Палэзь люкаськиз пурые

Удмурт Дунне
By Удмурт Дунне 19 октября, 2012 15:21

Палэзь люкаськиз пурые

Гала-концерт «Ум люкиське» кырӟанэн йылпумъяськиз

«Палэзян» этнофестивальын егитъёс кырӟазы-веразы, калыкъёслэн улэм-вылэменызы тодматскизы, быгатонлыкъёссэс возьматӥзы.

Куноос пумиськылӥзы школаосын, культурая но крезьгуръя колледжъёсын дышетскисьёсын. Эстониысь «Koidupuna» ансамбль пиналъёсты эктыны дышетӥз, Мордовиысь «Мерема» ансамбль турлы куараосын кырӟаны валэктӥз но аспӧртэмлыко инструментъёсын тодматӥз. Ижысь нылпи творчествоя юрт дорысь палэзь борды лентаос думылӥзы, «Палэзь шулдыръяськон» ортчытӥзы.

Кемалы вунонтэм кылёз гала-концерт. Ужрад куинь час пала кыстӥськиз ке но, дораз бертыны нокин ӧз дырты. Егитъёслы вольыт сюрес сӥзизы Удмуртиысь Кун Кенешлэн тӧроезлэсь ужзэ быдэсъясь Александр Соловьёв, «Удмурт кенеш» огазеяськонлэн кивалтӥсезлэн воштӥсез Татьяна Ишматова но Эшъяськон юртлэн кивалтӥсез Алексей Шуклин.

Екатеринбургысь лыктэм «H-Ural» группа нырысьсэ огазеяны быгатэм рок но туала электроникаез. Венгриысь воргоронъёс паймытӥзы пӧртэм инструментъёсын шудыны но капчиен эктыны быгатэменызы. Учкисьёс озьы ик юн кичабонъёсын пумитазы аспал эшъёсмес: Санкт-Петербургысь бертэм Эльвира Панченкоез «ChupaiEli» группаен, Дэбесысь арганчиослэсь «КПП+» группазэс.

Шулдыр куараеныз но аслаз чебереныз паймытӥз Глаз городын будэм нылаш Анастасия Прокошева. Та вакытэ со Москваысь Гнесинъёс нимо академиын дышетске. Со ог 10 кылын кырӟанъёсты быдэстэ. Ачиз ӟуч ке но, вылӥ дунъя удмурт кылэз. Калыккуспо ӵошатсконъёсы удмурт кырӟанъёсын куинь пол пыриськыса, куинь полаз ик вылӥ дунъет басьтылэм.

«Аксион» культура юрт азьын перфоманс

Котькуд кырӟась-верасьлы, сцена вылэ потам коллективлы одӥг палэзь сётӥзы,  озьы ӝыт ӵоже быдэс пуры люкаськиз. «Палэзян» фестиваль таин ӧз йылпумъяськы. Лыктэм куноос толон Удмуртиен тодматскизы. Эстонъёслэн туж потэ вал шаерысьтымы удмурт гуртъёсты адӟемзы. Соосты Алнаше нуллӥзы. Мордовиысь но Венгриысь куноос Дэбесэ вуылӥ-зы, Санкт-Петербургысь но Екатеринбургысь куноос Сарапулэн тодматскизы.

Выль куноосын тодматскон, эшлыко кусыпъёс тупатон кемалы тодэ кылёзы. Та фестивалез радъясь Надежда Уткина верамъя, Ижын нырысьсэ чузъяськиз фин-угор егитъёслэн гимнзы. Сое куать кылын быдэстӥзы.

Валенина Емельянова

Удмурт Дунне
By Удмурт Дунне 19 октября, 2012 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<