Малы индеецъёс быризы?

Туннэ ну­наллы удмуртъ­ёсын тунсыкъ­ясь­кисьёс трос, нош вотэсын соос сярысь ивор ӧжыт. Сыӵе калыкен кусып тупатоно ӟуч кыл пыр. Но та удмурт кыл­мес вунэтон калэ уз-а вутты? Ас малпанъёссэ вера Хельсинкиысь филологияя доктор Светлана Едыгарова.

Абстрактной кы­лэз но куль­тураез му­зей-книгаосын, ви­деогожъ­ямъёсын пусйыны-утьыны луэ, нош котькуд нунал улонын сое утьыны туж шуг. Культураез но кылэз вӧлмытӥськом ке, со котьку абстракт культураез гинэ вӧлмытэ, котькуд нунал культураез яке кылэз утьыны уг юртты. Шуом, Америкаысь индеецъёсты котькин тодэ, соос сярысь миллион книга но фильм поттэмын, озьы ке но туала нуналэ индеецъёс быро.

Саам калыклэн но сыӵе ик югдурез. Малпасько, культураез, тужгес ик вераськон удмурт кылэз, туала вакытэ ворсам сообществоын гинэ утьыны луэ. Со сообществоосы ваньзэ лэзёно ке, вераськон удмурт кыл чиптэм-чаптэм быроз. Сое утён мукет механизмъёсмы али ӧвӧл на. Удмуртъёс пӧлы одӥг ӟуч сямен вераськисез пыртоно ке, ваньмыз соку ик ӟуч кылэ выжо. «Вераськон кыл» татын «ог-огеныд кусып возён кыл» шуэмез возьматэ, коть со диалект, коть литературной кыл мед луоз. Валтӥсез — соин верасько.

Тужгес умой югдур — палэнынгес гуртъёсын. Удмурт кыл утиське умойгес, кытын палэнысь лыктэм ӟуч маргиналъёс трос ӧвӧл (али гуртэ юисьёсты келяны ярато). Эшшо умойгес утиське, гуртлэн идентитетэз (ас интызэ шӧдэмез) ке зол, шуом, отын трос узыръёс уло яке экономикая инфраструктураез кужмо ке. Кылсярысь, Шаркан ёросысь Пороз гуртам вашкала дырысен зол инфраструктураез, со сяна, отын асьсэды дунъямзы-шӧдэмзы но зол.

Олёш Шкляев.