Эгесъёсты пазьгон вакыт

Удмурт Дунне
By Удмурт Дунне Сентябрь 19, 2012 18:02

Эгесъёсты пазьгон вакыт

Г. Перевощиков

Кыӵе йыруж лэсьтӥз

Генрих Перевощиков?

 

Удмуртиысь калык писатель, Россиысь культура удысысь дано ужась Генрих Перевощиков 14-тӥ сентябре 75 арес тырмонзэ пусйиз. Берло 20 арзэ со  «Кенеш» журналын ужаз, проза понна кыл кутӥз.

— Генрих Ксенофонтович, сомында аръёс ӵоже кӧня произведение тӥ пыр потэмын! Азьвыл но туала гожъяськисьёслэсь аспӧртэмлыкъёссэс тӥлесьтыд ӟечгес нокин дунъяны уз вала.
— Пӧртэмлыкез вань. Но со озьы ик луыны кулэ: улон ялан воштӥське.
7 ар талэсь азьло мыным Кастрен обществолэсь премизэ сётыкузы, Финляндилэн Мускоысь посольствояз пресс-конференциын юазы, кызьы учкисько удмурт литературалэн ӵуказе нуналыз шоры. Шуи: туж бадӟым осконэн. Егит гожъяськисьёслэн лыдзы но будэ. Тематиказы но паськытаз, улонлэсь пӧртэм палъёссэ бугыръяны ӧдъязы. Азьвыл быдьто ке асьмелэн наркоманимы но, мукет пӧськыосмы но ӧй вал. Но гожъяськисьёс со сярысь ӧз поттылэ, отчы чуртнаськысалзы ке но, печатланы оло лэзьысалзы, оло ӧй. Туала егитъёс сыӵе темаос борды кышкатэк басьтӥсько, соосты кутӥсь но ӧвӧл ни табере. Соос пӧртэм жанръёсты кутыны кутскизы. Шуом, мон вакытэ этюд я фэнтези сярысь кылэм ик ӧй вал. Инсьӧры ӧм тубалэ, сопал дуннее ӧм вуылэ — музъем вылтӥгес ветлӥм.

Но… 7 ар талэсь азьло верамме туннэ малпаса, соку укыр лӧпшаськем кадь потэ ини. Малы? Тросэзлэн егит гожъяськисьёслэн тылгизьызы ӝуатскыны кутске кадь ини, тани-тани мургес пырозы но, тылӝу пуромоз… Ӧз… Автор кытчы ке палэнэ кожиз, кутскемзэ пумозяз ӧз вутты, экспрессизэ ыштӥз — произведение гуньдӥз. Одӥг адямилэн гинэ ке озьы луысал, та пумысен вераськон но ӧй ӝутысал. Малы озьы пӧрме? Улонэз мур ум тодӥське. Ну, таиз ярам ини, аръёс ортчемъя опыт вуоз. Но веть малпаськыны катьмы ӧвӧл. Интернетысь мае ке копыштӥськом но сое гожтоно малпаськомы. Данакез егитъёс номыр каремлэсь кадь гинэ, вылтӥз-вылтӥз гожъясько. Эшъёссы гинэ мед лыдӟозы потэ, лэся. Нош, шуом, мон, гурт, шаер, быдэс дунне? Егитъёслэн шара верам малпанъёссы, оло, дуннеозь ӝутскыса ӧз быдтэ на. Берло дыре сыӵе лазег уянмы, оло, коньдон сярысь гинэ малпаськонэн герӟаськемын.

— Книга гожъяса, туала вакытэ уд узырмы. Уно гонорар басьтӥсь Донцоваос, Акунинъёс асьме писательёс  пӧлын ӧвӧл…
— Мон гожъяськон сярысь гинэ уг вераськы — огъя улон сярысь. Тани мыным, очеркъёс гожъясь но роман сярысь малпаськись егит радиожурналистлы, пӧртэм визь-кенешен Флор Васильев юрттӥз. Огпол, монэ гуртэ командировкае келякуз, шуиз: тон, пе, улон радэз ӧжыт йӧндыриськод ини, табере адямиослэн ымныразы, синъёсазы ӵемгес учкы: кызьы воштӥське туссы, эшъёсынызы я кивалтӥсьёсын вераськыкузы, кыӵе нырзы, пельзы, кызьы соос серекъяло, тышкасько… Адямилэсь тусбуйзэ, сямзэ адӟонын со нырысетӥ вамыше луиз.
Аслам дышетӥсьёсы пӧлы Владимир Романовез но пыртӥсько, со мынэсьтым чарак егитгес ке но вал. Туала егитъёслы дыраз сыӵе дышетӥсьёс уг шедё, дыр.  Школаосын, вузъёсын литературно-творческой кружокъёс чалмизы. Ижысь пединститутын дышетскыкум, студентъёслэн пӧрамъёсынызы альманах потэ вал. Нырысетӥ ужъёсы отын печатласькизы. Ева Никитина дышетӥсьмы кивалтэм улсын соосты эскеримы, ог-огмылэн янгышъёсмы вылын дышетскимы.   Собере студентъёсты гожъяськонэ валтӥзы Александр Белоногов, Даниил Яшин. Егит гожъяськисьёс понна вылысьтыз-вылаз семинаръёс  но ортчылӥзы. Табере тодам но уг вайиськы ни, ку сыӵе визьнодан Удмуртиын берлозэ вал. Озьы литературалэн пӧзён пуртыез кысӥз.
Монэ соиз но паймытэ: егит гожъяськисьёс пӧлын пиос быризы. «Кенеше» кылбуръёсын рукописьёс соослэсь вуыло ик на, нош проза гожъясьёс ӧвӧл. Туала пиос сокем-сокем ӧз азьтэмске, дыр, ук — иське, сюлмаськонъёссы воштӥськизы. Романъёс табере семьяез уг сюдо, ёрмыса улонысь кылбуръёс уг вордӥсько. Кӧттырон сярысь сюлмаськыса, лулпуш сярысь малпаськыны дырзы уг кыльы ни, шӧдске.
Азьвыл югдур мукет вал. Мон, кылсярысь, 10 ар дорам гожъяськыса пуки. Писательлэн гожтэм чурез дунъяськылӥз, перестройка вуытозь. Мыным но со сютэм  вакытэ журналэ куриськытэк ӧйлась.

— Азьвылзэ но ализэ ӵошатонъяды кылрад сярысь ӧд вералэ на. «Кенеш» сое юн чакла,  тӥляд  зол куронъёсыныды ваньмыз соглаш уг луо ке но. Анахронизм шуыса.
— Шонер гожъяськон — анахронизм шат! Нош кыӵе ке правило зэмзэ вужмем ке, нырысь сое воштоно. Али но верамысь уг дугдӥськы: повествовательной предложениын подлежащей азьпалан сылэ, сказуемой — пумаз. Азьвыл сое юн чаклало вал. Туала вакытэ кылъёсты кызьы шедем озьы пуктыло, визьпогъяськись гожъяськисьёс эшшо ке логической ударение вылэ чӧлско, соин, пе, ми кылъёслэсь радзэс сураськом.  Нош ма со сыӵе логической ударение,  асьсэос уг тодо. Кылсярысь, «Сюдӥсь-вордӥсь луиз пенсионер» предложениын кудзы кин луизы? Кылрад произведенилэсь огъя крезьгурзэ возьыны юрттэ, малпанэз валамон каре.

Удмурт кыллэсь аспӧртэмлыкъёссэ валан, солэсь кабъёссэ гажан сям школаысен ик пыӵаны кулэ. Иське, туала дышетӥсьёс та вылэ киынызы шонто. Тани мон котьку но шуныт мылкыдын тодам вайисько Эгра ёросысь  Пазяли школаысь дышетӥсьёсме — Федосья Ананьевнаез но Марфа Алексеевнаез. Начальной школаын вань предметъёсты удмурт кылын соку нуизы. Дышетӥсьёсмы анай кылын чылк-чылк вераськылӥзы. Творчестволы, утчаськонлы сюрес усьтӥзы Якшур-Бӧдья педучилищеын. Отысен мон валай: эркын темаослы сочинениос гожъяны, мылкыдме бумага вылэ кисьтыны яратӥсько. Тӥни со ик луиз литературае кыстӥськон сюресэ. Пичи дыръям, трактористлэн ужезлы синмаськыса, Ижысь индустриальной техникуме пыреме потэ вал ке но, тамында аръёс ӵоже уйин ручкаен пукылэмме одӥг минутлы но ӧй жаля.

«Кенеше» вуэм вань рукописьёсты одӥгтэм лыдӟылӥ. Тылгизьыез вань ке, авторезлы жингыртӥсько, кенешиськом, ма бордын ужано на. Куд-огезлы огпол верамен тырме — произведенизэ кулэезъя тупатъя. Мукетыз, 2-3 пол визьнодаса но, тыро-пыдо гожтыны уг быгаты. Но мыным со адями жаль потэ. Давай-ко мон талы возьмато, кызьы вероссэ мургес кароно вылэм,  ручка борды басьтӥськисько. Автор интые ачим пум но, мар но малпасько. Редактор муртъёс понна произведение гожъяса пукыны кулэ ӧвӧл! Со —  йыруж!! Но кытчы пырод, ма карод?!

Финляндиысь литературалы сӥзем журналлэн редактореныз вераськеме вань. Со шуэ: рукопись ярамон ке, печатласьком, одӥг кылзэ но тупатытэк. Урод ке, авторезлы берыктӥськом я корзинае куштӥськом. Но асьмелэн озьы куяны луонлыкмы ӧвӧл: гожъяськисьёсмы ичи. Улонамы берло аръёсы туж бадӟымесь воштӥськонъёс ортчемен, арлыдо писательёс могӟизыгес кадь, нош егитъёс троссэ валаса ӧз быдтэ на, дыр.
Собере, шуиськом: «Кенеш» — академической издание. Вань силё-сюрноез поттыны кутским ке, лыдӟисьёс милемыз уз валалэ, журналэз басьтэмысь дугдозы.

Озьы произведениез выльысь гожъяса пукиськом, со «Кенешын» потэ, книгаен печатлаське на. Авторез ну! ушъяськыса ветлэ ини. Ачиз озьы пӧрмытӥз кадь. Нош милям сюлэм ик чепылля. Тросэз озьы асьсэды писатель кожаны ӧдъяло. Соосты нимын вера вал но, кулэ-а со лыдӟисьлы?

— Но вань, дыр, ук сыӵеосыз но, кинэ тӥ зэмос писатель луон сюрес вылэ султытӥды, кинэн данъяськиськоды.
— Кӧня ке ар талэсь азьло монэ туж шумпоттыны кутскизы вал Виталий Леконцев — кылбурчиос пӧлысь — но Елена Фёдорова  — верос гожъясьёс пӧлысь. («Удмурт дуннеез» лыдӟисьёс Еленаез ӟечгес тодо Сараматова фамилиен — авт.) Еленаен, Можга педучилищеын дышетскыкуз ай, гожтэтъёс пыр кусып возим. Куд-ог дэмланъёсыным со соглаш луэ вал, мукетъёссэ пеляз ӧз понылы. Со озьы ик луыны кулэ! Мон уг шуиськы: весь монъя кариськоно. Аслаз малпанэзтэк улӥсь муртэ мон ачим уг гажа.  Еленалэн улон шоры аслаз учконэз, соин  литературае туж ӟеч вамыш лэсьтӥз. Огзэ гинэ жалясько: берло аръёсы чеберлыко произведениосыз шер адӟисько. Газет трос дырзэ но кужымзэ быдтэ, вылды.

Алнашысь Маша Мартыновалэн дуннеез, адямиез возьматон амалъёсыз туж аспӧртэмлыкоесь — фэнтези но зэмос улон полэстӥськыса кошко. Гожъямъёссэ валан понна 2-3 пол но лыдӟоно луэ, но ма вераны турттэмзэ шӧдӥськод ке, туж бадӟым тунсыкен лыдӟиськод.

— Мӧйыгес писательёс пӧлысь кинэ гажаськоды?
— Мон ваньзэсты гажасько: литературае  нырысетӥ вамыш лэсьтћсьёсты но, нимо-дано писательёсты но. Лыдӟисько ваньзэ, ма удмурт литератураын кылдэ. Но али одӥг нимез но уг висъя: огез ӝоже медаз усьы, мукетыз нырзэ медаз чатырты, куинетӥоссэ ваче кымыс медам шуккы шуыса. Но верало: берло вакытэ нимысьтыз пусйымон произведениосмы ӧз вордске кадь. Романъёсмы но повестьёсмы ӧвӧл, шуыны луоз, ӟеч веросъёсмы чиньыен лыдъямон. Ӵапак соин ик кинэ висъяны но ёрмисько.

Ольга Вахитова

Удмурт Дунне
By Удмурт Дунне Сентябрь 19, 2012 18:02