Улмо сиёд — егит луод

Удмурт Дунне
By Удмурт Дунне Август 15, 2012 16:15

Улмо сиёд — егит луод

Кылбурчи, журналист Г. Романова.

Кылбурчи, прозаик, журналист, драматург, та вакытэ Галина Романова «Кенеш» журналын тырше. Нырысьсэ соин тодматскыны кылдӥз вал ай, школаын дышетскыкум. Со дырысен уно аръёс ортчизы, нош Галина Васильевна азьло кадь ик: чебер, йӧно, егит.  
Кӧня ке ар талэсь азьло Галина Васильевнаен одӥг кабинетын ужаны кылдӥз. Ялан кытчы ке кыштыр-кыштыр дыртэ, интыяз пуконэз уг тодылы кадь. Кытысь меда сомында кужымез кышномуртлэн?
— Егит дыръям котьма карыны вуылӥ, куд-ог дыръя аслым ачим ик паймылӥ, — шуэ Галина Романова. — Арнялы быдэ командировкаосы, калыкен пумиськонъёсы потаса, жадиськод кадь, со вакытэ ик кужым но люкаськод. Пукыса азгынмоно, азьтэмсконо, гуртъёсы потаса, калыклэсь улэм-вылэмзэ адӟыса, паймоно соослэн чидась луэмзылы. Гуртоос шоры учкыса, эшшо но кужмогес луэм потэ.
Галина Васильевна тазалыкезлы уг ӝожтӥськы ке но, туж чакласькыса сиське. Мӧйымыса, пе, ымныр гинэ ӧвӧл, пуш ёзвиос но пересьмо. Соосты утён сярысь ик сюлмаське кылбурчи. Мултэссэ уг сиськы. Соин ӝӧк вылаз возе бакча сиёнъёс, емышъёс.
— Куд-ог адямиос сиськемзы бере улмо куртчо, пиньзэс озьы сузяло, лэся, — вера Галина Васильевна. — Та емышез мон маялэн ӵошатысал, вань сиёнэз чырсатэ кадь. Соин ик мон мукет амал шедьтӥ: котькуд ӵукна, сютэм вылам, 2-3 улмо сиисько. Собере нуназе гинэ сиськисько ни.
Нялтас вераса, эмчиос но яблокез сиыны дэмлало сиськемлэсь азьло яке мукет сиёнэн џош. Кќтпушенызы курадњисьёсты гырезь улмо шугомытыны быгатоз.
Берло дыре Галина Васильевна кеч йӧллы синмаськем. Ӵукналы быдэ кеч йӧллэсь кузятэмен, чечыен нелькем шуэн но эмезен вож чай юэ. Гужем вакытэ тросгес сиыны тырше емышъёс. Нуназезэ кык пыжем картофка, кияр, помидор, пӧзьтэм курегпуз вылынгес ортчытэ. Со сяна, нунал куспын 6-7 миндаль, 1 сузь мында арахис сие, ӝытазеяз нош ик бакча емышъёслэсь (кабачок, ӵуж яке гордкушман) пӧраське, кефир юэ. Эн кышкалэ, вань улонзэ емышъёс вылын гинэ уг ортчыты. Арнялы одћг пол  шыд пӧзьтэ: гужемзэ ӵемгес пӧзьтэ курег сӥль, нош толалтэзэ кунян сӥль. Со сяна, пыжиське: колысэн я кубистаен перепечсэ вань куноосыз ушъяло.
Таӵе рецепт эмъясьёс шат веразы шуыса юамысьтым, Галина Васильевна паймиз. Котькуд адямилэн, пе, организмез пӧртэм: кин ке чырссэ, кӧё-вӧёзэ сиыны яратэ, нош кин ке ымтыр улмолэсь но кисыра. Егитгес дыръяз Галина Романова но ваньзэ яратыса сием, бќрысь  ини чакласькыны кутскем. Арлыдо адямиослэн лыоссы лябӟо, соин ик тросгес сиыны ӵектэ чорыг но кузятэм.
Голькыт сиёнъёс но пӧраськемъёс тазалыклы люкето, шуэ Романова. Сакыр-песокез чечыен воштэ, нянь сие ӵужъемлэсь пыжемзэ  гинэ — «Тибецкойзэ». Салатъёсты суралтэ сузямтэ (нерафинированной) кӧсвӧен.
Удмуртъёслэн тужгес яратоно сиёнзы пӧлысь одӥгез — картофка. Сое парыны, пӧзьтыны, пырсатыны, нелькыны луэ, нош Галина Васильевна пыжысагес сие. Шыдзэ ке чылкак картофкатэк дася. Курег сӥлен лымаз кубиста, фасоль, ӵужкушман, помидор но пичильтык йыды кеньыр ватса, нош сие векчи юдэм кумезен (чеснокен).
Галина Васильевналэн яратоно юонэз — вож чай. Кӧлыны выдон азяз одно ик турын-куаръёслэсь (сое кофе изон пыр поттэ) чай юэ. Бакча емышъёслэсь уг ӵыды бере, троссэ толалтэлы кынтыса дася. Укроп, петрушка куаръёс вӧзы одно ик интыя помидор, ческыт пӧсьтурын (перец), каун.
Нош туннэ Галина Романова аслэсьтыз яратоно сиёнъёссэ лыдӟисьёсмылы ӵектэ.

Муслэсь котлет
Кулэ: ӝыны килограмм кунян мус, 3 курегпуз, 1 стакан пызь, 2 картофка яке кабачок, 2 пуньы скал вӧй, 2 йыр сугон.
Мусэз, сугонэз но картофкаез яке кабачокез  сӥль коран пыр лэзёно. Пӧлазы курегпуз, пызь, шунтэм вӧй пононо но ваньзэ сурано. Таба вылын кӧсвӧен пырсатоно. Луоз гурын но пыжыны.

Рислэсь но чырстурынлэсь зӧк табань
Кулэ: 1 стакан рис, кык кырым чырстурын (тросгес но яралоз), 3 курегпуз, 1 стакан пызь, 2 пуньы скал вӧй, 2 йыр сугон.
Чырстурынэз но сугонэз сӥль коран пыр поттоно но пӧзьтыса дасям рисэн, курегпузэн, шунтэм вӧен сурано. Таба вылын кыкнапалзэ ик пырсатоно. Луоз гурын но пыжыны.

Валентина Емельянова.

Удмурт Дунне
By Удмурт Дунне Август 15, 2012 16:15