Шоркарамы улӥсьёс, озьы ик Иже куное вуэмъёс веръязы ни, луоз, Шор карлудысь гурын пыжем перепечез. Кызьы ивортылӥмы вал ини, таӵе аспӧртэмлыко проектэз улонэ пыӵато егит удмурт ужбергатӥсьёс Роман Дементьев но Семён Семёнов. Соос усьтӥзы «Перепеч.кин» огазеяськонзэс. Сӥльын, кубистаен перепечъёсты син куспын пӧсь гурын пыжо: ческыт пыжосэз веръяны мылкыд карисьёс тачак люкасько. Пӧлазы – кунгож сьӧрысь вуэм куноос но.
Но Шор площаде пуктэм гур куашказ. Ӧз чида, лэся, тамында калыкез перепечен утялтыны. Но ужбергатӥсьёслэн мылкыдзы та пумысен ӧз сӧриськы. Гурез тупатом ог кык нунал ӵоже, оскытӥзы Романэн Семон. Озьыен, матысь нуналъёсы Шор карлудын ӵын поттоз выль гур – перепечъёс эшшо но ческытгес луозы.
Тунсыко: толэзьлэсь ятыр дыр ӵоже перепеч пыжытозязы, ужбергатӥсьёс быдтӥллям ни 18 (!) кубометр пу. Выль пуктэм гурысь пӧсь пыжосъёсты веръяны луоз Вӧйдырозь – март кутсконозь, шутэтскон нуналъёсы.
Наталья Седова.
(Куараос ӧвӧл на)
Loading ...
