Чупырес бергаломы — вормонъёс басьтомы

Удмурт Дунне
By Удмурт Дунне Сентябрь 18, 2012 15:07

Чупырес бергаломы — вормонъёс басьтомы

П. Перевощиков

Туэ 19-тӥ июне Эграе бадӟым шумпотон вуиз: Удмуртиысь Кун Кенешлэн решениезъя кар выллем Эгра посёлок пыртэмын гуртъёс пӧлы. Мар сётоз таӵе воштӥськон ёросэз азинтонын? Та сярысь кенешиськом Эгра ёрос муниципал кылдытэтлэн администрациезлэн йырыныз Пётр Перевощиковен.

— Пётр Ильич, ёрослэсь статуссэ воштон мар сётӥз?
— Таӵе воштӥськон шумпотымон луиз. Угось ёросысь ӝыныезлэсь уноез калык улэ Эгралан. Табере соослы гуртысь дышетон, тазалыкез утён но культура удысъёсын ужасьёслы сямен кун ласянь юрттэт вуоз. Воштӥськозы бюджет кусыпъёс но тарифъёсын герӟаськем политика.
Берло дыре ёросын трос ужъёс лэсьтӥсько «Гуртэз азинтон» кун программая. Матысь 5 аръёслы та программая кун бюджетысь 23 миллион манет висъямын, уно семьяослэн улон условиоссы умоятэмын. Социальной удысъёсъя но ЖКХ-я юртъёс ӝутыны 1 миллиард уксё кутэмын. Тани Мазьги гуртын пуктэмын нылпи сад, Зура черкогуртысь шор ёзо школаын — стадион, Меньйыл черкогуртын — школа. Чагыр эстӥськон вуттэмын Эгра, Факел, Чутыр черкогуртъёсы но Пирнэзь гуртэ. Али ёросын 3 сюрс 365 квартираосы но юртъёсы газ кыскемын ни. Та уж ялан паськыта.

— Нош кызьы азинско тазалыкез утён но дышетон удысъёс?
— Татын но трос умоез: больницаос но медпунктъёс узырмо туала ӟеч оборудованиен. Соос юртто висись муртэ валаса но ӝог эмъяны.
Озьы ик выльдӥське дышетон удыс. Ваньмаз сямен школаосын Интернет вань. Дышетскисьёсты нуналлы быдэ 16 автобусэн школаосы нуо-ваё. 94,4 процентсэ нылпиосты школаын пӧсь сиёнэн сюдо. Эграысь 5 номеро школаын усьтэмын кадет класс. Со юрттоз нылпиослы вордӥськем шаерзэс гажан мылкыд пыӵатыны.

П. Перевощиков вордскиз Эгра ёросысь Сепож гуртын. Ужаны кутскиз сюрес лэсьтонъя управлениын. Кык ар служить кариз. Собере тыршиз Ижысь механикая заводын. Но гуртын будэм пилы городын улон ӧз яра. 1979-тӥ арын «Чутырский» совхозэ вуиз. Нырысь физкультурая методист вал. 1983-тӥ арын бригадире пуктӥзы, 1991-тӥ арын совхозысь парторганизацилы секретаре бырйизы. Со аре ик Чутыр сельсоветлэн исполкомезлэн тӧроез луэ, нош 1994-тӥ арын администрацилы йыре пукто.
Пётр Ильич 2000-тӥ арын йылпумъяз Кун службая Урал академиез. 2001-тӥ арын «Чутырский» СПК-лэн тӧроез, нош туэ январе Эгра ёрослэн администрацилэн йырыз луиз. Пусъемын Удмурт Республикаысь Правительстволэн но Россиысь Гурт удысъя министерстволэн Данъян грамотаосынызы, «Удмуртиысь но Россиысь гурт удысысь дано ужась» нимен.

— 10 арлэсь кема кивал-тӥды ёросысь одӥгеныз бадӟым гурт хозяйствоен. Тӥ чакламъя азьланяз кызьы гурт удыс азинскоз?
— Берло дыре гурт удысын шӧдскымон вамышъёс лэсьтӥсько. Эштосъёс узырмо гырон, кизён, аран но пудо сиён дасян туала техникаен. Музъем уже но пудо вордонэ пыӵало ӟеч амалъёс. Ваньмыз со юрттэ тросгес ю тысь, сӥль, йӧл но мертчан поттыны. Озьы миым Эгра ёрос уйпал районъёс пӧлын ю-нянь будэтонъя нырысетӥ инты басьтӥз. Отчы пыре вань гурт калыклэн, музъем ужасьёслэн, кивалтӥсьёслэн тыршемзы-сюлмаськемзы.
Туэ но урожаймес урод уд шуы. Тулыс кизёнэн трос шуг-секытъёс адӟим. Муос котькытын огкадь ӧз вуэ ке но, кидысэз дыраз согим. Юосмы ӝог кисьмазы, но тысез, азьло аръёсы сярысь, лябгес. Быдэс ёросъя котькуд гектарысь 17-18 центнер люкаськыны кулэ.

Туннэ нимысьтыз пусъёно гурт хозяйствоослэсь пудо вордонэз азинтон бордын ужамзэс. Ёросын арысь аре йылэ пудо сиён дасян, умоя солэн ӟечлыкез. Кылем арын котькуд скаллэсь йӧл кыскемъя элькунамы кыкетӥ интые потӥмы вавожъёс бере, яке скаллы быдэ 5 сюрс 472 килограмм луиз. Нош ёросамы вормисе потӥз «Рассвет» огазеяськон. Татын скаллы быдэ 6 сюрс 775 килограмм йӧл люказы. Огазеяськонэн 5 ар быгатыса кивалтэ ни Сергей Балобанов.

Ёросын арысь аре трос йӧл кыске «Чутырский» эштос. Холмогор выжыысь скал вордонъя со племзавод луэ. Пудо вордонэз но племенной ужез быгатыса нуиз Татьяна Скрябина. Туэ январьысен со СПК-ен кивалтэ. Озьы ик ушъясал «Ленин сюрес» эштослэсь кузёзэ Михаил Хохряковез. Хозяйствоез 18-тӥ арзэ валаса нуэ, эштос азьпал радын ветлэ.

Азьмынӥсьёслэн пыдтышказы лёгасько ни «Зуринский агрокомплекс» но «Прогресс» ООО-ос. Кивалтӥсьёссы — Елена Чиркова но Пётр Корепанов. Таос гуртын зэмос кузёос луо, кыкназы но куашкан калэ вуэм хозяйствоосты йыг-йыг пыд йылазы пуктӥзы.

Но ваньмыз хозяйствоосмы огкадь уг азинско. Тани тужгес кыдёке интыяськем «Заря» эштосэз 24 арлэсь кема азинтэ ни Георгий Усков. Татын туж начаресь музъемъёссы ке но, гуртоос ваньзэ чидало. Тырмыт но ӟеч пудо сиён дасяса, сӥль но йӧл поттонзэс будэто, фермаоссэс выльдо.

— Кыӵе ужпумъёс ёросэз тужгес сюлэмшугъяськыто?
— СПК-ослы но фермеръёслы пыд йылазы возиськыны туж секыт йӧтэ. Малы ке шуоно гурт техника, эстӥськон, электрокужым, минерал сылалъёс, воштос ёзъёс но мукетыз ялан дунояло, нош ми сиён-юонмес котьку — тол но, гужем но — дунтэм вузаськом, нош солэн асдуныз уг кулэсмы ук. Алигес тани сӥльлы дун нош ик 30-40 манетлы синӥз. Молокозаводъёс литр йӧлмес 11-12 манетэн гинэ басьто. Таӵе условиосын гурт хозяйствоослы улыны юн шуг. Соин ик егитъёс но гуртэ уг кылё. Али милям уг тырмо механизаторъёс, дояркаос.

— Эгра ёрослы туэ 75 ар тырмиз. Азьланезлы кыӵеесь малпанъёсты?
— Азьланезлы малпанъёсмы бадӟымесь. Нокыӵе шуг-секытъёс милемыз уг кышкато, соос угось ваньмыз сэрттыны-пертчыны луоноесь. Эграос пезь-пезь ужаны быгато.
Туннэ ёросысь улӥсьёсты ӟечкыласько юбилеен. Ваньмызлы сӥзисько азьланьын эшшо но чупресгес берганы выль вормонъёс басьтон понна!

Геннадий Романов

Темалы тупась материалъёс:

Бырон азьын сюлмаськон?


Удмурт Дунне
By Удмурт Дунне Сентябрь 18, 2012 15:07