Кытчы пуктоно запятой?

Н. Мусалимов.

Ньылетӥ декабре кыӵе партилы куара сётэмзы шоры учкытэк, удмуртъёс шумпотӥзы Николай Мусалимовлэн Кун Думае ортчемезлы – асьме адями ук, «Удмурт кенешен» кивалтэ! Нош 13-тӥ декабре «Удмурт кенеш» ужан нунал вискын шуак ивортӥз исполком люкан сярысь. Иське, чилектӥз…

Исполком азьын, кызьы мадё отчы пырисьёс, Николай Мусалимов вераз: мон мандатэлэсь куштӥськисько… Калык нырысь-валысь ӵоксузиз: кызьы? Н. Мусалимов «Огъя Россия» партилэн списоказ азьветлӥсьын вал, со быръёнэ калыкез «Удмурт кенешлэн» нимыныз ӝутказ. Партия понна тросгес куаразэс сётӥзы гуртъёсын, нош отын ӵап удмуртъёс уло. Озьыен, удмурт адями понна сётэм куараос огшоры калыклы валантэм мугъёсъя малы ке но выжо воксё тодмотэм муртлы? Н. Мусалимов шуиз: сыӵе решение кутэмын вылласянь.

Куд-огез исполкомчиос асьсэлэсь малпанзэс шараязы, депутатэз сыӵе вамышлэсь алыны выризы, куд-огез шыпыт лулӟылӥзы. Кык час вераськемзы бере огъя йылпумъян та ӝыт таӵе вал: туж ӝож, туж вӧсь, но номыр карыны уг луы: ульчае уд поты ук.

Зэмзэ ке, соку маке-маке карыса эскерыны луэ на вал. Угось ачиз Н. Мусалимов верамъя, та нуналлы со мандатэзлэсь куштӥськемын ӧй вал на. Котьма медло, но отказ гожтэм бере депутатлэн законъя малпаськыны кӧня ке нунал дырыз вань на. Тодмо ӧвӧл, кыӵе мылкыдзэс возьмаз Мусалимов эшъёсызлэсь. Котьма медло, но мон сямен, юнгес шуыны луэ вал: ӧвӧл тӥляд, Николай Николаевич, куштӥськыны праводы! Уг яра! Но «кенешчиос» мукет сямен дурбасьтӥзы – Мусалимовез… жалязы. Шуизы: милемлы таӵе учыр уг кельшы, но судить ум кариське… Верало, куд-ог эшъёсыз меӵак аслыз шуиллям: ми валаськом, таӵе ултӥянлы пумит пиньёсты возьматыны кулэ вал, дыр, но асьмеды пешкытозы ук… Исполкомын кенешизы вылӥ кивалтӥсьёслы вазиськон гожтыны.

Югдурез милесьтым ӟечгес тодӥсьёс ивортэмъя, Н. Мусалимов мандатэзлэсь туж шуген люкиськиз. Нырысь отказ гожтӥз, собере малпаськыса сое берен куриз. Но вакчи дыр ӵоже мылкыдыз нош ик чутрак воштӥськиз (валан кылдэ: воштытӥзы), со кыкетӥзэ отказ гожтӥз.

Четверге, 15-тӥ декабре, ӝыт, «Удмурт Кенешлэн» вице-президентэз Татьяна Ишматова нош калыкез люказ: пӧлазы вал исполкоме пырисьёс но ӧтем муртъёс. Та рад но огъя йылпумъян сыӵе ик: Мусалимовлы дурбасьтом, вуоно арняе республикалэн йырыныз пумиськом, малпанъёсмес шараялом. Нош со вие Мусалимовлэн депутат луон луонлыкез кылиз на уйшорозь гинэ…

Соку со вал Москваын. Ӝыт тямыс час котыр ми телефон пыр герӟаським Николай Николаевичен. Оло, воштӥды малпандэс, ми татын юнме пӧсекъяськом? – юам ми.

- Ӧй. Жаль, но озьы пӧрмиз, – вазиз со.

Ӵуказеяз маке карыны бер ни вал. Николай Николаевич куректӥз Москваын, ми дэмен лекъяським но кайгырим Ижын. Редакцие жингыръязы, пыразы ӝожомем удмуртъёс, кесяськизы, малы газет Мусалимовлэсь кылзэ уг юа.

Нош Мусалимов телефон пыр вера: номыр вераны…

- Но маке но карыны малпаськоды, дыр, ук?

- Йӧскадь тодмо ӧвӧл на, шуизы, ужтэк уз кельтэ, Удмуртиысь Правительствое инты сюроз… Федерация Кенеше-а… Вуоно ӧтчаме тросгес удмуртъёс Кун Кенеше ортчозы…

- Нош «Удмурт кенешъя» кыӵе малпанды?

- Соин кивалтонлэсь куштӥсько, дыр. Мыным возьыт табере калык шоры учкыны, пӧям кадь луыса кошкиз. Мон соосты валасько. Мон ачим ӧй тодылы тазьы берытсконэз, но табере мар на? Сыӵе решениез партилэн. Бадӟым политикаын огназ адями номыр карыны уг быгаты. Нош бадӟым коньдонэ мынам ӧвӧл…

- Зэм вераса, возьмаськоды-а али удмуртъёслэсь та учыръя кыӵе ке вамышсэс?

- Йырыным валасько: ваньмыз понна кыл кутыны кулэ мон ачим, сюлэмыным… ӧйтӧд. Шуг таӵе учыре валамзэс возьманы. Таӵе учыр нырысьсэ ӧвӧл…

 * * *

Вазенгес ни «Удмурт кенеш» огазеяськон воштӥз уставзэ, общественно-политическойысь пӧрмиз огшоры общественной огазеяськонлы. Шуизы, кенеш табере политикаен уз выры… Но вань тодмо веран: тон ке ӧд выры, тонэн вырозы. Улэп учыр тани син азямы. «Удмурт кенешлэсь» нимзэ уже кутӥзы но аналтӥзы.

Арня ӵоже та пумысен сомында пол мылкыдъёс вошъяськизы ни, сомында пыкылонъёс чузъяськизы, табере уд но вала ни, кин кытын, ку но мар вераз… Но «Удмурт кенеш» аслэсьтыз малпанзэ та дырозь ӧз шарая на. Сӥзизы матысь дыре. Ёрос кенешъёсысь кивалтӥсьёс (озьыен, данакез мукетыз удмурт калык) югдурез рос-прос али но уг тодо ай. «Удмурт кенеш» шуак мар карыны ӧз вала, газетчиос возьмазы официальной нимаськись решениез. Нош кулэ вал иворез шараяны соку ик – оло, шедьысал ӟеч визь-кенеш сётӥсь, ваньзэ интыяз пуктӥсь. Уть, толэзь талэсь азьло кӧня яркыт визьмо адямиос люкаськылӥзы Удмурт театре, «Удмурт кенеш» огазеяськонлэсь 20 ар тырмонзэ сӥё-дано пусъёнэ. Сыӵе шуныт вал. Трокай сярысь книга кисьмаз. Солэн нимыныз медаль сётъязы. Ми, газетчиос, арбыт гожъямы Т. Борисовлэн улэм-вылэмез, удмуртъёс понна аслэсьтыз улонзэ сётэмез сярысь. Токма луэ…

Зинаида Рябинина.

(1 куара, шорлыдо: 5,00 out of 5)

 Loading ...