Кыӵе мон шудо!

Удмурт Дунне
By Удмурт Дунне Август 1, 2012 10:08

Кыӵе мон шудо!

Л. Биянова «кенешчи» эшъёсыныз.

Кӧня ныпъетэз вормыны быгатэ нылкышно, кӧня чидан пыр потыны кужым шедьтэ ненег сюлэм. Тае эшшо но зол шӧдӥськод, «Удмурт кенеш» огазеяськонлэн Дэри ёросысь ёзэныз кивалтӥсь Лидия Биянова шоры учкыса.

Улон сое ӧз нуныя, вань сюлмыныз яратоно кузпалзэ но туж вазь басьтӥз. Но кышномурт сайкытэзлы осконзэ ӧз ышты. Аръёс ортчемъя та осконэз, оло, юнма гинэ.

Шуо, адямилэн ваньмыз аслаз кияз. Озьыен, со киосты лэзьыны уг яра. Ёросысьтызы «Удмурт кенешен» тямыс ар ӵоже кивалтӥсь Лидия Михайловна тае туж ӟеч вала но ассэ туж шудо адямиен лыдъя.

— Лидия Михайловна, кыӵе мылкыдын басьтӥськиды вал «Удмурт кенешен» кивалтыны но, уж вылын со малпанъёс быдэсмизы-а?

— Азьвыл удмурт огазеяськонэн рос-прос кусып возьылӥ шуыны уг быгатӥськы. Кӧня ке ар ӵоже ужай ёрос газетын, пӧсь материалъёс гожъяй, удмурт кылын «Ӟардон» газет поттӥ. Ёрос йырмы ужамме синйылтӥз, но ӟырдыт статьяосы понна ӧз куареты, администрацие кыскиз. Озьы Дэри ёрос администрациысь калык огазеяськонъёсын но иворъёсты вӧлмытон ёзъёсын кусып возёнъя отделэн кивалтыны кутски.

Адямиос дорам пӧртэм юанъёсын, куронъёсын ва-зиськылӥзы, собере кутскизы асьсэ дэмланъёссэс, ӵектонъёссэс но вераны. Тӥни озьы нуналмысь пумиськонъёс, сюлэмшугъёсты сэрттон-пертчон пыр удмурт калык мыным «Удмурт кенеше» ӧс усьтӥз, та огазеяськонэн кивалтыны оскиз.

Нырысь туж шугъяськи: быгато-а калыкез огазеяны, азьлань валтыны, Мария Ишматова, Валериан Никитин выллем зол кивалтӥсь луыны? Валасько вал: ёросмы лыдызъя но, быдӟалаезъя но азьпал радъёсын, Удмуртилэн шораз интыяськемын, шоркар вӧзын, котьку син азьын. Татын калык но аспӧртэм: бадӟымгес куронъёс пуктэ огазеяськонъёс азе но, кивалтӥсьёс азе но, политикаен золгес тунсыкъяське, тодон-валанзэ будэтон сярысь сюлмаське. Нош мон общественной ужын выльгес адями, улон но ужан опытэ ӧжытгес кадь потылӥз. Йылпумъяй Удмурт кун университетысь филология ёзэз, трос аръёс ӵоже дышетӥсь луыса ужай. Картэ ожгарчи вал бере, армиын но тыршоно луи, бӧрысь тӥни журналистикае вуи. Нош «Удмурт кенеш» мон понна воксё выль удыс луиз. Озьы ке но мылкыды секыт ӧй вал. Угось ёросамы «Удмурт кенешлэн» ужез рос-прос пуктэмын вал. Вӧзамы али но тыршо визьмо, йӧно удмурт воргоронъёс. Пӧлысьтызы кыкез — Валериан Никитин но Иван Осинцев — асьсэос но «Удмурт кенешлэн» ёзэныз кивалтэмын. Тодӥсько, котькыӵе юанэн вазиськы, соос кылзозы, визь-кенеш сётозы.

Азям ужпум пуктӥ: туннэ нуналысь ваньзэ ӟечсэ утёно, азинтоно но выль малпанъёсмес улонэ пыӵатоно. Тау «кенешчи» эшъёсылы, «малы озьы», «малы тазьы» шуисьёсыз ӧй вал, ӵемгес ог-огмылы вазиськиськом «ойдолэ тазьы лэсьтом», «тазьы тунсыкогес, тазьы пайдалыкогес» шуиськом. Нош ог-огдэ валан луэ ке, ӵош лэсьтэм уж мабыдӟа шумпотон вае! Ёросамы Э. Батуев нимо премиез сётон, республикаысь нылпиослы-визь погъёслы «Шундыберган» шудонэз арлы быдэ ортчытон, «Ӟардон» газет пыр шаермылы сӥзем конкурсъёс радъян, «Мӧзмон» но «Завьяловские родники» клубъёсын удмурт кизилиосын пумиськонъёс, А. Кузнецовалы но Э. Батуевлы сӥзем лыдӟонъёсты ортчытъян но трос мукет.

Туэ ар кутсконын Изгуртын удмурт культурая центр усьтӥм. Нылпи садъёсын, школаосын вань «Удмурт корка» сэрегъёс. Вань та ужрадъёс сьӧрын сыло нимаз адямиос — мынам юрттӥсьёсы: Дэриысь Ангелина Байсарова, Вера Богданова, Татьяна Пантюхина, Мария Ишматова, Раиса Моторина, Людмила Тепина, Татьяна Терехова, Изгуртысь Галина Мамонтова, Казмасысь Екатерина Семёнова, Подшивалысь Людмила Яковлева, Ягулысь Валентина Максимова, Веньялась Екатерина Малышева но мукетъёсыз.

— Но шугъяськонъёстэк уг луы, вылды. Мар туннэ нуналлы тужгес куректытэ?

— Ёросамы 64 сюрслэсь ятыр адями улэ, 52 процентэз ужась калык тырше Ижын. Со дыре ик шоркарын улӥсьёс пӧлын Дэри ёросысь предприятиосын ужасьёс трос. Ёросмылэн та аспӧртэмлыкез удмурт культуралэн азинскемез вылын шӧдӥське. Ижкарен тач-тач биниськемен, зол ӟучомиськом. Семьяын удмурт кыл ӧжытгес чузъяськыны ӧдъя.

Но! Сюлэмам туж шуныт луиз кылем арын декабре гурт поселениосын быръёнъёс ортчем бере. Ёросамы куд-ог поселениосысь йыръёс воштӥськизы, выль лыктэмъёс — удмуртъёс. Кызьы шум уд поты! Нош та нуналъёсы Дэриысь ураметӥ вамышъякум, шӧдтэк шорысь ӟуч нылкышно дуг-дытӥз но шуэ: «Михайловна, басьты монэ «кенешад». Нош тани Якшурысь Ирина Романова тау карыса жингыртэ, Финляндие вуылэмез, пӧртэм вормонъёсыз сярысь вера. Ваньмыз со удмурт огазеяськонлы, анай кыллы луыса.

Школаез йылпумъясь удмурт нылпиослы юрттэт сётон амалъёс утчаськом. Анай-атайёс вазисько бере «Удмурт кенеше», озьыен, оско. Мукет ласянь, мон со нылпиос понна кыл кутӥсько, тодӥсько: ӟеч семьяын будэм пинал одно ик ӟеч специалист луоз. Удмурт кылэз дышетӥсь но олимпиадаосы пыриськись нылпиосты син азямы возиськом. Арлы быдэ 100 сыӵе пиналлы кузьым лэсьтӥськом — «Ӟечбур!» газетлы дунтэк гожтӥськом.

Юрттӥськомы удмурт-ъёслы кулэ луись книгаосты поттыны, калык доры вуттыны. Нациосын ужан политикая министерстволэн ялэм конкурсаз пыриськыса, уксё утӥмы, «Дюли» нылпи ансамбльмылы костюмъёс вурим.

Туэ Дэриын ортчись «Окно в небо» фольклор фестивале вуылӥзы Карелиысь 3 коллектив, Марий Элысь 2 коллектив, Финляндиысь, Эстониысь, Чувашиысь, Казахстанысь, Краснодар но Челябинск улосысь, Удмуртиысь куноос. Нош Дэриысьтымы 14 коллектив фестивальлэн ужаз пыриськиз. Туж чебер ужрад пӧрмиз. Тӥни озьы шумпотон шапыкъёс оген-оген люкасько но бадӟым вормонлы пӧрмо.

— Ӝоген Кун Кенеше быръёнъёс. Кызьы малпаськоды, «Удмурт кенеш» — общественной огазеяськон — политикае пыриськыны кулэ-а?

— Кызьы сотэк! Асьме пӧлын трос визьмо, улонэз адӟем но ужаны быгатӥсь удмурт адямиос. Удмурт Элькунлэн, удмурт калыклэн туж узыр историез. Кыӵе кужмо, адӟем карымон удмурт кизилиослэн нимъёссы — Трокай Борисов, Кузебай Герд, Ашальчи Оки но мукетъёсыз. Со нимъёс ик туннэ азьлане ӧтё.

Куд-огез дышемын вы-лӥысь-а, улӥысь-а маке витьыса улыны, мукетъёссэ пыкылыны, но ачид ке ӧд ужа, дасез ноку уз вуы. Котькыӵе выжыысь ӟеч адями мед луоз, но удмуртэз удмурт сямен ик со уз вала, пуш дуннезэ уз шӧды. Туннэ нуналлы ёросамы оскымон удмурт кандидатъёсмы вань, соос понна тыршом.

— «Кенешлэн» Дэри ёросысь ёзэз одӥгез тужгес кужмоез лыдъяське. Асьтэлы озьы потэ-а?

— Со укыргес зол верамын, дыр. Но ми тыршиськом. Пис но гурын огназ уг ара ук, ми но ӵош ужаськом. Одно ик кусып возиськом гурт поселениослэн йыръёсынызы.

Бадӟым ужрадъёс дыръя ёрос культура юртлэн сцена вылаз табере чузъяське удмурт кыл. Та ини, малпасько, «Удмурт кенеш» огазеяськонлэн но куинь министерствоослэн (Нациосын ужан политикая, Дышетонъя но наукая, Культурая, печатья но иворъёсъя) висказы кутэм огкыллэн емышез. Пичиен-пичиен ке но, уж вырӟиз. Угось азьвыл сцена вылын удмурт кылэз вунэтыло вал. Али нуись но кык юнмато ни: ӟучсэ но, удмуртсэ но.

Малпасько, ужано школаын сямен: нылпилы кыӵе ке предмет тунсыко уг ке поты, косэмен гинэ йырвизьмыз уз узырмы. Общественной огазеяськонын но озьы ик: адямилэсь тунсыкъяськонзэ улӟытоно, тодэмез потыны мед кутскоз. Нош со понна аслыд тодӥсь-валась, нуналлы быдэ маке выльзэ сётӥсь луоно. Маке бордын ӵош тыршиськод ке — тунсыко, нош но нош выльзэ лэсьтэм потэ. Нош палэнын учкыса сылӥд ке, сюлэм вырӟоз шат?

— Вал-а «Удмурт кенешысь» воксё кошкон мылкыдъёсты? Мар возе?

— «Удмурт кенеш» тод-матӥз монэ яркыт удмурт кизилиосын, адӟем карымон адямиосын. Со тодматсконъёс, мылкыдъёс — вань улытозямлы сюлмам! Юнме шат «Удмурт кенеш» сярысь малпакум, йырам лыкто «кыӵе мон шудо адями» кылъёс. Нош ваньмыз со улонам луытэк но быгатэ вал ук… «Кенешчи» луыны, та адямиос вӧзын сылыны — мыным вылӥ дан.

— Тӥ — одӥгез тужгес мыло-кыдо, кутскем ужзэ пумозяз рос-прос вуттӥсь, котыр ласянь синмаськымон удмурт нылкышно кивалтӥсь. Улон шоры сюлмын-а, визьмын-а тросгес учкиськоды?

— Ужан интыям визьмылы оскисько, нош улон сюрестӥ мынӥсько, сюлэмылэсь кылзӥськыса…

Елена Миннигараева.

 

Удмурт Дунне
By Удмурт Дунне Август 1, 2012 10:08