Ӝушез сузялоз вирсузясь

Удмурт Дунне
By Удмурт Дунне Октябрь 2, 2012 17:42

Ӝушез сузялоз вирсузясь

Вордскем кунян кӧтыныз (диспепсиен) зол медаз курадӟы шуыса, со скаллэн кӧтаз дыръя ик сюлмаськоно ни. Чакласькыны вунэтоно ӧвӧл дунне вылэ потэмез бере нырысетӥ нуналъёсаз но.

Скалэз секытэн дыръяз рос-прос ӧд сюдэ ке, витаминъёс ӧд сётъялэ ке, кунянэз пичи вордскыны быгатоз. Сыӵе кунян пыд йылаз султэ бер, ноныны курадӟе я воксё уг быгаты. Пуштӥрлыкез но солэн рос-прос быгыльскемын-юнмамын ӧвӧл. Валамон ни, таӵе начар кунян котькыӵе черлы сётскыны быгатоз. Диспепсия сярысь веранэз ик ӧвӧл ни. Вылаз ик, гидын кырсь, кот, кезьыт ке.

Вордскемез бере нырысетӥ нуналаз  кунян ноныны кулэ ас секталаезлэн 10 процентэз мында ӵӧжы. Кунянлэн ӝушез умой уг ужа на. Соин ик чаклано: ӵӧжы но йӧл  кезьыт медаз луэ, люктан вакытлэн вискыз одӥг кузьдагес мед кыстӥськоз. Скал вераез умой мед басьтоз. Сотэк сиёнэз, ӝушаз сюрытэк, висъёсаз кугӟалоз но отын ик сисьмыны кутскоз.

Туж сак чаклано, кызьы сиське кунян. Мылкыдтэк но бырйиськыса улэ ке, кӧтыз кольыртэ ке, кыедэз кизер ке, та умойлы ӧвӧл! Кыедэныз валче мугорысьтыз вуэз мултэс трос кошкиз ке, кунянлэн куэз сӧриськыны кутскоз, кыстӥськоз, синъёсыз гыркъёсазы усёзы.

Таза кунянлэн сиёнэз кыедэныз валче потыны кулэ 48 час ӵоже, висьыны кутскемезлэн сием сиёнэз кыре куриське ни, 6 час ортчыса ик. Выдысагес улэ. Сӥль быгытэз но дыгыр-р-р куалекъяса кадь улэ. Озьы ке, кунян кулыны но быгатоз.
Зэм, куддыръя диспепсия сокем шара ассэ уг возьы. Кунянлэн сием потон мылкыдыз но вань, но ӝог кӧтыз тырем каре, ачиз сютэм кыле.

Таӵе адӟонэ медад вуэ шуыса, кунянэз вордскемез бере 10 нунал ӵоже ӵӧжыен люктано. Начар вордскемъёсызлы сое сётъяно 15 нунал ӵоже. Берло нуналъёсаз быректэм йӧлын но сураны яра ни.  Ведраысь люктаны уг яра! Отын сӥяса но вуттэ, кунян отысь ноныны но дышемын ӧвӧл на — воньдоз.
Нош диспепсия кутскиз ни ке, пудоез эмъяно. Зэм, сокем секыт уг висьы на ке, кунянэз пыдъяны луоз огшоры турын-куар вуэн но. Кылсярысь, ӟеч юрттэ виртурын (зверобой), вирсузясьлэн (кровохлёбка), змеевиклэн выжыоссы. Тыпылэн сулэз туж кужмо на. Та будосъёсты луэ нимаз-нимаз 100-200 миллилитрен люктаны. Со понна котькудзэ быректэм вуэн пароно. Турынъёсты сурады ке но, уродэз уз луы. Соку сыӵе суретэз ӵӧжы интые 1,5 — 5 литр люктано.

Юрттоз сылало ву но. 1 литр быректэм шуныт вуын сурано 1,5 — 2 грамм сылал. Тазэ но ӵӧжы интые люктано.  Зэм, сурет пушкы поныны вунэтоно ӧвӧл 50 грамм глюкоза. Сотэк пудолы урод луоз, пушсэ кӧс басьтоз.
Кӧтсэ тупатон но микрофлоразэ юнматон вылысь сётъяно на бифидобактерин, лактобактерин, ацидофильной культураосты. Эн вунэтэ витаминъёсты но.

Кунянлэн тазалыкез воксё урод ке, нокыџе сиён ымаз уг басьты ке, пуктылоно луоз микробъёслы пумит препаратъёс: норсульфазол натрия, сульфацил натрия, стрептомицин-сульфат, левомицетин, тетрациклин. Вить нунал ӵоже тазьы эмъям бере кунянлэсь сюлзэ но ӝушсэ антибиотикъёслэсь капчиятон сярысь сюлмаськоно. Со понна нуналаз 3 пол люктамлэсь азьвыл сётъяно 2,5-3 дозаен бифидумбактерин.

Мугорысьтыз вузэ воксё медаз ышты шуыса, быгытаз пуктылоно эмъюмъёс. Кылсярысь, 0,9-1,0 процентъем сылалэн глюкоза, витамин суретэз. Пудо эмъянын асьсэды ӟеч возьматӥзы рингера-локка, шарабрина. Таосты пуктылоно 80-100 миллилитрен уй-нунал куспын кык пол.

Эн вунэтэ: кунянэз антибиотикен эмъяку, дугдоно ӵӧжы сётъямысь. Сое выльысь люктаны кулэ пумен-пумен, физрастворен сураса — 1:3, собере 1:2, отӥяз 1:1 люкетлы  карыса. Озьы 2-3 нунал ӵоже. Отӥяз азьвыл сямен ик сюдыны яра ни.

Екатерина Михеева,
пудо эмъян наукаосъя
кандидат

Удмурт Дунне
By Удмурт Дунне Октябрь 2, 2012 17:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*