Йылпумъянъёс лэсьтэмын Наркотикъёсты но шузимытӥсь суретъёсты вӧлмытонэн нюръяськонъя кун службалэн Удмурт управлениезлэн кылем арын ужамезлы. Ужрадэ пыриськиз Президент Александр Волков.
Шараямын таӵе лыдпусъёс: 2011-тӥ ар ӵоже республикаямы шузимытӥсь суретъёсын герӟаськем 2 сюрс 272 законэз тӥян учыр луиз. Со пӧлысь 79 процентэз пыре секыт йыружъёс пӧлы. 15 наркопритон таркамын.
- Йыртэмасьёс киысь таламын ог 280 килограмм шузимытӥсь суретъёс, – пусйиз управленилэн кивалтӥсез Сергей Зуев. – Со пӧлысь 58 килограммез героин, 103 килограммез марихуана но мукет.
Нимысьтыз саклык висъямын дезоморфин пӧзьтӥсьёсын нюръяськонлы – тодмо луиз 77 учыр. Кылем арынлэсь со 65 процентлы тросгес. Адямиез кӧня ке толэзь куспын сисьтӥсь сурет уката вӧлмемын вал Сарапул городын. Соин ик быдэс республика кужымзэ понӥз отысь югдурез тупатон понна. Президент Александр Волков нимысьтыз вазиськонэн потӥз городлэн но ёрослэн администрациосазы, куриз: дезоморфин пӧзьтонэ кутӥськись эмъюмъёсты эркын вузано ӧвӧл. Аптекаослэн кивалтӥсьёссы но та ласянь чурыт алэмын вал.
- Ваньзы мед тодозы: наркотикъёсты вӧлмытыса узырмыны малпасьёслы Удмуртиын номыр карыны. Соослы ганяк шокчыны ум сётэ! – наркотикъёсты вӧлмытонэн нюръяськонъя комиссилэн одӥгаз коллегияз лек вераськиз вал Президент.
Таӵе мылкыд кылемын али но. Югдурез утисьёс, наркополицейскойёс одӥг кыткетын ужало мурт синкылиос вылын барыш поттыны турттӥсьёсты шараян но кылзэс юан понна. Госнаркоконтроль кылдытэмын вал 2003-тӥ арын. Сергей Зуевлэн верамезъя, солэн пайдаез та дыр куспын зол шӧдӥськиз ни. Наркотикъёсын эсэпсэ валатэк (передозировка) кушласькисьёс пӧлын кулон учыръёс 5 поллы ичиёмизы. 2003-тӥ арын ӝог юрттэт сётӥсьёс ог 1 сюрс пол потазы шузимытӥсь суретъёсын шугомемъёс доры, туэ – 10 поллы ичигес.
Элина Кумачёва.
(Куараос ӧвӧл на)
Loading ...
