Котькуд тэшкыли — яслие!

Удмурт Дунне
By Удмурт Дунне Июль 17, 2012 10:44

Нылпи садъёс но пиналъёсты школае мынэмзылэсь азьло визьнодан сярысь вераськизы «Огъя Россия» партилэн азьветлћсезлэн Д. Медведевлэн улосысьтымы приёмнояз. Специалистъёслы меӵак телефон пыр вазиськыны быгатӥзы вань мылкыд карисьёс. Таӵеос 100 пала люкаськизы.

Анай-атайёсты одӥг вал­тӥсь юан сюлмаськытэ: ку экезэс нылпи садэ келяны быгатозы? Угось туннэ нуналлы нылпи учреждениосы черод вакчи ӧвӧл. Но кӧня муртлы путёвка туэ уз тырмы на — асьсэос специалистъёс но та вакытэ вераны шугъясько. Списокъёс радъяськозы на сентябрь толэзёзь.

— Чакласьком: вань нылпиос, кудъёсызлы 2012-тӥ арын 3 арес тырме, нылпи садэ туэ мыныны кулэ, — вераз Иж город администрацилэн йырызлэн воштӥсез Ирина Теслева. — Секытгес югдур яслиосын: 2 аресъем ог 3 сюрс тэшкылиос нылпи учреждениосы черодзэс эшшо возьмано луозы на.

Бен, городысь кивал­тӥсьёс оско: 2013-тӥ арын 2 арессэс тырмытэм вань пиналъёслы нылпи учреждениосын инты шедёз ни. Угось та ужпумез сэрттон-пертчон борды республикамы кӧня ке ар талэсь азьло ик чырмыт басьтӥськиз. Озьы берло аръёсы гинэ нылпи садъёсын 5 сюрслэсь ятыр интыос усьтӥськемын. Азьланезлы но малпанъёс пичиесь ӧвӧл.

Кызьы вераз «Нылпи садъёс — пиналъёслы» проектлэн республикамыя координаторез Н. Сударикова, Удмуртиын туэ ватсаса 1 сюрс 809 инты усьтӥськоз на. Кытын ке выль нылпи садъёс пуктӥсько, кытын ке вужъёссэ тыро-пыдо выльдо.

— Ижын 755 инты ватсаськоз, — шуиз Наталья Алексеевна. — Куинь нылпи сад ӧсъёссэ нырысьсэ вӧлъялоз. Со сяна, 10 группа ватсаськоз али ужась учреждениосын. Озьы ик Сарапулын — 130, Можгалан — 110, Пичи Пургалан — 190 интыем нылпи садъёс усьтӥськозы, кылдозы соос Глазов, Красногорск, Вотка ёросъёсысь куд-ог гуртъёсын.

Нялтас вераса, таӵе азинсконъёсынызы Россиысь тросэз ик улосвылъёс ушъяськыны уг быгато. Пермь улосын куинь аресозь пиналъёсын пукись анай-атайёслы компенсация сётъяло вал. Но табере отын но шуге-леке вуэмын. Коньдонзы быдтэмын, нош нылпи садъёссы чик ӧвӧл.

— Кызьы тодӥськом, матысь дыре улонэ пыӵаны кутскоз «Дышетон сярысь» выль закон, — пусйиз Наталья Сударикова. — Отын умой-умой гожтэмын: нылпиосты школалэсь азьло визьнодан дышетонлэн нырысетӥ вамышез луоз. Озьыен, котькуд пинал школае вуыны кулэ ни, нылпи садын марлы но солы дышетскыса. Али вань улосъёс азе ужпум пуктэмын: одӥг пинал но нылпи садэ ветлытэк медаз кыльы!

* * *

Ижын туэ нырысетӥ арзэ улонэ пыӵаны кутскиз нылпи садъёсы электрон черод пыр гожтӥськон. Озьы анай-атайёслэн луонлыксы кылдӥз нылпи садъёсы Интернет пыр гинэ йыгаськыны. Одӥг пиналэз вить учреждение гожтыны луэ.

Со сяна, Иж город администрация анай-атайёслы тодазы вайытэ: таяз арын путёвкатэк кылем пиналъёс 15-тӥ сентябрьысен черодэ выльысь пуктэмын луозы. Та понна нимысьтыз куриськонъёс гожъяны кулэ ӧвӧл ни.

— Кин секыт югдуре сюремын но, нылпи садэ путёвка ӧз шедьы, таӵеос воксё медаз чигиське, — ватса Ирина Теслева. — Соослы юрттон вылысь 20-тӥ августысен котькуд ёросын ужаны кутскозы нимысьтыз комиссиос.

Эшшо: воспитательёс бордын ужасьёслэсь пиналъёссэс нылпи садэ черодтэк куто. Соин ик куд-ог анайёс пиналынызы ӵош асьсэос но нылпи садэ лыкто. Та — нылпи учреждениосты кадръёсын тырмытонъя одӥгез амал. Вакансиос вань на. Со сяна, город Думаысь депутатъёс решение кутӥзы: воспитательёс бордын ужасьёс нылпи сад понна тупатэм дунъёслэсь 10 процентсэ гинэ тырыны быгато. Оскон вань, ар пумозь уждунзы но кӧнялы ке йылоз. Нялтас вераса, 1-тӥ сентябрьысен воспитательёслэн уждунзы дышетӥсьёслэн туннэ уждунзы быдӟа луыны кулэ ни — таӵе мылкыдзэ вераз Россилэн Президентэз Владимир Путин.

Элина Кумачёва.

Удмурт Дунне
By Удмурт Дунне Июль 17, 2012 10:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*