Кинлы — ӟеч кыл, кинлы — боды

Удмурт Дунне
By Удмурт Дунне Октябрь 23, 2012 14:10

Кинлы — ӟеч кыл, кинлы — боды

Кылем арняе «Огъя Россия» партилэн конференцияз йылпумъянъёс лэсьтӥзы ортчем быръёнъёслы. Президент Александр Волков туж лэчыт вераськиз. Куд-ог кивалтӥсьёслы залысь небыт пуконъёс соку ик чурыт йӧтӥзы:
— Кунамы революция луыны кулэ ӧвӧл ни — асьмеос сое 90-тӥ аръёсы ортчим. Бервылзэ али но шӧдӥськом — пыд выламы султыны капчи ӧй вал. Соин выль зурканъёс номыр ӟечсэ уз вае. Асьмеос азинском но ӟеч улом, власть кужмо луиз ке, — вераз Александр Волков. — Таяз Кун Кенеше пырем депутатъёс —  80 процентэз «Огъя Россилэн» муртъёсыз. Тау карем потэ гуртоослы — соос партия понна 50 сюрслы тросгес куаразэс сётӥзы, городъёсын ӵошатыса. Быръёнъёсты «куашкатӥз» Глазов. Соин город йырлы Александр Вершининлы малпаськоно, кызьы ужалоз со калыкен, городын улӥсьёс таӵе кивалтӥсьсэс уг дунъяло ке.

Политсоветлэн секретарез Александр Соловьёв но тау кариз ёросъёсын улӥсьёслы. Тани Юкаменск ёрос нош ик ваньзэс азьпалтӥз — партия понна 81 процентэз калык куаразэ сётӥз. 10 ёросъёс ортчизы 70 процент гожез — соос пӧлын Балезино, Кизнер, Яр, Сьӧлта, Шаркан, Кез но мукетъёсыз. Лябгес ужазы Дэри, Вавож, Пичи Пурга, Ува районъёс — татын улӥсьёс «Огъя Россия» понна 60-лэсь ичи процент куара сётӥзы. Партилэн исполкомез чакламъя районъёсын  ичизэ 70 процент куара люканы кулэ вал.

Пичи городъёсын оскизы, партия 60 процент бичалоз шуыса. Та малпан быдэсмиз Воткаын гинэ. Мукет городъёсын югдур уродмиз. Нош Глазов воксё онгромытӥз: коммунистъёс нырысьсэ ортчизы «Огъя Россиез». Ижын но уж вӧй вылтӥ кадь ӧз мыны — Октябрь ёросын «Огъя Россия» 37 процент гинэ куара люказ.
Азьланяз вожвылъяськон уката ӟырдытгес луыны быгатоз, пусйиз Александр Соловьёв.

Удмурт Дунне
By Удмурт Дунне Октябрь 23, 2012 14:10