Пыжиськемез воштэ салат

Удмурт Дунне
By Удмурт Дунне Сентябрь 5, 2012 12:01

Пыжиськемез воштэ салат

Л. Федорова. Туспуктӥз Владимир Беломорский

Туннэ аслэсьтыз вордскем нуналзэ пусъе Удмурт кун университетысь удмурт филология факультетлэн деканэз, педагогика наукаосъя кандидат Любовь Фёдорова. Вань сюлэм шунытсэ дышетон удыслы сӥзе ке но, ваньмон дыр шедьтыкуз, семьязэ ческыт сиёнэн шумпоттэ.
Алнаш ёросысь Шайтангуртын вордскем нылаш пичи дыръяз дышетӥсь, инженер, агроном луон сярысь малпаськылӥз. Улоназ бадӟым пытьы кельтӥз нырысетӥ дышетӥсез, солэсь адӟем карыса ик, визьнодасьлэсь сюрессэ бырйиз. Дышетӥсе мынэмысьтыз пичи но уг ӧпкельы.
Любовь Петровналэн техникаен  тунсыкъяськонэз али но ортчымтэ на. Туж яратэ машинаосты, ваньмыз сярысь пыр-поч вераны быгатэ. Руль сьӧрын ворттылыны право басьтӥз. Но машина нуллыны кык ар сяна кылдымтэ, семьяямы, пе, сотэк но трос водительёс: кузпалы, пие, кенэ.
Нош агроном луон мылкыдзэ Любовь Петровна бакчаяз буйгатэ. Ваньмон дыр шедьтэ ке, сад-бакчаяз дыртэ. Фёдоровъёслэн бакчаязы вазь тулысысен бер сӥзьылозь турлы сяськаос пушъё. Ваньмыз-ӧвӧлэз, пе, витьтон пала люкасько.
— Бакча синазькыль медаз луы шуыса, шутэтскыны ветлоно отчы, — азьланьтэ Любовь Петровна. — Юри люкам кадь, вань бускельёсмы чеберлыкез гажало, сад-бакчазэс утялтыса возё. Ог-огенымы ӵошатскыса выллем пӧртэм сяськаос мерттӥськомы, нош кытысь ке выль кидыс шедьтӥськомы ке, вош­тӥськыны дыртӥськомы.
Любовь Фёдорова ужан сяменыз пӧртэм странаосы вуылэ. Кунгож сьӧрысь буш киын уг берты: я сяська кидысъёс вае, я турлы туспуктэмъёс. Сяськаез, пе, тодоно, ку, кытчы но кызьы мерттыны. Ачиз ик дизайнер. Малпанъёссэ улонын быдэстыны юрттэ литература. Тыршемез токма уг луы. Кемалась ик ӧвӧл сад-бакчазылэн юбилеез вал. Бадӟым ужрад азьын котькуд ульчаез, садэз эскерыса потӥллям. Шараяськиз, Фёдоровъёслэн бакчазы тужгес шулдырез, дизайнэз но аспӧртэмлыко.
— Пӧртэм кунъёсы вуылыса, синмаськоно чебер улэмзылы, — шуэ Любовь Фёдорова. — Ноку уг вунэты Финляндиысь аспӧртэмлыко корка пырамме. Улон юртсы интыяськемын бадӟым гурезь борды, корка пыронзы — 5-тӥ этажын. Норвегиын но гурезьёссы, шуръёссы трос. Кунгож сьӧрын улӥсь калык инкуазь узырлыкез дунъя, сое эшшо но чебергес карыны тырше.
Кыӵе ке странаосысь вуэмез бере Любовь Петровналэн йыраз нош ик выль малпанъёс лыкто. Берло аръёсы со но бакчаяз аспӧртэмлыко гурезьёс кылдытъя. Нош семьяез быгатэмезъя юрттэ: тунсыко изъёс шедьто ке, доразы ваё.
Фёдоровъёслэн бакчазы — бадӟым сад. Ческытэз ярато бере, толлы трос варенняос, компотъёс дасяло. Киярлэсь, помидорлэсь пӧртэм салатъёс лэсьто. Туэ удалтӥз дынязы, нырысьсэ мерттӥзы баклажан. Туж гажало ческыт пӧсьтурынэз (перецез). Сое вань сиёназы тыро. Нош вордскем нуналъёссы дыръя котькуд аре ӝӧк вылазы выль салат пуктыны тыршо. Таяз учыре но Любовь Петровна кунгож сьӧрын улӥсьёсты тодаз вайиз.
— Азьвыл аръёсы ваньзэ бакча сиёнъёсты пӧзьтыса юдылӥмы но, йӧлвылэн я вӧен суралтыса, тусьтые тырылӥм, — шуэ Л. Фёдорова. — Нош табере тусьтылэн огпалаз кешыр вуштыса я юдыса понӥсько, нош мукет палаз — гордкушман. Вӧзазы одно ик ватсасько кык-куинь пӧртэм соус. Берло дыре семьямылы но куноосмылы туж кельшиз грецкой мульыен, кумызен (чеснокен) но майонезэн соус.
Фёдоровъёслэн семьяязы сӥль сярысь но уг вунэто. Малпамтэ шорысь куноос лыктыку, чаль пӧраське француз амалъя дасям сӥль.
Любовь Петровна шыд пӧзьтонэ но, гуляш лэсьтонэ но аслэсьтыз дасям кетчупсэ ватса. Сиёнэзлы аспӧртэмлыко шӧм пыӵатэ озьы.
Любовь Петровна уг яраты пыжиськыны. Араз 3-4 пол гинэ, пе, ыльнянен вырисько.

Француз сӥль
Радэн-радэн тыроно картофка, сугон, сӥль (дыртыку фарш но яралоз), вань ке — губи. Ваньзэ вуштон пыр поттэм сырен шобыртоно но пӧсь гуре пыжыны пуктоно.

Кетчуп
Кулэ: 1 килограмм улмо, ӝыны килограмм сугон, 3 килограмм помидор, 8 пилет кумызь (чеснок), 1 стакан сакыр, 2 пуньы сылал, быдэн ӝыны чечы пуньыен изэм сьӧд пӧсьтурын но корица, ӝыны стакан уксус (9 процентъем).
Тазатэм улмоез, сугонэз но помидорез, сӥль коран пыр поттыса, пӧзьтыны пуктоно. Быректэмез бере пичи тыл вылын эшшо 1 час но ӝыны пала пӧзьтоно на. Собере ватсано 1 стакан сакыр, 2 пуньы сылал, быдэн ӝыны чечы пуньы изэм пӧсьтурын но корица, 8 пилет кумызь, ӝыны стакан уксус. Суретэз эшшо 10-15 минут пала пичи тыл вылын пӧзьтоно но, чылкыт банкаосы тырыса, салкым азе пуктоно.

«Ассорти» салат
Одӥг но ӝыны литр вулы кулэ 4 пуньы сакыр, 2 пуньы сылал.
Вуэз быректытоно но отчы ватсано сакыр но сылал, сурано сылмытозязы.
3 литр банкае радэн-радэн тыроно бакчаын будэтэм емышъёсты. Нырысетӥ радэ султытоно кияръёсты, вылаз ватсано векчи помидор, юдыса дасям кабачок. Банкае тырем сиёнъёслы чебер тус пыӵатоз горд яке ӵуж ческыт пӧсьтурын. Сое, векчи юдыса, емышъёс вискы чуртнано. Ватсано на 5 йыр векчи сугон, 5 пилет кумызь, быдэн 1 выжы кирень но петрушка, 1 модос укроп, юдэм кубиста. Банкаез тырмытыны луоз мукет емышъёсын но.
Тыро банкае нырысь ик кисьтоно быректытыса дасям вулэсь ӝынызэ, собере йылтоно ӝыны стакан уксус, нош отӥяз кисьтоно кылем вуэз. Тыро банкаосты, 20-25 минут пала вуын быректыса (стерилизовать карыса), корт ӵоктэтъёсын пытсаса, салкым интые пуктоно.

Валентина Емельянова.

Удмурт Дунне
By Удмурт Дунне Сентябрь 5, 2012 12:01