере.

Ӵукна пал Оля нош уӵы чирдэмез кылӥз. Машина куараосты согыны турттыса, лулысь-сюлмысь кырӟа. Йыраз шуак чилектӥз: ма, пӧсьтолэзе кыӵе уӵы луоз, пе! Соослэн поттэм пиоссы гонъясько, дыр, ини. Ишан ук та? Нылкышнолэн утись кылчинэз секыт адӟонзэ озьы вера, луоз. Берло вӧтамзэ тодаз вайиз. Аркашеныз улон интызы ньыль висъето бадӟым квартира кадь. Котырак шулдыр, чебер! Картэз ӝӧк сьӧрын пуке. Ламинатэн шобыртэм выжзы кӧня ке интыетӥ пасяллямын кадь. Оля юа: «Малы со выжез уд тупатӥськы?» Аркашез номыр валэктыса ӧз вутты, малпамтэ шорысь квартираязы тудву вуиз но кузпалзэ шобыртӥз, сьӧраз нуиз. Вӧтэз Аркашез борды сьӧд чер кутсконлы шуид ке, вуэз чылк-чылк вал. Иське, кузпалзэ озьы интернет «басьтӥз». Нош пасяськем выж — семья сӧриськонлы.

Туж секыт вакытъёсаз Оля вашкала воршудэзлы вазиськылэ. Шундыӝужан пала киоссэ ӝутыса, со куриськиз:
— Осто, Ӟумья воршудэ, Шундые, Кылдысинэ, Бадӟым Инмаре! Мар кароно? Сёт визьдэ, шуддэ, тазалыктэ! Сьӧлыкъёсы понна тазьы курадӟисько ке, вождэ эн вайы! Сабырлы кар монэ! Монэ выльысь бадӟым яратонэн ӝуатӥд. Аркашме йыромемлэсь утьыны озьы бурдъяд, луоз. Тау со понна! Ваньзэ вормыны кужым, тазалык сёт, Бадӟым Инмаре!

Инмарлы гинэ оскыса, киосты алвылэ поныса, тазьы пуконо ӧвӧл. Маке но кароно. Аркашезлэн телефонысьтыз Татьяналэсь номерзэ басьтыса, тышкаськон, секыт кылъёсын юриськыса, гожтэт ыстоно ке шат?.. Мар яратонэз шудон карод, пе, эшшо ик кышнояськем воргоронлэсь йырзэ юнме поромытод. Но ведь сыӵе кышномуртлы Олялэн лекъяськемез, керетэмез пыӵ куртчем кадь но уз поты. Эшшо ке Аркашезлы чагиськоз но, соиз вылаз омырскоз. Дугды ай, дугды, Аркашез шуныт, чебер кылъёс тырмымтэен курадӟе ук. Ма, сокем кулэ ке, Оля но мусо кылъёссэ уз жаля. Журналист ук, кылъёсын шудыны быгатэ.

Висись лул-сюлэмзэ вормыса, Оля яратон сярысь кылбур малпано кариськиз. Аркашеныз тужгес шудо аръёссэ тодаз вайиз. Кызьы соос ӵыжы-выжыосынызы Вало дурын чорыгаллязы. Аркашезлы чорыген ӵемысь удалтылӥз. Нош кыӵе со чырткем уялляз! Налим сямен мур-мур зымоз но малпамтэ интые чулькак потоз, ву вылэ тэтчоз, собере олокызьы но берыкъяськыса уялоз, син шорысь ышымон кыдёке-кыдёке кошкоз. Олялэн сыӵе уямез нокинлэсь но адӟемез ӧвӧл. Собере, тылскем вылын чорыг лым, турынъёслэсь ческыт чай пӧзьтыса, ожо вылэ ваньзы котырак пуксьылӥзы но серекъяса, маскаръяськыса сиизы-юизы. Сыӵе вакытъёсы Олялы быдэс инкуазь дунне пальпотэ кадь потылӥз. Аркашеныз ӵемысь городын, гуртъёсын ортчылӥсь ужрадъёсы, ӝытъёсы пыриськылӥзы. Трос калык пӧлын ужакузы но, ваче синъёсынызы пумиськылӥзы, шара вератэк, ог-огзылы шуылӥзы: «Мон тонэ уг вунэтӥськы. Мон тонэ яратӥсько, тон сярысь сюлмаськисько, малпасько…» Кытчы со ваньмыз ышиз-быриз? Берло вакытэ Аркашез ас понназгес кариськыны турттэ, пуш дуннеяз выйылыны ӧдъяз. Жалянэз валасьтэм аръёс адямиез озьы вошто, дыр.

Сотовой телефонэз пыр Олялэн гожтэт гожъямез татчыозь ӧй вал на. Кема курадӟиз. «Мусое, тон мынам зарни бугоре, вӧзам гинэ пуктыса возён кузпалэ», «Инмын гинэ эн лоба, ӧрӟие, шорам мусо учкы, яратонэ», «Лултэм яратон чаляк акыльтоз, мусо Аркие, лык али дорам, сюлмысь ӟыгырто, чупало тонэ». Кылбуръёссэ телефоназ бичаз но картэзлы лэзиз.

Аркашез уйшор котырын гинэ вуиз. Жуммемын, весяк маке малпаське, Олялэсь синзэ ватэ. Сиёнлэсь шӧмзэ валатэк кадь, дыртыса ымыл-гамыл сиськиз. Сиськем бервылзэ октыны Оля кутскиз но, тусьты-пуньыосты уг шедьты. Утчаськонъяз соосты нянь тырон интыысь шедьтӥз, нош кылем нянь сукыриез — морозильникысь. Телефонэн часэн-часэн вераськыса, Аркашезлэн йырыз озьы сураське, дыр, ини. Телевизор пыр со сярысь олокӧня пол передача вал ини: йырвиымлы урод медаз луы шуыса, сотовой телефонэн нуналаз часлэсь кема вераськыны уг яра, пе, котькуд вить-дас минут бере часлэсь кемалы вис карылоно.

Кухняысь залэ потыку, коридорын дуннеез возьматӥсь карта ошемын. Аркашезлэсь со дорын сылэмзэ адӟыса, Оля мар шуыны ик паймиз. Кияз — бадӟыматӥсь пияла. Мар утчамзэ шедьтӥз, лэся, мылкыдтэк диван вылэ лэзиськиз.
— Мар-о, Арки, Татьянаедлэн городэз кыдёкын-а? Лобӟы вал но, бурдъёсыд ӧвӧл.
— Куинь сюрс иськем!.. — собере зуркак луиз, — Кыӵе Татьяна?! Мар тон?! Мынам сыӵеосы тодӥськод-а кӧня? Тон эшшо со гожтэтъёсыныд йырез жобаськод. Номыр карыны ке, интернетысь яратон утча!

Оля Аркашез вӧзы пуксиз, ӝип-ӝип ӟыгыртыса чупаз.
— Малы мыным малпам яратон! Мынам со тани — вӧзам.
— Асьмелэн ваньмыз — мукет. Чебер выжыкылэз ӧвӧл, валаськод-а! — Олялэсь кизэ бордысьтыз сэрпалтыса кадь куштӥз — Кайф, кайф басьтыны мыным эн люкеты!

Умме усьыны быгатытэк, Аркашез кема берыкъяськиз. Лулӟылэ, ӝуштэ. Оля ваньзэ валаз: интернет пыр шудонэз зэмос яратонлы берыктӥськем. Аркашсэ ыштэмез уг поты ке, куректон-бӧрдонлы сётӥськоно ӧвӧл, мар ке но лэсьтоно!
Нырысь ик кузпалызлэн телефонысьтыз Татьяналэсь номеръёссэ басьтыса гожтӥз. Куинь пӧртэм вылӥллям соос. Аркашезлэн кисыысьтыз эшшо одӥг телефонзэ шедьтӥз на. Таяз но Татьяналэн гинэ номеръёсыз. Иське, та кышномурт кузпалзэ вотэсаз зол гинэ сьӧлтам. Оло, со огшоры кышномурт но ӧвӧл, йырсазез кылъёсын сураны быгатӥсь экстрасенс? Уз, Оля солы уз сётскы! Яратоно кузпалыз понна пумозяз нюръяськоз!

Аркашезлэсь одӥг телефонзэ Оля басьтӥз но ватӥз. Уйжомем йырыныз кытчы каремзэ уз но вала. Со куспын мукет телефонэ Татьяналэсь гожтэт вуиз: «Шундые, чагыр синмо яратонэ мынам! Кӧлӥськод, дыр. Малы вӧзысьтым сыӵе вазь кошкид? Тонэн ӝӧк улын но кыллеме потэ на вал».

— Тьфу! Возьыттэм! — Оля телефон вылэ сялӟиз.
Инвис югектыны кутскон азьын телефонэ нош гожтэт вуиз: «Кема изиськод, шундые мынам! Тод вал, кызьы мугорысьтым котькуд люкетэз тынэсьтыд шуныттэ вите!» Таяз учыре телефон пиккетэмлэсь Аркашез чорк! гинэ султӥз но Оля киысь сое кыскиз.

— Телефонэз эн йӧтылы! Уд валаськы шат, мурт кисые пырам кадь ук со, — лек вазиз но телефонэныз кухняе ворсаськиз.
Нош ик йырез поромытӥсь кылъёс чузъяськизы. Оля пуштӥз. Ӧсэз шуак усьтӥз, Аркашез киысь телефонэз кыскиз но отчы кеськиз:
— Возьыттэм! Кышнояськымтэ пиосмуртъёс быриллям шат тыныд!
— Кин та? — телефонысь кылӥськиз. — А-а, Оля. Мыным тон сярысь Аркаш вераз вал. Эн вожа. Мон кыдёкын, нош Аркаш вӧзад. Солэн интернет сайтаз пыр ай, лулысь-сюлмысь вераськом.

Мукет дыръя Оля сыӵе ышкылам, возьыттэм кышномуртэн супыльтыны ӧй но малпасал. Но туннэ вераськоз, вань йыркурзэ солы кисьтоз.
Аркашез пумит ӧз луы. Ма, яратонэз куриз ук. Ӧз кылзӥськы ке, Татьянаез интернет дуннее ышоз но, собыдӟа «кабанысь» венез утчаса но уд шедьты ни.

Редакцие вуытозь, Аркашез пыл кыл но ӧз поттылы, вӧзысьтыз палэнскыса, я азьпалаз, я мышказ потыса вамышъяз. Олялэсь юам-верамъёссэ чик ӧз кылылы кадь.

Интернетысь сайтсэ усьтыса гинэ, Аркашезлэн ымнырыз шулдырмиз. Нош отысь Татьяналэсь туспуктэмзэ поттэм бераз чылкак пиналмиз: синмаз таӵе ик тылгизьы шудыны ӧдъяз, пельпумъёсыз шонерскизы. Оля Татьяналэн фотоез шоры мыр-мыр учкиз. Ӝӧк сьӧрын пуке, азяз компьютер ӝуатэмын. Ымнырыз мыт, сьӧд йырсиез лэзьямын. Но ымныр тусыз сайкыт уг адӟиськы, бус пыргес. Кӧня арес сётыны шуг.

— Ӟечбур, Татьяна! Тонэн али Оля вераськоз, — гожтӥз Аркашез.
— Ӟечбур, мусое! Витисько.

Аркашез ураме потӥз, Оляез Татьянаен огназэс кельтӥз. Керӟегъяськеменыз клавишаысь букваос бус пӧлы ышизы. Мырдэм но кызьы ассэ кутыса гожтӥз:
— Ӟечбур, Татьяна!
— Ӟечбур, Олечка! Кыӵе тон шудо кышномурт! Вӧзад сыӵе синмаськымон воргорон!
— Мынам юанэ вань: вераськыса гинэ воргоронлэсь йырзэ кызьы берыктыны луэ?
— Воргорон туж яраз ке, быгатод.
— Но ведь тон сое ноку ӧд адӟылы.
— Вераськемезъя, фотоосызъя адямиез ӟечгес тодыны луэ. Со туж но туж умой адями! Зэмос воргорон!
— Туж но туж умой адямиос дунне вылын вань меда?
— Сомында аръёс ӵош улыса, тон карттэ чик уд тодӥськы. Соин ик со мон борды кыстӥське. Табере монэн вожаськод.
— Кызьы уд вожа. Со мынам картэ ук.
— Нош азьвыл малы котыртӥз ӧд берга, ӧд мусоя? Иське, мон карттэ гажаны, выльысь яратыны дышетӥ, со шоры мукет синмын учкондэ улӟытӥ! Олечка, тод: воргорон тунсыко кышномуртъёс котыре гинэ кыстӥське. Соин ик кышномуртлы ӟичы кадь кескич но, кион кадь визьмо но луоно, кулэ дыръяз ӵушъяллы но, кыйлы но пӧрмытсконо.
— Паймымон кышномурт тон. Табере картме быдэсак аслыд карыны малпаськод-а? Лул-сюлэмзэ гинэ ӧвӧл — быдэсаксэ…
— Быгатысал ке мон тыныд ваньзэ вераны! Та ваньмыз огшоры шудон кадь ведь. Лултэм интернет, телефон, клавиатура…
— Но ведь тон картме ас палад берыктыны быгатӥд.
— Солы шуныт вазем, небыт, мусо кылъёс уг тырмо вал. Мынам сое тыныд но, нокинлы но сётэме уг поты! Но уг быгатӥськы! Уг быгатӥськы! Уг быгатӥськы!..

Та кылъёс бере Олялэн вожпотонэз кытчы ке тӧлӟиз. Оло, со кыӵе ке ӧлексы кышномурт? Ураме потатэк, уен-нунал компьютер сьӧрын пуке. Егит на, дыр. Яратэмез потэ.
— Кӧня арес нош тыныд? — юаз Оля.
— Сюлэсь но трос ни, дыр. Улонэз мон сомында тодӥсько, куддыръя аслым ачим кык сю арес но потӥсько… Олечка, туж курисько: Аркашез уть! Мон сотэк куло!
— Мыным нош кызьы улоно?
— Шумпот, со — тонэн! Котькуд нунал сое адӟиськод, соин вераськиськод. Солэсь но бадӟым шуд вань на меда! Со туж ӟеч воргорон, тонэ ноку уз кушты, нокинэн уз вошты!
— Интернет вотэсад нош тазьы кӧня воргоронъёсты кутылӥд ни? — Олялэн Татьянаез пичи ке но «куртчемез» потӥз.
Нокыӵе валэктон ӧз ни вуы, Татьяна ышиз.

Палэнысь кыӵе ке кышномурт Аркашсэ утьыны косэ. Ма, кузпалыз сярысь Оля ӧй сюлмаськысал ке, кин тодэ, та дуннеысь, оло, кемалась кошкысал ни. Ӟырт кезьыт куазен лымы вылын кӧлӥсь картсэ шедьтыса, кӧня пол дораз пыртылӥз. Нош одӥг пол тызэ кынтэм. Шоканэз пытсаськиз, ӟырдэктӥз. «Скороез» кык пол ӧтчаз. Огшоры грипп, пе, ортчоз ай. Аркашезлэн жоб дыльдыысьтыз вирез адӟыса, Оля валатскиз: татын маке но умойтэм. Эмъяськон юртэ бызиз, врачез доразы лыктыны тэльмыриз. Аркашсэ ӝегатскытэк эмъюртэ нуизы, рентген лэсьтӥзы. Эмчи берло шуиз: дыраз вуид, пе, уйзэ ӧй чидасал ни…
Ӧс куараез кылыса, тодэ ваён дуннеяз усем Оля шуак луиз. Аркашез пыриз. Кузпалызлэн чыртыяз ӟыгырскиз.

— Арки, тон мынам! Мыным тон сыӵе дуно, мусо! Нокинлы но уг сёты!
— Оля, эн дырты. Тодӥськод-а, Татьяна мыным асме усьтыны юрттӥз. Кема аръёс ӵоже пачкаса, возьдаськыса улэм лул-сюлэмме со эрике поттыны быгатӥз. Мыным соин сыӵе умой! — Олялэсь кизэ чыртыысьтыз басьтӥз.
— Нош мон?! Мон кытчы кариськом?! — Оля быдэс мугорыныз черетскиз.
— Чида, вить. Ми ведь соин ноку но ум пумиське. Валаськод-а, со шудон кадь.

Со куспын Аркашезлэн сайтаз кыӵе ке кышномуртъёс, пиосмуртъёс «йыгаськыны» ӧдъязы. Котькудӥз — туспуктэмъёсын. Оляез вунэтыса, Аркашез соку ик отчы выйиз. Тани со воргоронъёсты палэнтӥз, нош чебергес, егитгес кышномуртъёсты сайтаз пыртӥз.
— Арки, нош воргоронъёсты малы уд лэзиськы? — Оля юаз.
— Голубой-а, мар-а мон? — нокыӵе кариськытэк шуиз Аркашез.

Кышноос нош кузпалызлы огез бӧрсьы мукетыз чебер кылъёсын гожтэтъёс гожъяны ӧдъязы. Фотоосыд туж яразы, пе, тон — зэмос мастер, ачид но синмаськымон. Тонэ яратыны луоз-а? Куд-огез дораз куриське, куд-огез ассэ лыктыны ӧте. Зэмзэ но — выжыкыл дунне.

Оля валатскиз: со кышноос пӧлын Аркашез ассэ Дон-Жуан кадь кожа, луоз, соин ик люкиськемез уг поты ни.
— Кӧня-о соос тынад, Арки? — юаз Оля.
— Трос. Лыдзэс но ыштӥ ни, но тужгес яратоноосыз — кызь-куамын мында.
— Татьянаед нош соосын уг вожа-а?
— Мон соосын гожтэт пыр гинэ кусып возисько ук.
— Эк, Арки, Арки, та висёнэд тонэ ӟече вуттоз меда? Выжыкылын сямен ик, татын но ведӥнъёсыз но, убиръёсыз но, йыр берыктӥсьёсыз но вань, дыр.
— Эн люкеты! Соку ваньмыз умой луоз. Мыным синазькыль луэмед уг поты ке, эн люкеты!
— Мыным, оло, воксё кытчы ке кошконо?
— Котьмар кар! — ӵогиз Аркашез.

Татчыозь Олялэн пичи ке но осконэз вал на. Табере со осконзэ но интернет вотэс сьӧлтаз. Мар кароно? Юрттэт курыса, кинлы вазиськоно?

Тулэз тулэн ик шуккыса потто. Оло, Татьяналы жингыртоно? Уз, уз жингырты. Аркашезлэсь басьтэм телефонысьтыз кузпалызлэн нимыныз Татьяналы гожтэт лэзьялоз. Кызьы кутсконо ай? Эскероно, ӧлексы ӧвӧл меда со.
«Татьянае мынам, яратӥсько тонэ. Туж-туж зол тонэ адӟеме потэ. Оло, дорад ветлоно?» — гожтӥз Оля.
«Мынам но тонэ адӟеме потэ, шундые. Но ведь кусыпмы туж кыдёкын», — гожтӥз Татьяна.
«Самолётэн лыкто. Пумит ӧвӧл-а, мак сяськае?»

Тазьы гожтэмез бере Олялэн сюлмыз йыггетыса ик жугиськыны ӧдъяз. Ӝыны час но, час но ортчиз ини, Татьяналэсь гожтэт уг вуы. Чидатэк нош гожтоно кариськиз: «Мусое мынам, йырме берыктӥд но табере мон тыныд кулэ ӧвӧл ни шат? Чупасько».

«Лыкты! Витисько!» — вакчияк гожтӥз Татьяна.
Йырыз поромыса, Оля ӧжыт гинэ ӧз погра. Иське, со ӧлексы ӧвӧл. Оля сямен ик ветлэ, бызьылэ, но трослы егитгес, дыр. Оло, чебергес но.

Мукетаз нуналэ Аркашез пильмаськыса вуиз но ӧс куспысен ик шуиз:
— Шумпот, Татьяна кошкиз. Тани берпуметӥ гожтэтэз: «Ох! Мон тонэ лэзисько… Оля вормиз!.. Ачид дораз вамыш лэсьтӥд бере, солэн яратэмез тыныд дуногес. Но монтэк тынад шокамед но уз луы…»

Собере сиськытэк, кылиськытэк ик выж вылэ миндэр куштӥз но выдӥз.
— Мукет туган шедьтӥз, луоз. Егитсэгес, — пыӵкылӥз Оля.
— Ышем телефонме кин ке шедьтэм но дораз лыктӥсько шуыса оскытэм. Мон пумит луи.
— Малы?
— Шузимид-а, мар-а? Мар мон отын каром?
— Ог-огдэс яратыса, мусояськыса улысалды. Выжыкылын сямен.
— Оля, со выжыкыл ӧвӧл ни! Валаськод-а?!
— Уг валаськы.

Тазьы шуиз ке но, Оля ваньзэ валаз: Аркашез аслэсьтыз ачиз кышка. Мултэссэгес юэменыз-а яке мукет муген-а кузпалызлэн пиосмурт кужымез вазенгес ик быриз угось.

Та нуналысен Оля капчияк шокчиз, нош Аркашез жумгес но жумгес луиз. Сиськемысь но, курытсэ веръямысь но дугдӥз. Котькуд телефон жингыртэмлы быдэ куалектэ, дыртыса сое кутэ. Ужаз но мылкыдтэк ветлыны ӧдъяз.

Дыр ваньзэ ас интыяз пуктэ, Аркашез но йӧналоз али. Татьянаез гинэ медаз жингырты ни. Аслаз телефонысьтыз Оля Татьяналы гожтэт ыстӥз: «Аркадиез тодӥськоды-а?» — «Тодӥсько. Мар ке луиз шат соин?» — юаз Татьяна. «Кулӥз со. Толон ватӥм. Телефонысьтыз тӥлесьтыд номердэс шедьтӥм но ивортоно кариським», — гожтӥз Оля.

Тазьы дауртэмезлэсь кызьы берытсконзэ Оля тодысал ке! Мукет нуналаз ик Аркашез пальпотыса вуиз.
— Татьянаед берытскиз-а? — сюлмыз шуген юаз Оля.
— Мар со Татьяналы ёрмид ни! Интернетын сотэк но чебер кышноос быдэс уллё.

Аркашез нош ик уез-нуналэз сураз. Но телефоназ гожтэтъёс ӧз вуылэ ни. Аркашез кӧлыку, Оля телефоназ пыриз. Озьы ик вань: часэн-часэн Татьянаен вераськылэмын. Ванное пытсаськиз но жингыртоно кариськиз.
— Татьяна-а та?
— Кин та?
— Оля, Аркашлэн кышноез.
— А-а. Кемалась тонэн ӟечгес тодматскеме потэ ни вал. Кыӵе-о ни отын Аркаш?
— Тон солэсь вань лул-сюлэмзэ басьтӥд, мыным одӥг кӧс мугорзэ гинэ кельтӥд на. Малы тыныд со кулэ?
— Со кулӥз шуыса ивор басьтэм берам валай: дунне вылысь со мынам самой дуно адямие вылэм. Шӧдӥ: со улэп! Жингыртоно кариськи. Тод вал, кыӵе шумпотон тулкымъёс милемыз омыртӥзы!.. Олечка, курисько: эн вожа! Асьмеос вискын — куинь сюрс иськем! Ми ноку но ог-огмес ум адӟе, ог-огмес ум ӟыгыртэ, ум чупалэ… Но солэн лыз синъёсызтэк мынам улэме уз луы…Отчы быдэсак выйи, потыны уг быгатӥськы ни… Аркаш — зэмос воргорон!.. Кыӵе тон шудо, Олечка! Эшшо верасько на: со тонэ ноку уз алда, уз вуза!..

Татьяна вера но вера, дугдэмез уг луы ни. Куараез сыӵе небыт, вӧй вылтӥ кадь кисьтӥське, амалтэк сюлэме пыре, мугорез небӟытэ. Йыркурезлэсь тӧлӟемзэ Оля валаса но ӧз вутты. Ӝамдэ куспын Татьяна солы матысь эшез кадь потыны ӧдъяз.
Мукет нуналаз Татьяналы аслаз телефонысеныз жингыртӥз:
— Татьяна, ойдо Аркашез эскеромы: зэмзэ ик-а со сыӵе оскымон воргорон.
— Кызьы?
— Тон мыным Аркашлэн сайтаз пырем кыӵе ке кышномуртлэсь нимзэ, кытысьсэ вера но мон картэлы солэн нимыныз гожтэт лэзьяло. Дораз лыктыны курисько.
— Собере мар?
— Аркаш соглаш кариськиз ке, мон сое сыӵе сереме уськыто!
— Ярам, гожты: Уфаысь Гульнара.

Телефонэзлы Оля выль симка басьтӥз но Аркашезлы гожтӥз: «Аркашечка, сайтысьтыд фотоосыдлэсь мон балдею. Зэмос мастер! Ачид но номыр ӧвӧл, синмаськымон».

Аркашез гожтӥз: «Кин тон?»
«Уфаысь Гульнара. Тон мыным телефондэ сётӥд вал, тодӥськод на-а? Дорад лыктэме потэ. Монэ но фотоос пуктыны дышеты вал. Собере, оло, куспамы яратон тылӝу но кенжысал?» — гожтӥз Оля.

Аркашезлэсь гожтэтсэ кема гинэ витёно луиз. Йырыз уйжомемын ке но, малпаськыны быгатэ на, лэся. Телефон пиккетӥз но кык кыл адӟиськиз: «Лыкты! Витисько!»

Тӥни тыныд — оскымон воргорон! Сыӵе яратӥсь Татьяназэ но, Оляез но син куспын вузаз! Оля Татьяналы ваньзэ вераз но Аркашеныз пумиськыны кинэ ке куроз, шуиз. Вань курадӟемъёсыз понна сереме уськытоз.

Но ваньмыз мукет сямен берытскиз. Олялэсь дауртэмзэ Татьяна Аркашезлы верам. Соиз Оля вылэ омырскиз:
— Тон мыным кышно ӧвӧл ни! Кошкы татысь!
— Озьы гинэ ураме уг поты ай, Аркие. Та квартирамес но, люкам ваньбурмес но шори люком. Татьянаедлэн улон интыез вань, дыр, отчы мынод. Нош мыным пичияк сэрег басьтыны уксёез тырмоз.

Та кылъёслэсь Аркашез сазьтӥськиз кадь. Номыр куаретытэк, ӧсэз йыг! ворсаз но интернетаз кошкиз.
Ӝыт пал доразы эшеныз вуиз. Киязы быдэс сумка сиён-юон, вина.

— Саша та. Армиын ӵош служить карим, — пинь пыртӥз вакчияк шуиз Аркашез.
Саша туж мыло-кыдо, вераськись вылэм. Аркашезлы эшъёсыныз пукыны Оля азьвыл ӧз люкетылы: воргоронъёслэн асьсэлэн лабыртонзы ук. Нош туннэ Саша Оляез ӧз лэзьы: нылкышнотэк мар-о со пукон, пе, луоз, гуын кадь шимес. Дуно эшезлы пумитъяськыны Аркашез ӧз дӥсьты.

Кемалась вина веръямтэ Олялэн йыраз чаляк шуккиз. Жингрес куараеныз кырӟаны ӧдъяз ук! Толэзь ӵоже курадӟись, бӧрдӥсь лул-сюлмыз озьы кыре потӥз, эрике лобӟиз.
— Кытысь таӵе уӵыез садад вайид? — Аркашезлэсь Саша юа.
Аркашез ныр улаз маке дыг-мог вераз. Эшез шораз паймысагес учкиз но юаз:
— Уд висиськы-а тон, Аркаш? Маке синъёсыд гордэктэмын, ымнырыд но кӧсыт.
Кудӟыны ӧдъям Аркашез пальпотӥз:
— Вай али мон тонэ туспуктэме кельто. Ку пумиськыны кылдоз на.
— Оляеныд ӵош пуксеме потэ. Учкы ай, кыӵе со тынад мусо!

Олялэн йыраз малпан чилектӥз: Сашаен тросгес туспуктэм лэсьтыны куроно. Соосты Аркашез сайтаз интыялоз, собере дунъялозы. Оло, соку кузпалызлэн йырыз сазьтӥськоз, шораз мукет синмын учкыны ӧдъялоз.

Возьдаськонзэ, сабырлыксэ палэнтыса, Оля чильтыръяськыны малпаз. Йырсизэ пуштрес сыназ, буяськиз но, пинал дыр дэремзэ дӥсяса, воргоронъёс азе потӥз. Сашалэсь вӧё синъёссэ адӟыса, эшшо но гольтрес выре: я бамаз чуп каре, я азяз пуксе. Аркашез нош, нокыӵе кариськытэк, соосты туспуктэ. Янгышен сямен, Аркашез борды но йӧтскылэ: я йырсизэ чиньыосыныз пештыртэ, я тыбырзэ маялтэ, я, фотоаппаратсэ басьтыса, Сашалы сётэ но ӵош пуктыны куре. Озьы ӝытлэсь ортчемзэ ик ӧз шӧдэ. Аркашез час шоры учкиз но бакомиз кадь. Мыным али ик редакцие ветлоно, пе.

— Малы? — паймиз Саша.
— Флешкаед вань ке, та туспуктэмъёсты тыныд отчы интыяло, интернетэ но тыро.
— Дугды ай, эше, — пельпумаз чабкиз Саша. — Ваньзэ ӵуказе лэсьтыны луоз. Нош туннэ шулдыръяськом!

Аркашезлэн чиданэз ӧй вал ни ке но, эшезлэсь кылзӥськиз. Шулдыръяськонзы кема ӧз кыстӥськы ни. Сюрес вылын жадем Саша сур-сур умме усиз. Нош Аркашезлэн телефонэз жингыртӥз. Паймоно кадь: сомында юыса, кузпалыз азьвыл пограсал ни, нош али чоз-чоз, кылыз но пыдыз гинэ кытӥ-отӥ сьӧлтаськылэ. Телефонзэ дыртыса кутӥз но кухняе пытсаськиз.
Татьянаен часэн-кыкен ма сярысь вераськемзэс Олялэн кемалась тодэмез потэ вал ини. Ӧсэз ӝубис кариз, кияз кагаз но ручка кутӥз. Ваньзэ гожтоз. Кудӟем муртлэн малпанъёсыз — кыл йылаз.

— Татьянае, тон мынам-а? — вераськонзэ мытӥз Аркашез. — Мон вань мугордэ чупасько. Монэ но чупа. Ой, йыры берга ни!.. Мон тынад гинэ, Танюшае… Тон мынам туж но туж чебере, мусое!.. Тон мынам шузие, ӟечоке… Тани тонэ куртчо и всё!.. Вай мыным чиньыостэ, ваньзэ-ваньзэ чупало, куртчыло… Тон мынам сыӵе ческыт кышномуртэ… Нокин но мыным кулэ ӧвӧл, тон гинэ… Мылкыды лоба, Танюшае… Мон тонэ сыӵе яратӥсько!.. Ойдо нош ик чупаськом!.. Мынам тонэ кылеме потэ… Быдэсактэ… Яралоз-а?.. Пичи дыдыед тынад кытын?.. А-а, тани со, тани!.. Ой!.. Кыӵе со тынад ческыт!.. Мон тонэ быдэсактэ сиисько!.. Тон но си!.. Выжыкыл та!.. Выжыкыл!.. Омырез пушкад кыскыса шокчы ай… Бен, бен, озьы… Ӟечоке, чебероке тон мынам!.. Мон шузи… Вера, мон шузи! Нош тон мынам визьлюке!.. Кыл но шедьтыны уг быгатӥськы… Тон мынам помидоре, кузял кияре, чырс улмое… Сыӵе кӧш но ческыт кышномуртэ!.. Тон мынам югыт дуннее!.. Ой, мынам нош ик тонэ кылеме потэ!.. Си монэ, си, Танюшае, быдэсак си!..

Оля ӧз чида ни, ӧсэз вӧлак усьтӥз но кеськиз:
— Телефон пыр сексэн выриськоды, иське! Возьыттэмъёс! Монэн кӧланы ке нош — кынарыд ӧвӧл!..
Шуак пыремысьтыз Аркашез гуньдэм кадь луиз. Олялэн нош дугдэмез уг луы ни, ултӥям, вӧсь карем лул-сюлэмаз вань люкаськемзэ кисьтэ но кисьтэ:
— Уфаысь Гульнараен нош кызьы кӧланы малпаськод вал, сурон бам, гоно ымныр?! А-а, егит вир аслэсьтыдзэ но вырӟытоз шуыса эскеремед потӥз, луоз. Эшшо ке со юмшась мумы пуныостэ улон интыямы вайыны медӥськод-а? Татьянаед тонэ зэмос воргорон, шуэ. Тон нош Татьянадэ но, монэ но кыӵе ке ноку адӟылымтэ Гульнараен вузад, пачанушы!..
— Мае валаськод тон, — усем мылкыдын мырдэм вазиз Аркашез.

Ӧжытак буйгамез бере Оля пырак юаз:
— Татьянадэ сокем-сокем яратӥськод. Тани тӥледлы, шуом, пумиськыны кылдӥз. Нош со шораз учконтэм шуш яке кыӵе ке ӧлексы. Соку но-а тыныд со мусо потоз?
— Котькыӵе мед луоз, ярато, — Аркашез нокыӵе ӧз кариськы.
Оля валаз: Аркашез ведӥн кышномурт кие сюремын. Ванное ӵогаськиз но Татьяналы жингыртӥз.
— Татьяна, Аркашен вераськемдэс мон ваньзэ кылӥ. Юрӟым кышномурт тон! Тӥ кадьёсты Инмар кызьы чида меда! Калгись пуны! Возьыттэм!
— Буйгатскы, мусое! Мон кӧлӥсько ни вал, верамзэ умой-умой ӧй но кылзы. Кудӟемын вал ук. Мар-о сыӵе кулэтэмзэ со супыльтӥз меда? — небыт куараен лякытак юаз Татьяна.
— Монэ шузи кариськод, иське. Нош сокем мусо, зэмос воргоронэд тонэ вузаз ук. Гульнара сярысь верасько. Малпамме малы пумозяз вуттыны ӧд сёты? Сыӵе воргоронъёсты возьытэ уськытыса дышетыны кулэ.
— Шедьтэм… Гульнара!.. Мон алдаськыны уг яратӥськы. Аркашез ултӥяны уг сёты.
— Кыӵе алдаськон, ултӥян сярысь тон вераськиськод! Тӥляд та выремды алдаськон, яратонэз ултӥян ӧвӧл шат?!
— Олечка, кыӵе тон ваньзэ умойтэм валаськод. Улонлэсь бере кылиськод, гыдыке. Буйгатскы, тон али вожаменыд вожомемын, йырыд сураськемын. Тон мыным Аркаше кадь ик дуно, мусо, чебер потӥськод. Монэн тазьы керетытозь, Аркаштэ ӟыгырты ай, мон интые но чупа, вӧзад выдты. Тон чебер кышномурт ук, инкуазен сётэм вань быгатонлыктэ солы возьматы ай. Котькыӵе воргоронлэсь вылымтэ кужымзэ но улӟытыны луэ. Асьмеос со понна вордӥськемын, Олечка…
Татьяналэн верамез Олялэн мугор кузяз шуныт, небыт вуэн кисьтӥськиз. Гадьысьтыз потымон тэтчась сюлэмыз гань-гань луиз. Ваннойысь потӥз но пукон вылын йырзэ ошыса пукись Аркашез доры мынӥз, ӟыгыртӥз.
— Арки, ойдо кӧлыны выд ни.

Кузпалыз ки улысьтыз мозмытскыны ӧз выры. Кыштырак гинэ сьӧраз вамыштӥз но изьыны выдӥз. Олокӧня уйёсты кӧлытэк ортчытъям Оля но ныс-ныс умме усиз.

Ӵуказеяз шутэтскон нунал вал. Аркашез эшсэ келяз но, котьку сямен ик, интернетаз выйиз. Но азьвыл сямен лумбыт ӧз пукы, нуназе котыр вуиз ни.
— Толон ӝыт лэсьтэм туспуктэмъёсме интернетэ тыри. Соку ик соосты дунъясьёс шедизы. Тон сярысь шуо, кыӵе чебер кышномурт, пе. Умой адями, дыр. Лякыт, ӟеч сямыз ымныраз ик потэмын, — тазьы вераса, пиналгес дыръязы сямен, Аркашез шораз сыӵе шуныт учкиз.

Олялы-а озьы потӥз? Тӧр сэргын пукись чонари нокытчы ӧз кошкы на ук. Корка пушсэс котырак учкиз но шуэрскиз: квартира шоразы ик пурысь чонари вотэс лэйка. Пужыез сыӵе чебер, синмаськымон!

2
Кӧня ке нунал Татьяна чал-чал улӥз, ӧз жингыръя. Аркашез буйганыгес ӧдъяз. Азьвыл сямен ик, уж бераз гуртазы дыртылӥз, диван вылэ выдыса, телевизор учкылӥз. Озьы ке но Оля шӧдӥз: ваньмыз та озьы гинэ шыпытак уз ортчы. Семьязэс, корка пушсэс, оло, эшшо маке но умойтэмез шугектытоз, зуркатоз на. Со сярысь паймымон учыръёс, яке ишанъёс шуод-а, шӧдытылӥзы угось. Огнуналэ Аркашез корказы телефонэныз вераськыса пыриз. Саша, пе, жингыртӥз, дораз ӧте.
— Мын, Аркие, мын, — шуиз Оля. — Огдышем интыез куддыръя вошъяны кулэ. Ӟеч эш собере ӟег нянь кадь, сюлэмдэ но няськатоз, лулдэ но йӧнатоз.

Озьы лабыртыса, кухняысь ӝӧк сьӧрын пукизы, ӝытнянь каризы.
— Арня мында отпуске кылиз на. Лыкто шуыса, Сашалы соку жингырто, — Аркашез телефонзэ утчаны ӧдъяз. — Кытын-о со? Залысь пичи ӝӧк вылэ понӥ вал ук.
— Коӵышъёсмы нуизы, луоз, — серектӥз Оля. — Утча ай умойгес.
— Нокытын ӧвӧл!

Оля но утчаськыны кариськиз. Вань сэрегъёстӥ, пукон-ӝӧк, кровать улъёстӥ ортчиз, аслаз телефонысьтыз Аркашезлэназ жингыръяса но утчаз. Нокыӵе куара ӧз кылӥськы. Телефон чиптэм-чаптэм ышиз. Ма карыны ёрмыса, Оля коркакузёзылы вазиськиз. Котькуд коркан коркакузё вань шуыса, кышномурт оске угось. Пичи ӝажы вылазы коркакузё тусо мунё пуктыса возе. Соин вераськылэ, сиён-юонъёсын но «утялтылыны» тырше.

— Мусо корка утисьмы, Аркашелэсь телефонзэ шедьтыны юртты вал! Со понна тонэ вӧйын нянен утялто… Кулэ ке, чечымзэ сёто, курытсэ но уг жаля…

Солань-талань ветлонъяз, Олялэн синмыз ковёр вылысь телефон вылэ мырӟиськиз. Корка шорын ик кылле вылэм. Аркашез Оля шоры лек учкиз:
— Ачид ватӥд!.. Вожаменыд тазьы дауртӥськод!..
Кӧтыз ӝожен Оля мар вераны ик ёрмиз.

Мукетаз нуналаэ пуртсы ышиз. Коркакузёлы вазиськемез бере ӝӧк улысь шедьтӥзы.
— Милемын тазьы шудыса, мар вераны турттӥськод меда, коркакузёмы? Кыӵе адӟон эшшо вите на? — кӧсыт ымнырзэ кык киосыныз ик пытсаса, Оля лулӟиськиз, пызьыраса потыны турттӥсь синкылиоссэ кужмысь кутӥз.

Аркашез эшез доры кошкем бере Оля кытчы пырон инты уг шедьты, коть борддор борды йырдэ кока. Соку йыраз шуак чилектӥз: оло, аслыз но «Одноклассникиын» бам усьтоно? Кинэн ке тодматскоз, вераськоз но каньылгес луоз. Собере Татьяна сярысь но, оло, маке тодэмез луоз. Аркашезлэн интернет бамаз со вань.

Ӵуказеяз ик ӝажы вылысьтызы тузонӟем ноутбуксэс ӝӧк вылэ пуктӥз, лач-лач ӵушылӥз но интернет пыртыны мастерез ӧтиз. Сое «Одноклассникие» аслыз бам усьтыны, флешкаысьтыз отчы пӧртэм пумо туспуктэмъёссэ пыртыны куриз. Со ик Аркашезлэн интернет бамаз но пыралляны дышетӥз.

Аркашезлэн бамаз пыриз но кӧтыз эшшо но ӝожомиз: бур палаз вылӥяз ик гожтэмын, Ирина Симаковаен матысь кусып возе, пе, нош семьяез ӧвӧл. Кинлэн ке интернет бамаз пырыку, юан вань: «Кин-о со тыныд луэ?». Оля гожтӥз: «Кузпалы». Соку Ирина Симакова гожтэм интые пуксиз: «Оля Березинаен кузпалъяськемын».

Аркашез эшез дорысь вуытозь, Олялэн бамаз олокытысь но адямиос пырылӥзы, гожтэт гожъяны ӧдъязы. Кӧня ке кышномуртъёсын кусып тупатӥз, улон-вылон сярысь соосын ма но со чыры-пыры вераськылӥзы. Ирина Симакова но шуак кытысь ке потӥз. Тонэн эшъяськысал, пе. «Ма, тон Аркаш Березинлэн ӵош улон кышномуртэз ук?» — пыӵкылӥз Оля. «Мон уг тодӥськы вал, солэн кышноез вань шуыса, соин ик ачим озьы гожтӥ. Нош тон сыӵе кельышлы кышномурт вылэмед.

Аркашед ки вылаз нуллэ, луоз. Со кадь воргоронъёсты вӧзад возьыны туж быгатэм кулэ», — чеберъяськыны ӧдъяз Ирина. «Бен, ми соин туж тупаса улӥськом. Мусояськыса, ӟыгыръяськыса гинэ», — Оля но пунэме ӧз кыльы.

Кӧня ке нунал ортчыса, Екатеринбургысь кыӵе ке Сергей Орлов бамаз вуиз. Ассэ витьтон кык арес шуыса гожтэм. Чебер кылъёсын гожтэтъёс лэзья но лэзья: тон кадь мусо кышномуртъёсты шер адӟылоно, пе, амалы ке луысал, али ик дорад лобӟыса вуысал. Олялы солэн пуктэм тусыз кельшиз ке но, серемез гинэ потӥз. Татьяна сямен йырвизез сураны турттӥсь маке, дыр, шуыса, пумитаз номыр ӧз гожъя. Нош Татьяналэн бамаз пырыны ӧз быгаты: фамилизэ уг тоды.

Аркашез эшез дорысь капчи мылкыдын вуиз. Кияз — «Портвейн» ӟенелик. Нялтас лавкае пырай, пе. Капчиям бераз малпамтэ шорысь шуиз:
— Мынам ӝамдэзэ огнам улэме потэ. Эшед доры сад-бакчае мынэмед уг поты-а?
— Ма, арня ӵоже мынэсьтым шутэтскид ук.
— Мын, мын. Емыш сиёд, чылкыт омырен шокалод…

Зэмзэ но, мар ветлонтэмез. Лида эшез кемалась ӧте ини: кияр-помидоръёсме, пе, нокытчы карыны, юрттӥсь но кулэ. Быдэс даурзэ огназ ортчытэ ни, нылпиез ӧвӧл, куать сотка музъемзэ пиналэз кадь нуныяса, утялтыса возе. Лидалэн сад-бакчаяз Оля Аркашеныз ӵош азьвыл ӵемысь вуылӥз. Кужмо пиосмурт киын лопата, мажес, саник шудон чача кадь капчи бергазы. Сыӵе дыръя Аркашез шоры Лида вожъяськыса учкылӥз но Олялы лушкемен сипыртылӥз:
— Шуддэ, Оли, киосад зол возь!

Мар сое возёнэз, малпалляз Оля, даурзы сӥзьыл пала кыстӥське ни ук. Улонзы паськыт шур сямен зыл-зыл бызе но бызе, нокыӵе кожонъёстэк, вуберганъёстэк. Нош Аркашезлэн юонэныз йырин кылдэм шугадӟонъёслы Оля дышиз, лэся, ини. Мар карод, ваньмыз нокызьы но умой луыны уг быгаты. Нясь-нясь гинэ улыса, шудэдлэсь шӧмзэ валамысь дугдод. Табере Оля тодэ: шудбур луо выллем пызырес вылэм, чиньы пыртӥ потыса кошкыны быгатоз.
— Арки, ойдо ӵош ветлом, — кузпалызлы вазиськиз Оля. — Милемлы тонтэк мӧзмыт луоз.
— Мар тон, гуртын пукыса, уез-нуналэз сураськод ни шат! Ӵуказе ужан нунал ук.

Оля гуньдэм кадь луиз. «Одноклассники» бамаз пукыкуз, зэмзэ но, нуналъёслэсь ортчемзэс шӧдылымтэ ук. Бамез сярысь Аркашезлы верано меда? Вераз ке, оло, вожанэз улӟоз но со Татьяназэ вунэтоз?
— Арки, мон но «Одноклассникын» бам усьтӥ.
— Туж умой, — нокыӵе ик ӧз кариськы Аркашез. — Аслыд интернет туган шедьты, уй-нуналэд выжыкылын кадь ортчоз.
— Нош со туган шуон дорам лыктыны куриськиз ке…

Веранзэ пумозяз ӧз вутты, Аркашез пурӟиз:
— Тон мар, мынам квартираям-а ӧтьыны малпаськод?! Тодыса ул, ӵуказе ик татысь кошкод!
— Мар тон, Арки, мон шудыса гинэ ведь…

Сюрес вылэ Оля мылкыдтэк потӥз. Пушкыз ӝуа. Оло, мыноно ӧвӧл? Эшсэ но адӟемез, соин сюлмысь вераськемез потэ. Лидаен соос пичиысен ӵош будӥзы: вордӥськем гуртазы кеӵевыл коркаосын улӥзы, одӥг парта сьӧрын пукизы, шумпотонзэс но, кӧтӝожзэс но шори люкизы.

Лида доры нуназе пал вуиз. Туж кема адӟиськылымтэ муртъёс сямен ӝик-ӝик ӟыгырскизы.
— Мар ке мыным тынад тусыд уг кельшы, — Оля шоры Лида мыр-мыр учкиз. — Мугорыд но лапкам кадь.

Аркашезлэсь мыдланьяськемзэ Олялэн верамез ӧз поты. Эшез азьын возьыт. Ачиз но, картэз но интернет дуннее выемын шуыса тодӥз ке, сереме уськытоз эшшо: номыр ужаны ке, берпалдэс кормалэ, шуоз. Сыӵе со: меӵак вералоз но куштоз. Со понна но Оля эшсэ гажа. Малпанъёссэ пушказ лушкем уз возьы, ваньмыз — кырын. Соин но, дыр, воргоронъёс соин ӵош кариськыны кепыралогес. Лида сокем ӧз чигиськылы: егитгес дыръяз туганъёс шедьтылӥз, нош али со калгись пилешъёсты котырам дас иськеме но уг лэзьы, шуэ. Шутэтскыны потэм бераз вань шумпотонэз но сюлмаськонэз — сад-бакча.

Эшез дорын Оля быдэс арня улӥз. Аркашезлы одӥг-кык пол гинэ жингыръяз: кӧня ке мед мӧзмоз. Чылкыт омырын, гажано эшез вӧзын кышномуртлэн вань сюлэм курадӟонъёсыз веськазы кадь. Арня ӵоже корка пушсы тузонӟем, соку ик утялтӥськыны ӧдъяз. Кресло вылысь шобретэз курткыны ӝутӥз но, выж вылэ вина ӟенеликлэн пробкаез усиз. Оля сое умой-умой эскериз: дуно виналэн пробкаез. Кышномурт мукет винаосты уг веръя, нош сыӵеоссэ 8-тӥ Март яке Выль ар дыръя октылэ, соин ик ӟеч тодэ. Кытысь со татчы вуиз? Арнялы быдэ корка пушсэ октэ-калтэ ук. Картэзлэсь валес котырзэ воштыкуз, нош ик дуно виналэн пробкаез сюриз. Аркашез визьмаськиз но ӟеч винаосты юыны ӧдъяз шат? Нош коньдон кытысь? Одӥг ӟенеликез ньыль сю манет пала сылэ ук. Нокыӵе уждунэд но уз тырмы.

Аркашез ужысь бер ӝыт вуиз. Кӧня ке юэмез вань, кияз — «Портвейн» ӟенелик. Ымдурыз пельдорозяз, синъёсыз чиляло. Бурдтэк лобӟыны дась. Оляез адӟиз оло ӧз, номыр вазьытэк, соку ик кышнопала кошкиз. Отысь телевизорез ӝуатӥз но, «Портвейнзэ» усьтыса, колбасаен куртчиз. Шедьтэм вина пробкаосты кутыса, Оля дораз матэктӥз. Аркашез синзэ ватэ, я укно шоры учке, я телевизоре мертчытэ.

— Арки, тон таӵе дуно винаосты юиськод ни вылэм, малы нош ик со «Портвейнэд» вылэ выжид? — пробкаосты ныр улаз донгыса юаз.
— Ну, юи… Мар тынад ужед?!.
— Мыным коть кельты вал…
— Мар мерскиськод!.. Сёт мыным эрик!.. Эрик!… Валаськод-а?..
— Малэсь, кинлэсь эрик?
— Тынэсьтыд!.. Мыным тонэн шоканы омыр уг тырмы!.. — кеськиз но кышнопалась дыртыса потӥз, ури-бери пыдкутчанзэ кутчаса кошкиз.

Оля валаз: картэз нош ик яратон вотэсэ сюремын. Татьяна ик сьӧлтаз, луоз. Ӧс сьӧрысь коридорын Аркашезлэн телефон пыр вераськемез кылӥськиз. Оля ӧсэз каллен гинэ усьтӥз но кылзӥське. Озьы ик вань: «Татьяночка, Татьяночка…»
Аркашез нош ик бер ӝыт вуылыны ӧдъяз. Вуэ ке но, ӧс сьӧры яке азбаре потыса, часэн-часэн Татьянаеныз вераське. Вазь ӵукна сайка гинэ, сюлмыз сэректыса, ужаз бызе ни: гажанэзлэсь куаразэ кылэмез потэ. Оляез адӟемез ик уг луы, усьтыз-табыр кышнопала пегӟе но телевизоре мертчиське. Калык сямен сиськыны но уг быгаты: кышноез син шораз медаз шедьы шуыса, одӥг пыдзэ пукон вылэ ӝутэ, мукетсэ выж вылэ пуктэ но, укно пала учкыса, ымаз маке сюрем ымыл-гамыл тыре но ньылэ. Дугдылытэк кыске.

Олялы картэз жаль потыны ӧдъяз:
— Арки, валаськод-а, тынэсьтыд йырсазьдэ сӧро, берыкто ук. Туала кылын вераса, зомбировать каро.
— Оломае но тодэмъяськиськод… Ачид калык сямен вераськыны но уд быгатӥськы…
— Со понна Татьянаед туж визьмо, око?
— Ваньмыз со кадь визьмо луысалзы ке!.. Сёт мыным эрик!.. Эрик!..
— Ярам, нош Лида доры сад-бакчае ветло. Соку буйгалод ни, оло?
— Ветлы!.. Ветлы!… — шумпотэменыз Аркашезлэн ымыз пельдорозяз вуиз. — Мон понна эн сюлмаськы: коӵышъёсмылы килькаен ӝук но пӧзьто, ковёрез но пылесосэн сузяло… Эшшо мар уж кельтод на?..
— Коӵышъёс бӧрсьы утялтыны эн вунэты. А то азьвыл сад-бакчаысь вуыкум, коркан шоканы уг лу ни вал. Педло потан интызэс ӵемгес вошъя…
— Ваньзэ лэсьто, ваньзэ!.. — лӧптэм Аркашез Оляез бамаз чуп кариз.

Чупам бервылзэ Оля паймыса кутылӥз. «Зэмзэ но, воргоронлы дырын-дырын эрик кулэ, дыр. Со Татьянаеныз кусыпсы телефон но компьютер пыр гинэ ук. Пумен солэсь вуёмоз. Ваньмыз интыяз берытскоз», — тазьы малпаса, Оля кошкиз.

Таяз учыре Лида эшез сюлэмшуген шуиз:
— Нош огнад. Ӟечлы ӧвӧл та, Оли. Воргоронэз огназэ кемалы келляны уг яра. Мон соосты аслэсьтым чиньыосме кадь тодӥсько.
— Ма, сомында ар улӥськом ни ук. Мынэсьтым ӝамдэзэ шутэтскемез но потэ, луоз.
— Сомында ар улыса, Оли, ӟеч кузпалъёс лемиськыса кадь ветло.
— Ой, вералод но ини тон! Пуныос шат ми?
— Бен, бен, лемисько. Ог-огзытэк вамыш но лэсьтэмзы уг луы ни. Нош тӥ, чакласько ке, тараканъёс сямен, кудды кытчы пегӟыны инты утчаськоды. Учкы ай шорад: боды кадь кылемед ни ук, лы но ку!
Олялэн вань куректонзэ, кӧтӝожзэ эшезлы кисьтэмез потэ ни вал но, возиськиз. Уз вала. Ма, Оля но азьвыл ӧй валасал. Кызьы чик адӟылымтэ мурт адямилэсь йырзэ сураны, берыктыны быгатоз.
Эшез дорын Оля нош ик быдэс арня улӥз.

Квартираязы пыремез бере ик нырзэ кыӵе ке духилэн аспӧртэмлыко зыныз бичатӥз. Одеколонлэн но, ческыт зыно вулэн но ӧвӧл — дуно духилэн. Шутэтскыны потэмез бере Оля ӝамдэзэ духиосын вуз кариз вал, соин ик соослэсь зынъёссэс ӟеч вала.
«Кылем духизэс Аркаш кытысь ке шедьтӥз но, коркан коӵыш зын медаз луы шуыса пазяз, луоз», — Олялэн мылкыдзэ уськытэмез ӧз поты. Котырак учкиз: ваньмыз интыяз, чылкыт. Аркашсэ ческыт сиёнэн утялтэмез потӥз. Ыльнянь басьтӥз но яратоно шаньгизэ пӧраз. Соиз буй-буй ӝутскиз, ческыт зыныз быдэс квартирае лӧсъяськиз.

Бер ӝыт шӧмаськыса вуись Аркашсэ Оля ӧс дорысен ик пальпотыса пумитаз, ӟыгыртӥз, чупаз. Кышномуртлы картэз кыӵе ке мукетгес луэм кадь потӥз. Кӧтыз кыстӥськемен, мугорыз веськрес адӟиське. Восьмеменыз, лэся, пиналмемын кадь потӥз. Пельпумъёсыз но шонерскемын, выросъёсыз йӧно. Яратон озьы адямиез воштэ, луоз.

Оля картэз шоры сыӵе гажаса учкиз, эшшо но эшшо чупамез, ӟыгыртэмез потэ. Соиз киоссэ палэнтӥз, шораз но учкытэк, кышнопала дыртӥз. Ӝӧк вылысь шаньгиез ӧз но адӟы кадь. Яратоно «Портвейнзэ» юэмез бере кӧтыз сюмаз, лэся: кык юдэс шаньги сииз. Нокыӵе шӧмзэ валатэк кадь сиськиз, огшоры ньылӥз. Собере шуак юаз:

— Тон мар малпаса монэн улоно кариськид, а? Сизьым ареслы мӧйы кышномурт! Мыным куатьтон арес шуккиз ке, тыныд сизьымдон пала луоз ни ук… Кызьы мон сыӵе пересен улом?!. Тонэн йырин мынам нылпиосы но ӧвӧл… Табере соос армиысь вуысалзы ни…
— Кытысь, кыӵе нылпиос сярысь озьы вераськод? — Оля чылкак паймиз.
— Тонэн тодматскемелэсь азьвыл мынам кышномуртэ вал. Кык пичи пиосын. Нош тон милемыз люкид!.. Люкид!..
— Ма, мон кужмысь тонэ кари шат?
— Ачид дорам кужмысь лыктӥд!.. Мон марзэ-созэ валаса но ӧй вутты…
Аркашезлэсь со кышномуртсэ Оля тодаз вайиз. Дорысьтыз кык пол адӟылӥз. Малы со татчы ветлэ шуыса юаз но, Аркаш оскытӥз: эшелэн туганэз, пе, со, татын ӵошен кӧлӥзы вал но, соиз вазьгес уже кошкиз. Чик но озьы вылымтэ, иське. Ма, зэмзэ тодысал ке, Оля лыктысал шат? Воргоронэз кужмысь яратыны уд косы ук.

Аркашез ӵукна уже кошкем бере Оля Татьяналы жингыртоно кариськиз. Телефонын нош ик вӧё куара кылӥськиз.
— А-а, Олечка! Кыӵе тон шудо адями! Вӧзад сыӵе кужмо, зэмос воргорон!
— Тон малы нош ик картме котырад кариськод?
— Кызьы тон уд валаськы: милям ог-огмытэк улэммы уг луы! Уг луы! Ми ог-огмылы — омыр но, ву но, тыл но!.. Эн кышка, кусыпмы — куинь сюрс иськем… Ми ноку но ум пумиське… Олечка, Аркашед тонэ яратэ. «Одноклассники» бамаз кӧня туспуктэмъёстэ пуктэм… Но малы ке тон отын сыӵе мӧзмыт? Шумпотыса пальпотыны кулэ. Сыӵе воргоронэн улӥськод ук! Дӥсед но модаысь потэмын ни… Сыӵе картэд азьын тон чебер ветлыны кулэ. Ӝужыт беро катаосын, штаниё буртчин костюмъёсын… Туспуктэмъёсыд пӧлысь мон одӥгзэ но ӧй кельшыты… Аркадиез отысь куштыны косӥ…

Йырыз курен Оля телефонзэ кыдёке сэрпалтӥз. Мар дауртэмзэ валатскемез бере телефонзэ ӝутӥз вал но, соизлэн пушкысьтыз ёзъёсыз ӵогыр-ӵогыр потӥллям. Тупатон сярысь малпанэз ик ӧвӧл, выльзэ басьтоно луоз.

Мар карыны ёрмыса, интернетэз усьтӥз но «Одноклассники» бамаз пыриз. Эшъёсыз нош кӧня люкаськиллям! Огезлэсь пӧртэм мукетыз. Егитъёсыз но, мӧйыосыз но нылкышноос асьсэлы эш утчало. Ма, воргоронъёс но вань гинэ. Паймод: чик адӟылымтэ муртъёсын но матысь кариськыны луэ вылэм. Со сярысь малпан Олялэн йыраз азьвыл ӧй но лыктысал.

Екатеринбургысь Сергей Орлов нош чебер кылъёсын, яркыт сяськаосын суредъёс, открыткаос лэзем. Оля тусбуйыз шоры ӟечгес учконо кариськиз. Йыг-йыг, чылкыт воргорон, маиныз ке киноысь артистлы укша. Пумитаз маке гожтоно ке шат? «Ӟечбур, Сергей! Кытын, мар ужаськод тон?» — «Экспедиторын. Базаысь винаосты магазинъёсы лэзьясько» — «Семьяед ӧвӧл шат? Малы кышномуртъёсын сыӵе тодматскемед потэ?» — «Семьяе ӧвӧл, дыры трос. Сюлэм шуныт мыным уг тырмы. Тынэсьтыд тусбуйдэ адӟи но валай: тон кадь нылкышно мыным кулэ» — «Мон быземын. Мыным нокин но кулэ ӧвӧл» — «Э-э, шуак озьы эн шуы. Ойдо ай эшъяськом, вераськом».

Возьыттэм! Сурон бам! Ассэ ачиз яратӥсь кыӵе воргорон озьы дауртоз? Туганъёсыз быдэс уллё, луоз, эшшо уг тырмо на. Йырыз курен Оля ноутбуксэ ик кысӥз. Картэз тани вуоз, маке сиён дасяно. Сураськем йырыныз дорзэ шедьтӥз на ке. Оло, ужаз ветлоно?

Редакциын Оляез егит нылкышно журналистъёс шумпотыса пумитазы. Но вераськон висказы огез но кыкез Олялы шуизы:
— Аркаштэ золгес кияд кут! Ассэ кизили кожаз ни, лэся. Милемын ӵош ужрадъёсы но мынэмез уг ни потылы, ас понназ ветлэ. Кыӵе ке туспуктэм лэсьтыны куриськод ке, ныр улаз маке чурытак вералоз.
Нош редакциын ужакуз, Оляен эшъяськыса улэм кышномурт сое палэнэгес нуиз но пырак кисьтӥз:
— Со интернетысь туганъёсыз Аркашед доры ветлыны кутскиллям ни ук!
— Оломар кулэтэмзэ эн супыльты! — ӧз оскы Оля.
— Озьы луэ ни со: самой матысь адями ваньзэ берлогес тодэ. Одӥгаз кӧснуналэ выж миськисьмы ужаны лыктэм но паймем:

Аркашед дорын кыӵе ке кышномурт пуке. Вӧзаз ик ӝиптӥськем, пе, оло, чупасько но вал. Адӟемысьтыз Аркашед нокыӵе ик кариськымтэ, Ульяновскысь Татьяна эше дорам куное лыктӥз, пе. Выж миськисьмы юасько, пе: оло, дорад кӧлтыны табере нуод ни? Квартирае аслам ук, шуэ, пе. Малы-о Оляез сокем ултӥяськод шуыса юамезлы, номыр вазьымтэ.

Таӵе секыт иворлэсь Оля уйжомем кадь луиз ке но, ассэ кияз кутыны быгатӥз. Аркашез доры пыратэк, магазинэ мынӥз, выль телефон басьтӥз но отчы азьвыл номеръёсты пуктыны куриз. Татьяна, иське, чик но Красноярскысь ӧвӧл — Ульяновскысь. Ма, отчыозь киын сузьымон гинэ ук! Тӥни малы доразы дуно вина пробкаос, духи зын кылдӥзы. Ӟырдэктыса ик Татьяналы жингыртӥз.
— Возьыттэм! Аркаше доры ветлӥськод ни, иське!
— Буйгатскы, Олечка! Кыӵе пыӵ тонэ нош ик куртчиз?! Малы мыным соин пумиськонэз?! Телефон пыр но яратыса милемлы тырме. Собере алигес скайп пуктӥмы, кусыпмы эшшо матынгес луиз.
— Конешно матын, сюрс иськем но ӧвӧл. Ульяновскысь тон!
— Бен, Ульяновскысь. Иже ветлыны мынам чик но дыры ӧвӧл. Тодӥськод-а, мынам куинь нылпиосы вань. Бадӟымез нылы бызиз ини, кык пиосы дорам на. Эшшо пересь анае вань на. Картэным кемалась люкиським ни. Юрӟым юыны, юмшаны ӧдъяз. Мырдэм мозмытски. Оскы мыным! Соосты ваньзэс куштыса, кызьы мон кошкыны быгатом. Олечка, улон монэ туж зол жугиз! Соин ик нокинлы урод лэсьтэме уг поты. Тыныд тужгес но. Аркашлэн кышноез шуыса, мон тонэ туж гажасько. Но милемлы кӧня ке эрик сёт! Ваньмыз ортчоз. Тон мыным тау карод али, Аркашедлэсь ӟырдыт, чебер лул-сюлэмзэ усьтыны быгатэме понна. Оскы мыным! Оскы!.. Со сыӵе кужмо, ӟырдыт воргорон! Уть сое!.. Олечка, дуное мынам…

— Фамилиед нош кыӵе тынад? — юаз Оля.
— Михайлова. Аркаш вераз, интернетын бам усьтӥд шуыса. Ойдо отын вераськом. Олечка, кыӵе шудо кышномурт тон! Сыӵе кужмо, ӟырдыт воргоронэн улӥськод!..
Нош ик — «кужмо, ӟырдыт…». Ма, кытысь тодэ ини со, картэзлэн кыӵе кужымез?! Юри иса, луоз.

Оля каньсырам кадь луиз, телефонзэ кысӥз. Кинлы, малы осконо? Кытын зэмлык?
Аркашез нош ик бер ӝыт вуиз, ураме потыса, Татьянаен вераськиз. Азьвыл сямен ик, Олялэсь палэнскыса, ас понназ сиськиз, юиз. Кудӟыса залэ потӥз но гордэктэм синъёсыныз Оля шоры сыӵе синазькыль, адӟемпотостэм карыса учкиз. Ӝӧк вылэ киоссэ поныса бурсӥз:

— У-у-у!.. Учкы, кыӵе вольыт куо соос мынам, одӥг кисыризы но ӧвӧл. Нош тынад — шуям картошка… — собере ӝӧк вылэ кык киыныз ик туж зол мыжганы ӧдъяз. — У-у-у!.. Кошкы татысь!.. Кошкы мынам коркасьтым!.. У-у-у!.. Ӟечкыд вань дыръя кошкы!.. Али ик кошкы!..

Оля диван вылэ шымырскиз. Мыжыкъёсты ныр улысьтыз адӟыса, эшшо но шуэрскиз. Таин гинэ ӧз тырмы, Аркашез балконэ потӥз, отысь укноез усьтӥз но Оляез гыж но кал отчы кыскиз.
— Тани тыныд потон инты! Тэтчы! Али ик тэтчы!.. Пересь кокрок мыным кулэ ӧвӧл!..
— Арки, мар дауртӥськод тон?!. Сазьтӥськы!.. — Оля дырекъясь куараен тэльмыре. — Уйлы пумит кытчы мон кошком… Ӵуказеозь вить ни. Вазь ӵукна ик кошко…
— Кошкод-а? — шузимыса вирӟектэм синъёсын Аркашез лек учкиз.
— Кошко, кошко… Ӵукна ик кошко…
— Ӵукна ик?..
— Ӵукна ик…

Бурсыса кышнопала кошкиз но дугдылытэк кыскыны ӧдъяз. Кылзӥськисьтэм киысьтыз ӝуатэм сигаретэз выж вылэ усе, мукетсэ кутэ. Оля дораз матэктыны кышка. Ярам, выжзы кенжисьтэм линолеумен шобыртэмын. Собере Аркашез интыяз ик выж вылэ умме усиз.

Олялэн кӧлонэз тӧлӟиз. Ма, кыӵе изён луоз на, тонэ коркась улляло ни ке. Даурез ортчем гӧршокез сямен сэрпалто. Оло, ваньмыз та уйвӧт, кӧшкемыт уйвӧт? Тани со султоз но, Аркашез шуоз: «Ойдо ай, Олие, театре ветлом. Мыным выль спектаклез газет баме туспуктыны куризы, тон нош учкод…».

Дырлэсь ортчемзэ Оля уг вала ни. Тани кышнопалась ӝуштэм куара кылӥськиз, собере нош ик — телефон пыр яратон. Со огпӧртэм вераськемзылэсь акыльтэм кышномурт кӧлон интыяз кошкыны ӝутскиз вал ини но, пель сьӧраз «вокзал» кыл шуккиськиз. Кыӵе вокзал? Мар вокзал?

— Татьяночка, тонэ келякум, вокзалысен кыӵе чупаме потэ вал… Нош тон ымнырдэ палэнтӥд? Малы?.. Кыӵе тон мынам ческыт!.. Уйёсмес тодам вайисько ке, лобаме потэ… Ку табере пумиськом?.. Ярам, ярам… Но кема эн ӝега… Татьяночка, тон мынам арбузэ, помидоре, кузял кияре… Ваньмыз, ваньмыз — тон…

Кылэмезлы оскытэк, Оля пумиз. Куаразэ мырдэм поттыса, Аркашезлэсь юаз:
— Татьянаед, иське, татчы, асьме улон коркамы, вуылэ ни?
— Нош ик тон!.. — Аркашез шораз синазькыль учкиз. — Ну, вуылӥз! Тынад нош мар ужед?! Кошкы, али ик кошкы!.. Ваньзэ тон пожаськод!.. Ӟеч улыны уд сётӥськы!..
— Иське, воргорон кужымед но улӟиз?..
— Тод: со мынам котьку вал!.. Тон ваньзэ быдтӥд! Тон!..

Мар вераны тодытэк, Оля кӧлон интыяз кыштырак кошкиз. Кытчы кариськоно? Ваньзэ тае вормыны кытысь кужым шедьтоно?

Аркашез кошкем бере «Одноклассникиысь» бамаз пыриз но Татьяна Михайловалэсь бамзэ шедьтӥз. Фотооссэ адӟемез бере эшшо но мылкыдыз усиз: ог витьтон вить аресъем сьӧд йырсиё, котырес ымныро кышномурт. Мугорыз кор зӧкта, син котыраз но ангесаз кисыриосыз Олялэнлэсь тросгес. Егит, веськрес, йӧно кышномурт луысал ке, Оля Аркашсэ валасал но, оло. Нош таӵеосыз воргоронъёслэсь йырзэс маинызы меда берыкто? Зэмзэ но, тае одӥг кылын гинэ вераны луоз: зомбировать карон.

Татьяналы гожтэт гожтытэк ӧз чида.
— Мурт семьяосты куашкатэмед понна мон тонэ каргасько!.. Кӧнязэ сурад-пожад ни, дыр?!. Сьӧлыкъёсыд аслыд ик мед берытскозы!.. Вылысь шунды ваньзэ адӟе… Солэн нимыныз каргасько!.. Нылпиосыд, анаед азьын но тыныд возьыт ӧвӧл-а?..
— Олечка, мар тонэн нош ик луиз?! — гожтӥз Татьяна.
— Мон ваньзэ тодӥсько. Аркаше доры кӧланы вуылӥськод.
— Мар тон?! Шузимид шат?!
— Аркаше ваньзэ вераз…

Та кылъёс бере Татьяна кӧнялы ке ышылӥз. Аркашезлы жингыртӥз, луоз.
— Олечка, вождэ эн вай… Малы Аркашлы сое тыныд верано вал… Макем ӧжытгес тодӥськод, сокем ӟечгес кӧлӥськод… Вала ук: милемлы дас вить арес ӧвӧл ни интернет пыр гинэ яратыны. Ог-огмес адӟеммы потӥз. Мон малпасько вал, яратоно воргоронэлэсь кизэ куто, вань сюлмысьтым ӟыгырто но, сюлмы буйгалоз… Ачид тодӥськод ук: зэмос воргорон соин гинэ уг буйга… Кыӵе со тынад кужмо, ӟырдыт! Одӥг кылын вераса — ужпи!.. Дас пиосмуртъёсты воштоз, ява!.. Туала арын сыӵеосты шер пумиталод… Эн карга монэ. Дас куинь арзэ ини воргоронтэк улӥсько, нокинэн пумиськылытэк. Сыӵе ӟырдыт воргоронлэн кужымез тыныд но, мыным но тырмоз… Кӧня семьяос озьы уло…

Олялэн шоканэз ик пытсаськиз. Таӵе ултӥянэз чиданы уг луы. Дыртыса телефонзэ кутӥз но Мишалэсь номерзэ утчаны ӧдъяз. Алигес нош ик жингыртылӥз вал: ойдо пумиськом, мон огнам кыли, пе. Люкиськемзы дырысен кызь ар ортчиз ини ке но, Миша Оляез вунэтыны уг быгаты, лэся. Оля, оло, пумиськылысал но, Аркашсэ ултӥямез ӧз потылы. Азьвыл сямен ик яратонзы гомӟиз ке, мар кароз? Ма, ӧй гомӟысал, вылды. Оля Аркашеныз дышиз вал ини. Мӧйымыса мултэс ӟырдыт яратон кулэ ӧвӧл ни, зыл-зыл кошкись улонэз гинэ со пожаны быгатоз. Ӟырдыт яратон, дарт, кӧс вайёслэсь тылскем кадь шуак гомӟе но чаляк кысэ. Шунытэз лул-сюлэмез кема шунтэ ке, умой ини, но ӵемысь со кезьытлы берыктӥське. Оляен Миша куспын но озьыгес луиз. Яратонзы ӝыны арлы гинэ тырмиз.

Миша вылтусын туж чебер, тузӥ вал, Инди кинофильмысь артистлы укшаз. Нош кырӟаны ӧдъя ке, шулдыръяськонысь вань калыкез чебер, небыт куараеныз бордаз кыскылӥз. Синмаськымон эктылӥз но. Ужаны но азьтэм ӧй вал. Но семья кылдытыса ӧз вуттэ. Тросэз шоразы синмаськыса учкылӥзы угось: ог-огдылы туж тупаськоды, пе. Син уськытӥзы, луоз. Миша борды нылкышноос, кутъёслэн чечы борды кыстӥськемзы сямен, тросэн няняськылӥзы. Кыӵе-о воргорон чидалоз? Уй-нуналэз адӟылытэк юмшаны ӧдъяз. Олялы шунытэз ӧжытгес но ӧжытгес кылиз. Мишалэн люкиськемез уг поты вал, но Олялы сыӵе мыдланес улон акыльтӥз. Собере кылӥз: Миша аслэсьтыз трослы егит кышномуртэн улэ, пе.

Табере тани берло аръёсы Миша кӧня ке пол солы жингыртылӥз ни. Телефон номерзэ но кытысь ке шедьтэм ведь. Мар солы луэм? Оло, солы но таӵе ик секыт? Пумиськоно, одно пумиськоно!
— Миша, Оля та. Тон кытын-о?
— Олие!.. Мусое мынам!.. Али ик лыкты!..
— Кытчы?
— Ипподром доры остановкае пот но, мон пумитало.

Берпум осконзэ ыштэмезлэсь кышкаса, Оля дыртыса квартираысьтыз потӥз.
Пумиськыны вераськем дугдылонниын Мишаез возьмаса сылыкуз, сюлмыз егит дыръяз сямен йыг-йыг! гинэ жугиськыны ӧдъяз. Иське, кемалась ортчем ӟырдыт яратонлэн тылӝуэз тэля на вылэм.
— Олие! Тон вуид?! Мон доры вуид?! Тон сыӵе ик чебер!.. — Оля борды кыӵе ке воргорон ӟыгырскиз.

Шораз умойгес учкиз но, ангес шорысьтыз пичи гопезъя, ӧжытак чатырес нырызъя Мишаез мырдэм тодмаз. Синмаськымон чебер пиосмуртлэн номыриз кыльымтэ ни. Вожалэс-лыз синъёсыз ӟаректэмын, шер-тур кылем йырсиез пурысьтамын.
— Миши, мар тонэн луиз?! — Оля паймемзэ ватыны ӧз быгаты.
— Егит кышное куштӥз. Жаль, берло гинэ ваньзэ валаськод вылэм. Тон мынэсьтым вить арлы бадӟым вал бере, весь егитъёссэ, чеберъёссэ утчай. Ойдо дорам мыном.

Мишалэн квартираез вылымтэ, мурт дорын патерын улэ. Пичи гинэ сэрегын ветлон интыез ик ӧвӧл. Котькытын сур, вина ӟенеликъёс костасько.
— Октӥськыса ӧй вуттты. Малпамтэ шорысь жингыртӥд ук…
— Азьвыл интыяд ик-а ужаськод? — Олялэн тодэмез потӥз.
Миша техникумез быдтэмын, тодматскыкузы улон коркаос лэсьтонын мастерын ужаз. Сюлмысь тыршемез понна премиос но, данъян грамотаос но октылӥз.

— Отын ик… Но мыным адямиосын ужаны акыльтӥз. Али огшоры юрттӥськись.
— Кызьы сое валано?
— Ну, кирпич нуллӥсько, раствор лэсьтӥсько… Уж тырме… Шедьтэм ма сярысь вераськыны. Асьмеос пумиським!.. Сьӧрад номыр но ӧд басьты-а?
— Мар?
— Ма, пумиськонмес кӧсын ортчытом шат?

Миша буш ӟенеликъёс пӧлын шылтыр-шалтыр утчаськыны ӧдъяз.
— Кыльымтэ ни, ваньзэ быдтӥськем. Эх, тодысал ке!.. Таӵе пумиськон понна…
— Мон вина уг юиськы. Ойдо пуком, вераськом.
— Олие, мынам йыры пиле… Сурен ке но веськатоно… — кисыоссэ ик берыкъяса, коньдон утчаны ӧдъяз. — Копейка но кыльымтэ… Тынад вань, дыр.
— Вань. Ме, тани сюлык.
— Тӧдьы йыроезлы узгес тырмы…
— Ме, эшшо витьтон.

Пичи мурт кадь шумпотыса, Миша ури-бери магазинэ бызиз.
Оля солэсь улон сэрегзэ умойгес учкиз. Даурзэ ортчытэм пичи гинэ шифоньерез усьтӥз. Кема нуллыса ӟаректэм кык курткаосыз, пӧсьтэм штаниосыз но кӧня ке дэремъёсыз сяна, отын номыриз ӧвӧл. Иське, ӟечгес штаниез — вылаз гинэ. «Э-э, Миша, Миша, со пинал кышноосыд тонэ тани кытчы вуттӥзы» — Мишаез жаляменыз, Олялэн сюлмыз ик шымырскиз.
Миша пельдорозяз ик пальпотыса вуиз. Ӟенеликсэ усьтыны дыртэ, дырекъясь киосыз уг кылзӥсько. Оля учкыса сылӥз-сылӥз но, ӧз ни чида, ӟенеликсэ киысьтыз басьтӥз.

— Тон мар?.. — туж дуно мае ке лушкакузы сямен, Миша ӟенелик борды кык киыныз ик кырмиськиз. — Уг сёты!
— Эн кышка… Ачим усьто.

Пичи улон сэрег курыт виналэн зыныныз тырмиз. Миша чаркаос утчаны ӧдъяз вал но, ӧз шедьты. Олялы кыӵе ке курмем стаканэ пальккиз, ачиз ӟенеликысь дурыныз юыны ӧдъяз. Собере шуак тодаз лыктӥз:
— Пумиськеммы понна, Олие. Ойдо шуккиськом!

Оля кырсь стаканэз юрдыса ӝутӥз вал но берен пуктӥз.
— Мон уг юиськы, Миша.
— Висиськод-а, мар-а?
— Висисько.
— Ну, соку валамон.

Ӟенеликез бушатыса, Миша стаканысьсэ но юиз на. Туж чаляк каньсыраз но интыяз ик умме усиз. Корка тыр соргетыны ӧдъяз. Сьӧд чилясь йырсиоссэ тодаз вайыса, Оля Мишалэн йыр бордаз йӧтскиз, маялтӥз. Собере пичи сумказэ усьтӥз, сьӧраз кутэм вань коньдонзэ ӝӧк вылэ понӥз но ураме потӥз. Куазь пеймытскем ини. Азьзэ-берзэ учкытэк бызе, бызе, бызе… Синвуосыз шурен васько.

Учке но, азьпалаз трамвай лыктэ. Пырак — шораз… Мед ойдо лыктоз, Олялэн курадӟонэзлы со пум поноз. Мальдытӥсь тылъёс шоры кышкатэк учке. Тани соос матэ но матэ вуо…

Дугды ай, дугды… Нош Татьяна… Нош Аркашез… Соослы пунэмзэ кин берыктоз? Аслаз улонэз сыӵе дунтэм шат?!. Вань курадӟемъёсыз понна, ултӥямзы понна пунэмзэ берыктыны кулэ! Одно кулэ!

Трамвай линия вылысь шуак потӥз но дор палаз дыртӥз. Аркашез дораз вылэм. Ужрадэ мынӥсько, пе, ма но со куртчыны пыри. Тугаськем йырсиоссэ утялтыса, дугдылыса-дугдылыса, сюлмыз шуген Оля мырдэм вазиз:
— Арки… Мон со… Татьянадэ… бамысьтыз учки… Кунян ваёно скаллы кельше ук… Шаньги кадь ымныро…
— Тод: скал йӧлыныз сюдэ, нош шаньгиен кӧт тыре, — ӧсэз йыг ворсаса кошкиз.

Оля «Одноклассникиысь» бамзэ усьтӥз. Али со ваньзэ-ваньзэ татчы гожтыса кельтоз. Кин но кызьы сое йырзэ быдтонозь вуттӥз, кыӵе ултӥянъёсты чидаз. Мукетъёслы валатон сётоз: интернет огшоры шудон арбери ӧвӧл, отын туж чакласькыны кулэ.

Бамаз Сергей Орлов олокӧня пол пырам. Сыӵе чебер кылъёсын гожтэтъёс гожъям, горд роза сяськаосын открыткаос лэзьям. Оля солы ваньзэ вералоз. Нимын-тулын, адресэн. Нош со полицие мед вазиськоз. Татьяна кадь кышномуртъёслэсь кылзэс мед юалозы. Сыӵеослэн интызы — пытсэт сьӧрын.

Олялэсь гожтэмзэ Сергей лыдӟиз но малпамтэ шорысь гожтӥз:
— Малы тыныд со полициосын выронэз. Екатеринбург кыдёкын ӧвӧл, мон ӵуказе ик вуо. Со ашкынэм карттэ сыӵе посо! Кулэ ке, озьы лэсьто, шӧйзэ но уз шедьтэ ни. Нош асьмеос пыраклы ӵош кариськом. Тон кадь чебер кышномуртъёс пыд улын уг лошъясько.

— Аркаш отын янгыш ӧвӧл. Ваньзэ Татьяна сураз.
— Татьянаез сайт бамысьтыз учки. Паймоно кадь, картэд сыӵе сумбрес кышномуртэн тонэ воштэм. Осконтэм. Тон мыным кылдэмын, иське. Квартираед вань-а?
— Вань, но приватизировать каремын ӧвӧл. Отын квартирант возисько. Нош мон картэ дорын улӥсько. Соин ик монэ улля. Та ваньмыз мынам, шуэ.
— Мыным одно лыктоно! Одно! Ваньмыз асьмелэн луоз!
— Оло, нырысь телефон пыр гинэ вераськом? Умой-умой тодматском.
— Ваньзэ чаляк лэсьтоно!.. Валатскыса медаз вуэ…
— Кинъёс?.. Мае?..
— Асьмелэсь кусыпмес. Олечка, Интернет — паймымон дунне. Тани тон вань малпанъёстэ мыным усьтӥд. Нош отчы кин ке пырыны быгатӥз ке?..
— Мед тодозы. Со ашкынэм кышномуртэ мед кутозы.
— Телефон номердэ вай. Кык-куинь нуналзэ мон чидало. Тонэн уен-нунал вераськом, кызьы шуиськод, умойгес тодматском…
— Яралоз. Туж курисько: эн лыкты, картэ отын янгыш ӧвӧл…
— Адрестэ но гожты.
— Адресме уг сёты. Кин тодэ, оло, чик но ум тупалэ ай.
— Яралоз… Жингыртэмме вить…

Сергейлэсь жингыртэмзэ Оля чидатэк уйбыт возьмаз. Телефон чал-чал улӥз. Мар ке, оло, луиз шуыса, Оля интернет бамаз пыриз но пуконысьтыз пограське вал: чылкыт ымныро Сергей Орлов интые, ымзэ бадӟым усьтыса, туж шӧтэм воргоронлэн тусбуйыз потӥз. Олялы гожтэм:

— Олокин тодмотэм муртъёслы сюлэмдэ ноку эн усьты. Мурт адямилы куректонэд но, шумпотонэд но кулэ ӧвӧл. Ваньмыз ассэ гинэ тодыса улэ.

Собере Татьяна жингыртӥз. Куараез дырекъя.
— Оля, тон мар дауртӥд!.. Ваньзэ Ирина Симаковалы верад ук. Со озьы, воргорон кариськыса, тон доры потэм. Тодэмез потэм, малы Аркаш сое куштӥз. Соос туганъяськыса быдэс толэзь улӥзы ук. Мырдэм люкыны быгатӥ. Аркашлэсь йырсазьзэ аспӧртэмлыко программаё открыткаен сураса возиз. Сое Аркашлы лэзе но, соиз визьтэммытозяз яратыны кутске.

— Нош тон солэсь адӟем кариськод-а?
— Оля, вань гожтэмъёстэ мыным Ирина лэзиз. Мыным пунэмзэ берыктыны луоз шуыса, сыӵе шумпотэмын. Соосты али ик ӵуш! Нокин медаз адӟы.

— Уг ӵушы. Тон кадьёсты ваньмыз мед тодмалозы. Суд улэ мед кыскозы.
— Кызьы тон уд валаськы: Ирина — аферистка. Квартирадэ но басьтыны быгатоз, астэ но, карттэ но быдтоз.
— Котьма мед луоз. Мыным югыт дунне вылын кема улыны кылдымтэ ни… Тон Ириналэсь номырин пӧртэм ӧвӧл.
— Оля, кулэ ке, мон Аркаштэ лэзё… Али ик лэзё… Монэ тодаз но уз вайылы ни. Кулэ-а?
Югдур тазьы берытскоз шуыса, Оля ӧз но малпалля. Зэмзэ но, Татьяналэн сьӧлыкъёсыз трос, дыр, суд улэ сюрон сое сыӵе кышкатӥз бере. Мар кароно? Осконо-а, ӧвӧл-а?

— Аркашме лэзид ке, ваньзэ вунэто. Но выльысь йырзэ сураны ӧдъяд ке, полицие чагисько. Лул-сюлмам куинь толэзь ӵоже сяламед понна пунэмзэ берыкто. Валад-а?
— Дуное мынам, чебероке, визьлюке…

— Уз пӧрмы, Татьяночка!.. Мынам йырам мукет программа пыремын ни… Сое номырин ӵушыны уд быгаты.
…Куинь нунал ӵоже Аркашез мае ке ыштэм мурт сямен ветлӥз. Интернет бамзэ вунэтыса, я книга-газет пӧлын бугыръяське, я холодильнике пыре но номыр басьтытэк ворса. Собере юнме шорысь ванное пыре, балконэ потыса, укноез усьтэ но кытчы ке кема-кема учкыса сылэ. Чырым но уг сиськы, дугдылытэк тамак кыске.

Оля номыр уг куареты, чал-чал улэ. Ньылетӥ нуналаз Аркашез малпамтэ шорысь шуиз:
— Оли, маке ческыт сиёндэ потты ай. Кӧты сыӵе сюмаз! Быдэс такаез но сиыны дась!

Оля пыжем курегез микроволновкаын шунтӥз но ӝӧк вылэ пуктӥз. Аркашез со борды уралмем мурт сямен омырскиз. Оля но вӧзаз пуксиз вал но, амалтэк султӥз, палэнскиз: синвуосыз быльыраны ӧдъязы. Аркашез та бӧрдэмзэ медаз адӟы.

3

Кузпалъёслэн улон-вылонзы огсямен мынӥз. Аркашез куддыръя интернетаз ышылӥз ке но, дорзэ ӧз вунэтылы. Озьы ке но Оляез ӵемысь кыӵе ке валантэм сюлэмшугез курадӟытылӥз. Коркасьтызы омыр дырын-дырын адскисьтэм тылын ӟырдатэмын кадь потылӥз. Янгышен мыдлань лёгиськыны шедьтӥзы ке, ваньмыз гомӟоз, лобӟоз.

Одӥг ӝыт Аркашез ужысьтыз усем мылкыдын вуиз: фотоаппаратэ сӧриськиз, пе. Тупатыны мастерское нуллэм но, дуно усёз шуиллям, выльзэ басьтыса умойгес луоз, пе.

— Редактордылы вера, мед басьтозы. Весяк аслад фотоаппаратэныд ужаны кулэ шат, — ӵектӥз Оля.
— Ваньмыз асьсэлэнэн ужало. Номырин туспуктылыны ке, мукет уж утча, шуоз редактор, — мылкыдтэк вазиз Аркашез.
— Уз шуы. Тон кадь сюлмозэ, быгатӥсьсэ уз шедьтэ. Фотоаппаратъёс басьяны нош кӧня коньдондэ кисьтӥд ини! Уждунэд ке, ваньмызлэсь ӧжыт. Мынам пенсиеным сиськыны гинэ тырмытӥськом.

— Озьы ке но кредитэн фотоаппарат басьтоно луоз.
— Ма, али гинэ кредитэн холодильник басьтӥм ук… — чабкиськиз Оля, собере йырзэ ошыса пукись Аркашез жаль потӥз но юаз: — Дуно-а соос али сыло?
— Басьтоно ке, ӟечсэ басьтоно ни. Ньыльдон сюрс манет пала луоз.
— Кредитэн витьтонлэсь но ортчоз, — лулӟиськиз Оля.
— Мон лыдъяй ни: кык арлы люкимы ке, толэзяз кык сюрс манет пала гинэ тыроно луоз.
— Кык сюрс манет, Арки, асьме понна али бадӟым коньдон. Эн вунэты: холодильниклы куинь сюрс тыриськом на ук. Дунъёс нош кыӵе будо! Туннэ няньлы магазинэ пыри но, аслам синъёсылы ӧй оскы: уй ӵоже куинь манетлы будэм. Сӥльтэк, колбасатэк тонэ уд возьы. Соослэн дунзы эшшо но трослы йылэмын. Квартира, тыл, ву, газ, телефон, телевизор, интернет понна — веранэз ик ӧвӧл. Та пичи сэрегмы понна но кӧня люкаське. Ярам, мон интернетысь куштӥсько, нош тон — тамакедлэсь но винаедлэсь. Тамакез одӥг пачказэ сю витьтон-кык сю манетозь будэтыны малпало ни ук.

— Яралоз, ӵуказе редакторлы йыбыртто. Оло, басьтыны пумит уз луы.
Редакторлэн валамезлы Оля туж оскиз вал, но соиз Аркашезлы шуэм: бюджетысь коньдон уждунлы гинэ висъяло, пе, нош рекламаен поттэмез чыры-пырыен кагазъёс но мар басьтыны кошке, фотоаппаратлы уз люкаськы. Мар карод, асьсэлы кредитэн басьтоно луиз.

Оля котькуд коньызэ шыръяны тыршиз ке но, выль бадӟым холодильниксы ӵемысь буш сылӥз. Кытысь ке уж утча вал но, пенсионеръёслы тусьты-пуньы яке выж миськон гинэ ӵекто. Нош Олялэн киыз хлорка вуын сульпаны ӧдъя, дораз перчаткиоссэ арнялы быдэ вошъяно луэ. Ма, кыӵе ке нылпи садын уйёсы возьмаськисе мыныны луысал, дыр, но Аркашез чутрак пумит кариськиз: кин ке лушкаськыны пыриз ке, гольык киын мар карод, пе, эшшо ке астэ кышкатозы. Быдэс улонзэ Оля журналистын ужаз бере, статьяос гожъямез луысал, вылды. Но табере журналистъёс жаг мында ляльӟемын, газет баме шедьыны секыт. Собере одӥг-кык статьялы трос-а басьтод ни?

Ӝыны арзэ Аркашез чидаз ик. Тамаксэ ӧжытгес пурккетэмысьтыз но виназэ шергес юэменыз, ымныр тусыз сайкытомиз ни вал. Но одӥг ӝыт пурӟыса вуиз, кияз — «Портвейнэн» кык ӟенелик.

— Мар улон та! Кыкнамы дышетскемын, нош калык сямен сиыны-юыны но ум быгатӥське! Кыӵе странаын таӵе асьмеос улӥськом! — ӟенеликъёссэ ӝӧк вылэ йыг! пуктылыса, Олялы лек вазиз: — Мар сыӵе учкиськод? Кулон азьын ке но погратозь юо!

— Осто, Арки! Мар вераськиськод тон?! Тодад вай али, война аръёсы калык кыӵе улӥз! Сиемзы потэмен тордылӥзы ук! Озьы но ваньзэ чидазы, кулон сярысь ӧз ик малпаськылэ. Нош асьмелэн, Инмарлы тау, ӝӧк вылысьтымы няньмы уг бырылы, ма, пичи-пичи зумытсэ но басьтыны быгатӥськом.

— Мыным пичи-пичи кулэ ӧвӧл! Кураськись, ляльчи шат мон! Мон — фотокорреспондент! Валаськод-а?! Быдэс элькунмес калыклы возьматӥсько! — собере вылысьтыз штанизэ кылиз но Олялэн ныр улаз донгыса кеськиз: — Кин таӵе сурыкмемен ветлоз? Мон гинэ! Мон!

Трос бызьылэменыд штаниосыд вылад ик, оло, ӝуало шуыса, Оля вераны турттэ вал но, возиськиз. Аркашезлэн ӝожтӥськемаз шонерез но вань угось. Ярам ини, юыса мед буйгалоз. Ӵуказе ваньмыз интыяз пуксёз ай.
Ӵуказеяз Аркашез, зэмзэ но, ӝутскем мылкыдын вуиз. Уж шедьтӥ, пе.

— Газетысь кошкиськод шат? — паймиз Оля.
— Газетын но ужало, интернетын но… Интернетын одӥг туж визьмо кышномуртэн тодматски. Шонерзэ вераса, тодматӥзы. Америкаын улэ. Ӟуч. Тӥни со интернет пыр коньдон поттыны проект малпам. Асьме кадь ёрмисьёслы юрттон вылысь. Конешно, мыным трос дышетсконо луоз, уйёсы пукылоно. Америкаын соку нуназе вакыт ук. Эн гинэ люкеты, ваньзэ вормо.
Оля мар шуыны ик ёрмиз. Интернет пыр пӧртэм арбериосын вуз каро шуыса тодэ, нош коньдон поттон сярысь кылэмез ӧвӧл.
— Маке осконтэм, Арки.
— Быдэс Америка, Европа со проектын ужа. Асьмеос гинэ улонлэсь бере кылиськом.

Аркашез нош ик дорзэ вунэтӥз. Редакциын ик кӧланы ӧдъяз. Ӝамдэ адӟиськылыкузы, Оляез ӝутскем мылкыдын ӟыгыртоз, чупалоз но бызьыса кошкоз. Дыры чик ӧвӧл, пе, дышетскыса-дышетскыса йыры тани мушко быдӟа луиз ни. Нош кӧня ке нунал ортчыса, шунды кадь пальпотыса шуиз:
— Олие, монэ проектэз Россиысь калык пӧлы вӧлмытӥсьлы юрттӥсь каризы. Нош асьме палан — мон кивалтӥсь.
— Кинлы юрттӥсь? Кытын со пуке? — Оля Аркашез шоры оскытэкгес учкиз.
— Ульяновскын, — нокыӵе кариськытэк шуиз кузпалыз.
Олялэсь кисырскем ымнырзэ адӟыса, бордаз ӝиптӥз:
— Мар тон?! Туж визьмо кышномурт, Людмила. Америкаысез но Людмила. Куддыръя соосты сураллясько но, ява. Скайп пыр вераськиськом ке но, ымнырзэс уг возьмато угось.
— Кин тодэ, оло, соос одӥг мурт. Чакласькысагес ужа, Арки.
— Уд оскиськы ке, ойдо сьӧрам. Тодматскод, вераськод. Собере милемлы тынад юрттэмед кулэ луоз… Эх, Оли, коньдонэд дурыныз кисьтӥськоз!..

Оля ӝегатскытэк Аркашезлэн интернетаз мынӥз. Зэмзэ но, скайп возьматӥз, Америкаен вераськиськод шуыса. Паймеменыз Оля гуньдэм кадь луиз вал но, Людмилалэн туж мыло-кыдо вазьылэмез кылзэ-ымзэ усьтӥз.
— Олечка, ӟечбур! Милям татын ужан нунал кутскиз ини, нош тӥляд йылпумъяськиз ни, дыр. Кыӵе мылкыдыд?
— Номыр ӧвӧл кадь.
— Мар сыӵе ӝожмыт? Шумпотыны кулэ тыныд, Олечка. Аркашед сыӵе тыршись! Но солы вӧзаз юрттӥсь кулэ на. Огназлы секытгес йӧтоз.
— Маин быгато?
— Ульяновскысь Людмилаен герӟаське али, со ваньзэ тупен-тупен валэктоз. Я, ӟеч лу, Олечка! Оскы, ваньмыз пӧрмоз.

Ульяновскысь Людмилаен скайп пыр вераськыкузы, Олялы солэн куараез дырын-дырын тодмо кадь потылӥз. Оло, Татьяна?! Но солэн куараез небытгес, векчигес вал кадь. Собере ассэ ачиз буйгатӥз: Татьяна луысал ке, Аркашсэ уйжомытысал ни.
— Людмила, ойдо ог-огмес адӟыса вераськом, — куриз Оля. — Озьы матынгес луысалмы.
— Мынам ымныры шуш, калыкез кышкатэмелэсь шӧмисько. Ха-ха-ха! — гор-гор серектӥз Людмила.

Серектэмез кылыса, Олялэн вылтыраз пӧсь ву кисьтӥзы кадь: сыӵе тодмо потӥз, Татьяналэн кадь.
— Олечка, мар чалмид? Кытын тон? — Людмила шугъяськыны ӧдъяз.

Вӧзаз сылӥсь Аркашез Олялэн кӧтурдэсаз мырӟиз:
— Монэ возьытэ эн уськыты, вераськы…
— Скайп пыр вераськеме ноку ӧй вал на, кылы-ымы быгыльмиз, лэся, — мырдэм вазиз Оля.
— Ха-ха-ха! Улонлэсь бере кылиськод, Олечка. Кылзы: проектысь структураез азинтон понна Аркашлы одно ик куинь муртэ шедьтыны кулэ. Отчы пырыны дас одӥг сюрс манет коньдонэн лицензия басьтоно. Аркашлы мон юрттӥ, пунэмен коньдон сётӥ. Ужмы умой мынӥз ке, берыктоз. Но мукетъёсызлы одно тыроно луоз.
— Ма, кин сомында коньдон шедьтоз? Узыръёс милемын уг кушласько.
— Олечка, со тырем коньдонзы дас пол но, кызь пол но тросэн берытскоз.
— Кызьы берытскоз? Мар со понна кароно?
— Мар карыны Аркаш ваньзэ тодэ. Тон адями шедьтыны гинэ юртты.
— Уг тодӥськы, быгато меда… — компьютер дорысь Оля мылкыдтэк султӥз.
— Быгатод, быгатод, Олечка! — Людмилалэн чан-чан куараез быдэс кабинетэ шуккиськиз. — Мерседесен ветлэмед потэ ке, быгатод!

Скайпез кысэмез бераз Аркашез Олялы пыриськись куараен вазиськиз:
— Оли, Лидаен вераськы вал. Нош мон «Одноклассники» бамысьтым эшъёсылы вазисько. Оскисько: асьмелэн ваньмыз пӧрмоз! Мар со — дас одӥг сюрс манет! Коньдон-а со?
— Ку-о сыӵе узырмид ни, Арки?
— Тани, учкы, алигес гинэ телефонам гожтэт вуиз, тыныд ньыль сюрс манет лэзиськом шуыса, — пальпотыса телефонысьтыз возьматӥз Аркашез.
— Мар понна? — кышкатскиз Оля.
— «Мар понна, мар понна?» Ужаме понна. Юнме шат уйёсы татын пукисько.
— Монэ но, оло, дышетод? — Олялэн мылкыдыз ӝутскиз.
— Отчы тыныд пыриськыны кулэ ӧвӧл, Оли. Уд вала. Уйёсты, эсьма, ӟеч кӧлалод. Мон тани быдэс толэзь дышетскисько ини, озьы но пумзэ-йылзэ уг шедьтӥськы на.
— Ма понна соку коньдон басьтӥськод?
— Виртуаль дунне со, Оли. Отын ваньмыз йырын гинэ малпаса лэсьтӥське. Интернет пыр кинэн ке тодматскиськод, вераськиськод, собере солэсь вордӥськем арзэ, нуналзэ, толэзьзэ, адрессэ куриськод но анкетае пыртӥськод. Со понна адями сбербанк пыр кӧня ке коньдон лэзе. Нош анкета виртуаль дуннеын берга но берга, котькудӥзлы пичиен коньдон пыртэ. Макем трос калык отчы пыриське, сокем тросгес коньдон берга. Нош мон кивалтӥсь бере, мыным тросгес донгиське. Эшшо одӥг проектын ужасько на. Маркеръёс гожъясько. Кыӵе ке арбериосты тросгес мед басьтозы шуыса, реклама лэсьтӥсько. Со понна но мыным коньдон вуэ.

— Номырзэ уг валаськы. Виртуаль дунне малпам маке бере, коньдон но зэмос луыны кулэ ӧвӧл кадь ук.
— Мон но озьы малпасько вал… Тани зэмос коньдон вуиз ук. Сое Людмилаос туж ӟеч валало. Мон но дышо ай, Олие. Оскы. Нош эшшо тросгес коньдон басьтон понна асьмелы куинь муртэ шедьтыны кулэ. Одно шедьтоно.

Редакциысь Оля суро-пожо мылкыдын потӥз. Малпаськыса-малпаськыса со виртуаль шуон дуннезы йыраз уг тэры. Ярам, кӧня ке манет гинэ коньдон тыроно луысал ке, но ведь таяз проектазы дас одӥг сюрс кулэ, пе. Собере кызьы со суменак будэ?

Озьы ке но Олялэн Аркашезлы сюлмысь юрттэмез потӥз. Лида эшезлы жингыртӥз, ваньзэ пыр-поч вераз. Соиз пырак ӵогиз:
— Мон музъем вылтӥ ветлӥсько, Оли. Йыры быгылес, кӧты котырес. «Ачим серемес» луэме уг поты. Валад-а?
Солы пумит мар шуод на. Мукет тодмоосызлы вазиськыны Оля ӧз ни дӥсьты. Ачиз но мазэ-созэ уг вала бере, кызьы соосты виртуаль дуннеязы кыскод? Ӵок ини, Аркашез ачиз ик мед утчалоз ни. Отын эшъёсыз пумтэм.

Ӝытъёсы Аркашез сокем бер ӧз вуылы ни. Ужме йылаз-пумаз вуттыны Ульяновскысь Людмила юрттэ, пе, со ик структураяз адями но шедьтэ. Котькуд нунал сямен — кияз дуно колбасаосын, пыжем сӥльёсын, коньякен.

Одӥг ӝыт Оляез тыр ӝӧк сьӧры вӧзаз пуктӥз но йӧно кариськыса шуиз:
— Адӟид-а, кызьы улыны кулэ!.. Табере мон котьма басьтыны быгатӥсько.
— Машина но-а? — оскытэкгес юаз Оля.
— Калыкен ужаны кулэ шуи ке, солы но коньдон сётозы. Мон кузё ук.
— Кин сётоз?
— Кытысь мон тодӥсько? Америка, дыр. Проект отын малпамын ук.
— Ой, Арки, ӟечлы меда та? — Оля мылкыдтэк ӝӧк сьӧрысь султӥз.
— Я, я, ваньмыз умой луоз. Тани мыным Екатеринбурге ветлыны ӵекто. Структурае пырыны отын трос калык люкаськиз ни, нош мар бордысен кутскыны уг тодо. Дышетыны ветло.
— Ма, ачид но дышетскиськод ук ай.
— Мар но со валасько ини. Собере Ульяновскысь Людмила юрттыны кариськиз. Калыкен кызьы ужаны огпол, кык пол возьматоз но…
— Ма, татчы, Иже лыктыса, возьматэмез уг луы шат? — сюлмыз шуген Аркашсэ Оля ӝыныё дугдытӥз.
— Татысь нокинэ но бордамы кыскыны ӧм быгатэ ук. Шыр кадь кышкасесь. Мукет интыосын озьы ӧвӧл. Тани толон Тайшетысь, Киевысь пыризы. Табере соос мукетъёссэ кыскозы. Екатеринбургын но трос люкаськизы ни. Но соосын ужано на… Табере мыным, Оли, быдэс Россиетӥ ветлоно луоз. Отпуск нуналъёсме араз кӧня ке поллы люкыло. Редакторлы верай но, шум гинэ потӥз: интыям нимысьтыз адями кутоно уз луы. Кӧня ке нунал азьпаллы фотоос дасяло но — мон эрико!
— Нош ужрадъёсы кин ветлоз?
— Уз ёрме. Табере котькуд журналистлэн фотоаппаратэз вань ни.

Екатеринбурге мыныны шуыса, Аркашез выль костюм, дэрем, галстук, куртка басьтӥз. Калык азьын кивалтӥсь йӧно, оскымон мед адӟиськоз, пе. Соку ужзы но азинскоз, коньдон но жильдӥськоз.

Сюрес вылэ потыкуз, эмеспи кадь чебер дӥсяськем картэз шоры Оля сюлэмшуген учкиз: та валантэм сюресэз кудпала, кытчы вуттоз меда? Нош шара шуиз:
— Олокинъёсын эн кушласькы, Арки. Ымад пыре ке, ваньмыныз эшъяськемед потыны ӧдъя. Я, сюресэд вольыт мед луоз!
— Тон монэ весь огшоры корреспондент кожаськод, лэся? Таӵе ужын, Оли, юыны сьӧлык.

Екатеринбургысен Аркашез вуэм нуналаз огпол жингыртӥз но кык нуналлы ышиз. Бер ӝыт ини ёрмыса Оля ачиз жингыртоно кариськиз. Кузпалыз дыртыса шуиз:
— Эн люкеты. Ужасько.
— Ку-о вуод?
— Уг тодӥськы, калык трос. Уй но, нунал но ужаськом.
— Людмила вӧзад-а? Вераськем потэ вал.
— Кыӵе Людмила?
— Ма, соин мынӥськом шуид вал ук…
Номыр валэктытэк, Аркаш телефонзэ кысӥз.

Оля нош ик куректон дуннеяз усиз. Сюлмыз шӧдэ: Аркашсэ нош ик кыӵе ке кышномурт сьӧлтаз, луоз. Мар адӟон та?! Малы соослэн улонзы калыкъёслэн сямен огсыр уг мыны?! Ма, нокин но сюлмаськонъёстэк, куректонъёстэк уг улы, дыр, но, эшшо одӥгзэ чиданы кужмыз тырмоз на меда?

Аркашез ньылетӥ нуналаз вуиз. Ӧс вамен пырыса вуттӥз гинэ но, Оляез ӟыгыртӥз, чупаз.
— Эх, Олие, улом ке, улом! Дунне — асьмелэн! — кылиськытэк ик корка шортӥ поръяны ӧдъяз.

Оляез но сьӧраз кыске вал но, кышномурт пыкиськиз. Дурыстэм шумпотонлэн аслаз сьӧлыкъёсыз, кырыж кожонъёсыз. Олялэн валамезъя, дунне огсырлыкез яратэ. Ваньмыз радызъя, гань-гань мыныны кулэ. Ӟеч инкуазьын сямен. Нош дурыстэм пӧсь яке кезьыт, пыд йылысь погыртымон пельтӥсь тӧл яке дугдылытэк усись зор кӧня изъян лэсьтэ.
— Арнязэ редакциын ужамъясько но Москвае лобӟо! — уртчись мылкыдзэ кутыны вормытэк, Аркаш Оляез нош поръяны сьӧраз кыскиз.
— Кулэ ӧвӧл, Арки, йыры пороме.
— Э-э, вунэтӥськем, тон пенсионер ни ук! Нош мынам мылкыд лоба на! — киыныз шонтӥз но кылиськыны ӧдъяз. — Ме ай тани таин магазинэ пота. Дунозэ, ческытсэ басьты. Нош таосыныз кредитъёсмес тыр, — пуш кисыысьтыз вить сюрс манетлыкъёсты поттӥз но, жагез сямен, выж вылэ сэрпалтӥз.
— Осто, Арки, мар сомында коньдонэн пазяськиськод?
— Мын, мын!
— Ойдо ӵош. Мон мар басьтыны ик шугъяськисько.
— Колбаса. Ньыль сю манетлэсь дунтэм медаз лу. Кык сюрсэн коньяк. Германиысь вуттэм сыр… Ну, отӥзэ ачид тодод… Мын, мын… Мон туж жади, куинь уез кӧлымтэ…

Магазинэ ветлытозяз, Аркашез умме усем. Нокыӵе сюлмаськонэз адӟылымтэ пичи пинал сямен, ныс-ныс кӧлэ, ум йылтӥз но пальпотылэ. Озьы ке но картэз шоры Оля сюлэмшуген учкиз.

Аркашезлэн пальто кисыысьтыз телефонэз жингыртӥз. Оля картсэ сайкатыны медэ вал но, жаль потӥз. Нош телефон уг чалмы, выльысь но выльысь жингыртылэ. Оля кутӥз. Нылкышно куара юаз:
— Кин та?
— Оля, Аркашлэн кышноез.
— А-а, Олечка! Людмила та. Кыӵе ни отын Аркаш?
— Кӧлэ.
— Жадиз со, туж жадиз. Уй-нуналэз адӟылытэк ужаз. Ха-ха-ха!.. Сайказ ке, мед жингыртоз. Москвае ветлон сярысь вераськоно…

Оля катьтэм пуксиз, киысьтыз телефонэз выж вылэ усиз. Отысен но тодмо куара уг чалмы, вераськемез, шуак горектыса лэземез Олялэн пеляз шуккиське, сюлэмзэ кеся… Татьяна со!.. Татьяна! Нырысь-валысь куаразэ воштыны выриз вал ке, табере вунэтӥз, лэся. Сыӵе ик небыт, вӧй вылтӥ кадь кисьтэ. Соку малы ассэ ватэ? Аркашез но собере Оляез азьвыл сямен синазькыль уг кары кадь. Судэн кышкатэмез иназ мынӥз, луоз. Но солы соиз валантэм: малы Татьяна Аркашезлы коньдон поттыны сокем юрттэ?

Аркашез нуназеозь сайкаллятэк кӧлӥз. Синзэ усьтӥз гинэ, ӝӧк сьӧры пуксиз.
— Ой, кӧт сюмаз, Оли! Я, мар басьтӥд, ваньзэ пукты ай, — ӝутскем мылкыдын кизэ посӥз, коньякез усьтыса, чаркаосы лэзьяз. — Оли, ойдо монэн одӥгзэ лэзь. Эшшо тросгес коньдон жильдон понна!
— Уг поты, — Оля кухняысь потыны дасяськиз.
— Кытчы тон?! Картэныд одӥг ӝӧк сьӧрын пукемед уг поты, иське? Пуксьы! Пуксьы, шуисько! — кужмысь кыскыса пуктӥз.

Олялэсь бугыръяськись лул-сюлэмзэ чарка коньяк эшшо но бугыртӥз. Аркашезлэн пырак синмаз ик учкыса кисьтӥз:
— Татьянаед тонэ утча! Толон ӝытбыт жингыръяз.
— Мар?!.. Кхе-хе-хе!.. — Аркашез ӧжыт гинэ ӧз гуньды.
— Эх, Арки, Арки, нош ик тонэ со вотэсаз сьӧлтаны быгатӥз, иське.
— Кхе-хе-хе!.. Со мыным коньдон жильдэ! Коньдон! Адями кадь улыны юрттэ! Табере со Людмила.
— Людмила-а, Татьяна-а, мар пӧртэмез — аферистка! Нош ик тонэ сыръясь нюраз кыске.
— Ӟеч муртъёс сярысь оломар но пӧртмаськод.
— Ярам. Котьма кар. Но тодыса ул, берло гырпумдэ куртчемед потоз на но, уд ни сузьы.
Капчиям Аркаш Оля вӧзы кариськиз, ӟыгыртӥз.
— Учкы ай шорам. Воргорон-а, ӧвӧл-а мон?
— Кинлы ке воргорон, дыр, нош мыным карт гинэ.
— Я, я, эн кисыра. Ваньмыз луоз. Ӧжытак вить на.
— Мон тонэ, Арки, сизьым ар витисько ини.
— Тодӥськод-а, Оли… Кызьы ай сое валэктод?.. Мурт кышноослэн зынзы мукет, нырез бичатэ, мылкыдэз ӝутэ. Нош асьмелэн ваньмыз огшоры, огдышемъя… Ма, урод улӥськом шат? Мон тонэ яратӥсько ук… Людмила шуэ, монэн шудо луон понна котьма лэсьто, пе. Но со ваньмыз, Оли, ӝамдэлы гинэ.

Олялэн кӧтӝожез тани-тани синкылиен уртчыны ӧдъя ни вал но, ассэ кияз кутӥз. Капчи кариськыса, Аркашезлы шуиз:
— Мыным тазьы но яралоз ини, Арки. Йырдэ гинэ эн ышты.
— Оломар эн супыльты, ку-о мон сое ыштылӥ?

Оля валаз: Татьянаен азьвыл курадӟемъёссэ картэз номыре уг тоды ни. Иське, зэмзэ но, зол тупатъямын вал. Нош со кышномурт выльысь озьы дауртӥз ке? Уз дӥсьты ни, дыр: берыз нап дэриен саптаськемын. Мар карод, ӵок ни-а, мар-а. Аркашезлы чутрак пумит кариськиз ке, кусыпсы сӧриськоз, адӟемпотостэм карыны ӧдъялоз. Номыр но инмысь огшоры уг усьы ук, ёрмытэк улон понна пунэмзэ маин ке берыктоно. Тазьы малпамезлэсь Оля шуак луиз: ма, со но йырчукинскем, возьытэз валасьтэм-тодӥсьтэм улонлы дыше ни шат? Коньдон адямилэн йыр йылаз тубиз, лул-сюлмаз кузё кариськиз угось. Дауръёсын кылдэм-возем ӟеч кусыпъёсты но табере сура-пожа ни. Та шимеслэсь кытчы ке пегӟы вылэм но, пыдъёс сьӧлтаськемын. Каргам коньдонэн ик сьӧлтамын.

Аркашез арня пала редакцияз ужаса вуттӥз оло ӧз, одӥг ӝыт Олялы шуиз:
— Москвае ветлоно. Людмила туж ӧте ни. Компьютер сьӧрын гинэ пукыса, коньдон трос уд жильды.
— Ма, асьмелы тырмыса, — Олялэн картсэ лэземез уг поты.
— Оли, вала ук тон, Людмила мыным юрттэ, ваньзэ ачиз тыре. Со понна солы мон кулэ. Мон! Воргорон! Сюрес вылам эн султы!

Картэзлэн верамысьтыз азьвыл кадьгес ик лек куараез кылыса, Оля шымырскиз вал но, Аркашез сое ӟыгыртыса буйгатӥз:
— Эн кышка. Ваньмыз умой луоз. Со понна, пенсие потӥ ке, номыр сярысь сюлмаськытэк, кырӟаса улом. Кулэ ке, шутэтскыны Турцие, Египетэ, ма, Канарые но шонтэммы луоз. Кулэ ке, ӝӧк выламы горд чорыг мызь пуктом… Кулэ ке…
— Мыным номыр но кулэ ӧвӧл, Арки. Тон гинэ вӧзам мед луод.
— Кӧня ке вить на. Ваньмыз луоз.

Аркашез азьвыл сямен ик йӧно дӥсяськыса сюрес вылэ потӥз. Но таяз учыре Олялы солэн синучкон азьын мултэс чеберъяськемез ӧз кельшы. Бызьыны дасяськись егит нылъёс сямен мынчыръяськиз: я йырсизэ выллань, урдэслань сынаса учке, я мычиськыны ӧдъям кӧтсэ тыбыраз ик кыскыса эскере, я галстуксэ вошъяса учке. Собере Оля доры лыктӥз, бам чокчорояз чуп кариз но дыртыса кошкиз.

Аркашез Москвае чиптэм-чаптэм ышиз. Оля жингыртэ но, телефонэз кысэмын. Ужаз но юалляськыны ӧдъязы ни вал. Дасэтӥ нуналаз гинэ вуиз. Номыр луымтэ сямен, Оляез ӟыгыртӥз, чупаз. Сюлмаськись синъёсын шораз учкемзэ адӟыса, кисыысьтыз сюрслыкъёсын быдэс пачка коньдон поттӥз но пальпотӥз:
— Мар кисырад?! Тани мон! Ме, мар кулэ басьты. Ваньмызлы тырмоз.

Но таяз учыре Оля коньдонзэ юрдыса сямен басьтӥз. Со бордысь кыӵе ке урод, кӧшкемыт, лек кужым лыктэмез таӵе ик шӧдэ кадь.
— Арки, тонэ ужысьтыд юалляськизы.
— Шедьтэм ук, мар мыным уж! Со копейказы понна бызьылы, бызьылы… Тани мынам уже! — кисыысьтыз эшшо пачка коньдон поттӥз. — Кудпала-о ширтом, Оли?! Ойдо Европае!
— Европае ке, Европае! — Олялэн картэзлэн капчи мылкыдызъя кариськемез потӥз.
— Чур! Кӧня ке возьмано луод на. Эшшо кузьзэгес жильдоно. Людмилаен ми Сибыр музъемтӥ ортчыны малпамы. Отын, Оли, коньдон пыд улын костаське. Валамон, быгатӥсь муртлы.
— Оло, монэ но басьтоды?
— Куинетӥез мултэс. Эн люкеты. Вить, — собере тодмо кырӟанэз нёжтӥз: — Вить монэ, нош мон одно вуо, только туж зол вить…
— Кӧня витёно на, Арки. Чиданлэн но пумыз вань ук.
— Берпуметӥзэ, Оли, берпуметӥзэ! — Оляез ки вылаз ӝутыны турттэ вал но, кыкназы диван вылэ усизы.

Воргоронлэсь мӧзмем кышномурт картсэ чупаны ӧдъяз вал но, Аркашез шуак ӝутскиз.
— Берлогес, Оля. Жади. Кӧты но туж сюмаз ни. Тодӥськод-а, со самолётазы кыӵе ке лызэктэм чурыт курег пыд сётӥзы. Оло сиёд, оло учкод. Мын ай пот магазинэ, пыжем, пырсатэм небыт курег, коньяк, чорыг мызь басьты. Но чорыг мызь гордзэ басьты. Маскваын со сьӧд чорыг мызенызы вуёми. Ӧвӧл, шуо, гостиницае вайыса ӧз вуттэ на, пе. Паймод, ява, столицаын со калэ вуиллям…

Аркашез дораз кӧня ке нунал сиыса-юыса пукиз. Ужаз ветлыны уг ик малпа вал но, редакторез жингыртӥз. Картэз ӵогыса кадь куштӥз: ӵуказе вуо но ужысь кошкыны куриськон гожто, пе. Оля кушетскиз:
— Пенсие потытозяд куать ар на ук! Маин улыны малпаськод?
— Оля, кин татын кузё! — гордэктэм синъёсыныз лек учкыса, ӝӧк вылэ мыжгиз. — Пуксьы вӧзам! Ме, ю! — дырекъясь киыныз коньякез бадӟым сюмыке лэзиз. — Ю! Кышное-а тон, ӧвӧл-а?! Шумпот!.. Ю но шумпот!..

Оля юэмъяськиз но картэз адӟымтэ дыръя коньякез лушкемен ӟенеликаз ик кисьтӥз.
Ужысьтыз кошкыса, Аркашез толэзь ӵоже сазьтӥськылытэк юиз. Ымнырыз тордӥз, мугорыз супырӟиз. Людмилаез жингыртылыку, сьӧлтаськись кылыныз маке дыг-мог вераны вырылӥз. Бератаз соиз чалмиз.

Ческыт, дуно сиёз-юон кисызэ бушатэм бере сазьтӥськиз но телефонзэ кутӥз, ачиз Людмилалы жингыртӥз.
— Ку-о асьмеос Сибыре лобӟом, мусое? — Олялэсь чик возьдаськытэк шуиз.

Мар соиз вераз, Оля ӧз кылы. Аркашез телефонэз йыркурен кыдёке сэрпалтӥз но корка шортӥ солань-талань ветлыны ӧдъяз.
— У-у, пересь ӟичы! Юмшась пуны! Зӧк пуклёк! — Аркашез пиньзэ сыскыса ик лекъяське. — Ваньды тӥ сыӵеесь! Кужмо, ӟырдыт воргорон понна ваньзэ сётыны дасесь! Ӧжытак лябӟе ке, мукетыз борды няняськиськоды.
— Кужмозэгес, чеберзэгес шедьтэм-а? — дӥсьтытэк юаз Оля.
— У-у, шакшы кышноос!.. Вань уродэз тӥ бордысь потэ!..

Аркашез озьы арня ӵоже нылкышноослы йыркуръяськиз, собере каллен-каллен йырыз сазьтӥськиз, лэся. Ужаз вамыштӥз. Отысь йырзэ ошыса вуиз.
— Мон интые фотокорреспондент кутӥллям ни.
— Я, Арки, киыд зарни, уж сюроз, — Оля картэзлэсь йырзэ маялтӥз. — Кредит тыронъёсмес быдтӥм. Трос-а кулэ ни асьмелы. Тани учкы ай, почта ящикамы ялонъёсын газет понӥллям, кыӵе ке газетэ фотокорреспондент кулэ, пе. Нимзэ гожтӥллямтэ. Жингыртыса утча ай.

Кык арня ортчыса, Аркашез выль уже потӥз. Отын солы нимысьтыз компьютер сётӥллямтэ: газет пичи, одӥгез ньыль муртлы ужаны тырмоз, пе. Нош ӝытазе редакцизэс сигнализациен ворсало. Озьы аслаз бамаз кык-куинь часъёсын пукылэмез ӧз луы ни. Нырысь-валысь Аркашез ӝожомиз вал, бӧрысь дышиз, лэся. Ма, собере дырыз но ӧз сюрылы ни: коньдон понна мукет газет-журналъёслы но туспуктэмъёс лэсьтылыны бызьылӥз. Нош дорысьтызы ноутбуксэс Оля картэзлэн син азьысьтыз кыдёке ватӥз.

Удмурт Дунне
By Удмурт Дунне Ноябрь 27, 2012 02:08