Ку «ми» луэ «мон»?

Удмурт Дунне
By Удмурт Дунне Август 29, 2012 10:48

Ку «ми» луэ «мон»?

Семьяез шулдырто кыктоос.

Нылы пинал ваёно луэм. Кыктоос, пе, вордӥськозы. Ваньмы шу­м­потӥмы. Нош ми соосты будэтыны дасесь ӧвӧл. Мар кароно, кызьы утялтоно кыкто нылпиосты?
Полина Вострикова.
Ижевск город.
Та юанэн вазиським Ижысь 5-тӥ номеро нылпи больницаысь педиатрлы Лидия Воронцовалы.
— Валамон, кыкто пинал ваён сярысь иворез кылыса, тросэз анайёс шуак луо, кышкатско. Уката ик нырысьсэ вордӥсьёс. Анайлы одӥг нуныез секыт ай пыд йылаз ӝутыны, нош татын кыксэ ӵош.
Котькудӥзлэн нунылэн тусьты-пуньыез но дӥськутэз аслаз гинэ, нимаз луыны кулэ. Пиналъёсты ӟоскыт интыын возёно ӧвӧл, трос шудонъёс пӧлын но пичи азьын соос алекмо. Соин ик нылпиостэс ӵемгес ульчае поттаны тырше, чылкыт омырен мед шокалозы.
Кыксэс ик пичиысен нимаз аспӧртэм адямиосты сямен (личностьёсты) будэтыны кулэ, семьяын гинэ ӧвӧл, ульчаын но, нылпи садын но, школаын но. Котькудзэ  нуныез вошъяса киын нуллоно, лэйкатоно, вераськоно, кырӟано. Тросэз анай-атайёс кыкто нылпиоссэс огвыллем дӥськутэн нуллыны туртто. Уката ик пиосты. Но умой луоз соосты пӧртэм дӥсяны, йырсиоссэс пӧртэм ӵышкыны. Одӥг шапык кадь медаз луэ. Вордӥськем нуналазы соизлы но, таизлы но быдэн кузьым кузьмано. Кыкназылы вылысь одӥг шудон сётоно ӧвӧл. Озьы ик пирог но быдэн пыжоно. Школае ветлыкузы ини, вордӥськем нуналъёсазы соос кыкназы ик быгатозы асьсэлэсь эшъёссэс доразы куное ӧтьыны. Озьы котькудӥз аслыз гинэ тупась луыны быгатоз.
Номыр кышкытэз ӧвӧл кадь, анай нылпиосыз шоры тазьы вазе ке: «Нылъёс (пиос), лыктэ мон доры!» Но кыктоосты одӥг нимын, кылсярысь, нылъёс шуыса, ӧтьыны уг яра. Котькудӥз шоры аслаз нимыныз вазёно, ваче вожанзы медаз кылды шуыса.
Нылъёс быдэ вуыку, соосын нимаз вераськон вакытъёс вуо: гадьёссы будо, вир кошконзы кылдэ. Но нылашъёс ог-огенызы котьку ӵош, люконтэмесь. Мар кароно сыӵе дыръя? Котькудӥныз одно ик нимаз вераськоно, мукетыз нылаш медаз кылы музонэныз ӵошен вераськемдэс. Сотэк соослэсь сямзэс уд валалэ. Асьсэ сярысь «ми» шуыса гинэ медаз вералэ, «мон» кылэз но валаса мед будозы.
Магазинэ мыныкуз, анай огзэ нылзэ яке пизэ сьӧраз мед басьтоз, мукетъят — музонзэ.
Кыкто нылпиос ог-огзы борды гинэ медаз дыше шуыса, кунгож сьӧрысь психологъёс таӵе амалъёсты дэмлало: пиналъёсты бӧрсьысь бӧрсе нылпи садэ нуллоно. Кылсярысь, одӥгзэ понедельнике но средае, мукетсэ — вторнике но четверге. Нош ӵошенназэс — пятница нуналэ. Таӵе амал нылпиослы пайда гинэ ваёз, соос мукет нылпиос пӧлын шудыны дышозы, эшъёс шедьтозы. Но ог-огзылэсь кема люкыса возёно ӧвӧл. Уг яра сётыны пӧртэм нылпи садъёсы но группаосы, озьы ик пӧртэм школаосы но классъёсы. Нимаз улон кыктоослы секытэн сётӥськоз. Быдэ вуон вакытазы гинэ соосты кемалы люкыны луоз. Озьы ке но армие басьтыкузы, вузъёсы дышетскыны пыртыкузы, кыктоосты ог-огзылэсь уггес люко.
Нылпиос школае мынӥ­зы ке, номырысь уг яра ӵошатыны соослэсь дышетскемзэс, тон золгес, нош тон лябгес шуыса. Гуртысь ужзэс кыкто нылпиос нимаз лэсьтыны кулэ, малы ке шуоно кудӥз ке ӝог лыдъяськыны, гожъяськыны, лыдӟиськыны быгатэ, мукетызлы со ик калленэн но шуген сётӥське. Ушъяны тырше созэ но, тазэ но. Классэн кивалтӥсьлы, дышетӥсьсылы одно ик верано, нылпиослы доразы пӧртэмесь ужъёс мед сётъялозы шуыса.
Капчи уж ӧвӧл со — ог-огзы борды бурмем кыктоосты будэтыны. Но котькудӥз анай-атай асьсэды кык полэс шудоен лыдъяны кулэ: соослы улон бадӟым оскон но шумпотон сётӥз.
Любовь Тихонова.

Удмурт Дунне
By Удмурт Дунне Август 29, 2012 10:48