Тӧро быръемын, кутскон сётэмын

Удмурт Дунне
By Удмурт Дунне Октябрь 23, 2012 13:33

Тӧро быръемын,  кутскон сётэмын

Кун кенешлэн сессиез

Толон Кун Кенешын радъяськиз выль ӧтчамлэн нырысетӥ сессиез. Кун Кенешлы Тӧрое быръемын азьвылэз ик спикер — Александр Соловьёв.

Солэсь кандидатуразэ дэмлаз «Огъя Россия» фракция. Кун Кенешысь мукет депутатъёслэн огазеяськонъёссы асьсэлэсь мылкыдъёссэ ӧз шараялэ.

Нырысетӥ кенешонэ вуиз  90 пӧлысь 84 депутат. Лушкем куара сётыса,  Александр Соловьёвлы дурбасьтӥз 72 мурт. 5 депутат пумит луэмзэ вераз, 6-ез бюллетеньзэ ярантэм кариз, 1-ез быръёнэ ӧз пыриськы.
— 5 ар талэсь азьло быръёнэн ӵошатыса, али уката зол тулкымъяськисько, — шуиз Александр Соловьёв. — Но уг сюлмаськы сыӵе мурт гинэ, кин рос-прос ужаны уг малпа.
Нырысетӥ сессиын быръемын спикерлэн воштӥсьёсыз. Зэмзэ вераса, соос ӧз воштӥське, шуыны луоз — нырысетӥ воштӥсь луиз Светлана Кривилёва. Со Кун Кенеше куинетӥ ползэ быръемын ни. Берлояз ӧтчамын Тӧролэн воштӥсез но ялан ужась комиссилэн тӧроез вал. Спикерлэн мукетыз воштӥсез луиз Владимир Невоструев — азьвыл но ужаз тӧролэн воштӥсез но гурт удысъя, музъем кусыпъёсъя но инкуазез утёнъя ялан ужась комиссилэн тӧроез  луыса.
30-тӥ октябре тодмо луозы ялан ужась комиссиослэн  лыдзы но тӧрооссы.  Кылем ӧтчамын 8 комиссия вал ке, таяз парламентын соослэн лыдзы йылыны но быгатоз.

Елена Скворцова

Удмурт Дунне
By Удмурт Дунне Октябрь 23, 2012 13:33