Коръёс сисьмымтэ вылэм…

Удмурт Дунне
By Удмурт Дунне Август 1, 2012 11:18

Коръёс сисьмымтэ вылэм…

«Лаборатория Пилорама» форумын.

25-тӥ-27-тӥ пӧсьтолэзе Пермьын Европаысь нырысетӥ калыккуспо «Лаборатория Пилорама» форум ортчиз. Отчы вуылӥзы удмуртъёс но — Алексей Шкляев, Дарали Лели, Мария Золотарёва но Надежда Сапожникова.

 

Удмурт луоз-а инкуазьтэк?

«Pilorama Lab» — бадӟым проектлэн оглюкетэз. Радъясьёслэн малпамзыя со усьтӥз Калыккуспо «Пилорама» граждан форумез. Куинь нунал ӵоже палатка лагерьын пӧртэм кунъёсысь егит ӧнерчиос шугомытӥсь юанъёслы валэктон утчазы. Форуме Германиысь, Чехиысь, Польшаысь, Британиысь, Кореяысь но пӧртэм улосвылъёсысь егитъёс вуизы. Ваньзы соос тыршизы ньыль секциын: йӧскалык асвалан (идентичность), кар вӧлмытлык (пространство), историысь узырлык но социальной ужбергатон.

Мон «Йӧскалык идентичность. Этноэкономика. Экология» удысэз эскери. Форум вань малпанъёсме бугыртӥз кадь. Нырысетӥ ӧнерчимы, Финляндиысь вуэм Олли Турунен, экология ужпумъёсты ӝутӥз. Кызьы инкуазь но этнос герӟаськемын? Туала нуналэ удмуртъёс городын но улыны быгато. Яке уг быгато? Олли саамъёс шоры возьматӥз: соос, пе, асьсэды пужейёстэк саам уг ни лыдъяло, ӵапак пужейёсты вордон юрттэ саам калыклы финъёслэсь висъяськыны. Пужейёсты утён понна инкуазез утёно, соос уго писпу вылын будӥсь ӝуйыез сиё — нюлэсъёс быризы ке, пудоос но бырозы.

Луэ на калыклэн экология сямыз сярысь вераськыны. Шуом, удмуртъёс инкуазез гажасесь. Асьмеос инкуазь пушкын улӥськом. Иське, мар вылэ пыкъяське удмуртлэн удмурт луэмез? Муш утён вылэ? Вашкала дыръя со валтӥсь инты басьтылӥз уго. Туала нуналэ удмуртлык возиське гуртын. Озьыен, ӝутоно гурт удысэз.

Олли пусъемъя, йӧскалык идентичностьлэн экономика инъетэз (основаез) луыны кулэ, сотэк со музейлы пӧрме — кызьы американ индеецъёс туристъёс понна тылыос быртто.

Государство азе ужпум пуктоно, нюлэсэз, ошмесъёсты утён — со удмурт нацилэн улон выжыез шуыса. Лэзёно ӧвӧл нюлэсэз муртъёслы кырмыны. Коми-пермяк эксперт Светлана Кольчурина вера: шаерысьтымы Косино ёросын криминалъёс гуртоослы губи бичаны люкето. Таӵегес ик югдур кылдэ, куке шаплыосгес вуо, музъемез капырто но соин герӟаськем ужъёсты ас вылазы басьто. Мурт адями лыктэ но тынэсьтыд удмурт дэремдэ дӥсяса кошке? Уд шумпоты. Малы нош инкуазь узырлыклы саклык ум висъяське?

 

Нюня но чорыг ваёзы узырлык

Эстониысь эксперт Оливер Лооде — брендъёсын но этнотуризмен вырись. Со ӟеч тодэ, кызьы та ик нюлэс, кудзэ корало сьӧрлосьёс, быгатэ гуртэз узыр карыны. Шуом, гуртлэн нимыз Нюнягурт. Нюлэскын, калык мадемъя, улэ гуртлэн Нюлэс Нюняез. Тэлез коразы ке, гуртлэн историез но быроз. Этноэкономикаез валась мурт соку ик гурт пумын «Нюня» кунокуа (гостиница) пуктысал, турист маршрут лэсьтысал — та нюлэскы ик, кушалысь шуккем кыз доры. Туристъёслы верано, кызэз куке но Нюня шуккем шуыса (со чик но озьы ӧвӧл ке но). Собере «Вконтакте» вотэсын Нюнялэсь бамзэ усьтыны кулэ. Бичано эшъёс, поттоно туспуктэмъёссэ, гожъяно статусъёс: «Туннэ мылкыды умой. Куное вуизы Швейцариысь профессор но Зар-Медлоысь нылпиос». Нюня — гуртлэн брендэз луэ ни. Бренд — со пуштросо пус. Шораз учкыса, соку ик пуштроссэ валаськом. Со понна Нюнялэн одно ик луыны кулэ логотипез, тодмо суредэз. Со пус кыскыны быгатэ ини коньдонэз но. Тодмо бренд миллионъёсын вузаське — «Кока-кола», «Шанель». Выль удмурт бренд — «Перепеч.кин».

Та выллем учыръёсты Оливер Эстониысь шедьтӥз. Одӥгез — эстон староверъёслэн Пейпсимаа улоссы. Староверъёс — Чудское тымет дурысь бырись калык. Туала Эстониын соослы секыт, егитъёс городэ кошко. Одӥгез ужбергатӥсь шутэтскон корка усьтӥз. Малпаськыны кутскизы логотип сярысь, бырйизы тыметын шер пумиськись ряпушка чорыгез. Великен ворттылӥсь «ряпушка-путешественник» логотиплы пӧрмиз. Табере со «Фэйсбук» вотэсын серемес учыръёс вералля, куное ӧтча, староверъёслы выль имидж лэсьтэ. Озьы ик староверъёсты ас брендзэс азинтон бордын ужатэ. Кылсярысь, логотипсэ лэсьтӥз старовер график-дизайнер. Озьыен, вашкала оскон утиськыса гинэ уг улы, туала улонын но уя.

 

Кин «Брангурт песянайёсты» кырмоз?

Паймоно кадь, но эшшо огез эксперт Удмуртиысь Павел Поздеев вылэм. Сое Брангурт песянайёслэсь нырысетӥ продюсерзэс сямен ӧтчазы. Павел вераськиз Брангурт песянайёс брендэз кылдытон сярысь. Али та ним вылын бадӟым уксё поттыны луэ. Кызьы озьы пӧрмиз — коньдон нырысь ик Мускоысь продюсеръёслы кошке? Телевикторинаын песянайёсмылэсь кыӵе кылын кырӟамзэс юало ке, палэнысь муртъёс удмурт уг шуо, бурятэн яке ӟучен сурало. Брангурт песянайёсты нюлэсэз сямен «лушказы». Соос сыӵе ик ресурс ук — калык узырлык. Узырлык — этноэкономикалэн инъетэз. Таиз ласянь, «Бурановские бабушки» — проект. Со ваиз нырысь ик коньдон, собере гуртэ байлык — кыскиз инфраструктураез, тупатытӥз сюресэз, кылдытӥз котыраз тунсык — Брангуртэ пќртэм адямиос вуыло. Ваньмыз со куспаз герњаськемын, юрттэ та интыез азинтыны. Но кышкытлык кылдэ: ваньмыз та калык вашкалаез (аутентикаез), песянайёслэсь зэмос луэмзэс быдтоз шуыса. Шат ву гумы кыскизы ке, вашкалаез кылёз на? Песянай соиныз ик тунсыко, карнанэн ветлэ шуыса. «Русский журнал» шоркар журналысь эксперт-куно Александр Морозов та выллем учырез тодаз вайиз: Суздаль — вашкала чебер город вал, али нош егит кузпалъёслы-туристъёслы нюлэм кадь чильк-вальк конвейер.

Кытын гож: культураез утён — яке со вылын уксё поттон? Таос ог-огзы вылэ ужаны кулэ. Жаляса верано, котькуд креатив малпан азинскыкуз воштӥське. Со быгатэ элькун кие сюрыны но «лубоклы» пӧрмыны, нош быгатэ нимаз инвесторъёс доры вуыны — «попса» луыны, масскультуралы пӧрме.

Озьы ке но Брангурт песянайёслэн феномензы зол. Со возьматӥз, кызьы ужаны луэ калык культураен, кызьы адӟем карыны быгато мукет гуртъёс, отысь фольклор коллективъёс. Валамон луиз, калык лулчеберет но экономика — ог-огенызы герӟаськисьтэм макеос ӧвӧл шуыса.

* * *

Алигес бертай песятаелэн гуртаз — Вуж Мӧньяла. Поръяны потӥ. Учкисько но — школаын буяськись-тупатъяськисьёс ужало, Кавказ палась вуэмъёс вылэм — буш коридоръёсын ас кылынызы кырӟан куараоссы шуккисько. Пайми: удмурт школаын удмурт ужан гур уг кылӥськы ни. Палэнысь вуэмъёслы мон чик но пумит ӧвӧл, но мурт кырӟан ворме шуыса сюлэм шуг.

Палэнэгес ортчыса, чылкак абдрай — вуж, пу коръёслэсь школаез сэрттӥллям-пертчиллям! Кыӵе яратӥсько вал татӥ поръяны, укноосаз учкылыны. Буш кылиз… Кин ке вераз: сэрттыкузы учкизы но, коръёсыз чик но сисьмымтэ вылэм. Соку марлы гуртысь история синпелетэз чиптэм-чаптэм ӵушизы? Та интыез музей но, кунокуа но лэсьтыны луэ вал ук! Тӥни озьы ик быро, вылды, выжы кусыпъёсмы но, историез шӧдонмы но…

Дарали Лели.

Удмурт Дунне
By Удмурт Дунне Август 1, 2012 11:18