Куд-ог тодмоосы али ке но уг оско, удмурт егитъёслы сӥзем «Узы-боры» киноысь валтӥсь героинялэсь Виктория Ядыгаровалэсь бигер туганзэ удмурт пияш шудӥз шуыса. Сьӧдкысъем тусбуё луэменыз угось сое амалтэк бигер выжыысь малпалод. Озьы-а, тазьы-а но,  Алмазлэсь рользэ шудӥсь Максим Князев – чылк-чылк удмурт пияш.  Бигер ӵыжы-выжыосыз сярысь юанэлы серектэ гинэ: ӧвӧл, пе, мынам тюрк виры…  

- Мон вордӥськи Балезино ёросысь Исак гуртын. Пичи дыръям артист луэме чик но уг поты вал, ас быгатонлыкъёсме шӧдытэк ӧй улы ке но. Та сюрес вылэ монэ вуттӥзы школаысь дышетӥсьёсы: Людмила Александровна Перевощикова, Татьяна Витальевна Захарова, Галина Васильевна Поторочина. Сценкаосын шудӥсь яке кылбур лыдӟись кулэ ке, соос котьку но мыным вазиськылӥзы. Зэмзэ вераса, вань ужрадъёсы вуттӥськыны куддыр мылы ӧз потылы. Тае шӧдыса, лэся, дышетӥсьёсы мылкыдме ӝутыны ӧдъязы – урокъёсазы «витьёс» гинэ пуктылӥзы. Тани озьы…
- Тани озьы тынэсьтыд пӧрмиз отличник?
- Ӧз (серекъя). Ӝоген мон валай, сцена вылын шудыны мыным умой оценкаостэк но туж кельше шуыса. Озьы улонме культура удысэн герӟан сярысь малпаськыны кутски.
Огпол школаысьтымы пиналъёс сценка возьматыны вуылӥзы Иже – «Ӟечбур!» газетлэн праздниказ. Отысен пумитай республикаысьтымы искусство удысысь дано ужасез Геннадий Корепановез. Со мыным шуиз: тыныд одно ик артист луоно! Озьы аслам быгатонлыкъёсылы осконэ арысь аре будӥз но будӥз. Соин ик школаез йылпумъяме бере йыгаськи республикаысьтымы культурая колледже. Отын дышетски куинь ар, волятӥ быгатонлыкъёсме, басьтӥ диплом. Отысь ик шедьтӥ трос эшъёс, соосын кусыпмес али ке но ум ыштӥське.  Удмуртие вуылӥсько ке, соосын одно пумиськисько. Нош пӧлысьтызы кык эшъёсыным – Надя Наговицынаен но Максим Григорьевен – Москваын но ӵош дышетскиськом.
- Кытысь ивор тодӥд, Удмурт  театр егитъёсты Москвае дышетскыны келя шуыса?
- Мыным удалтӥз: улонам нош ик кылдӥз Геннадий Корепанов. Солэсь ик мон тодӥ конкурс сярысь. Ӵошатскон бадӟым ке но вал, ӧй шуысал, со пыр потыны туж секыт йӧтӥз шуыса. Юрттӥзы культурая училищеын люкам тодон-валанъёсы. Но шудооc пӧлысь нимтулме адӟыса, синъёсылы ӧй оскы. Гуртэ жингыртӥ но озьы ик шуи: мон конкурсэз ортчи но, Москва музъем вылэ лёгиськытозь, талы уг оскы.
- Тонэ М. Щепкин нимо театральной училищеысь удмурт группалы старостае бырйизы. Нимтулэдъя яке кылемъёсызлэсь арлыдогес луэмедъя, кызьы малпаськод?
- Озьы ик вань! Москвае кошкон азьын – ог-огмес ӟеч ум тодӥське на вал бере – старостаез бырйиз Удмурт театрлэн кивалтӥсез Андрей Ураськин. Умой-умой тодматскемды бере асьтэос, пе, малпалоды ини, кудды азьветлӥсь луоды. Андрей Иванович мыным вазиськиз: тон, Максим, татын самой бадӟымез, тон ик луод староста. Группалэсь ужзэ радъян мыным капчиен сётӥське. Секытгес йӧтэ Удмуртилэсь палэнын улон. Ми татын ваньмы ӵош ке но, уггес тырмы дорлэн шунытэз. Но эшъёсыным ӵошатыса, мыным та ласянь удалтӥз – юрттӥз Москваын ужась Наташа апае. Со монэ сюдэ но, сюлмысь вераське но – дорын кадь. Тау солы.
- Дышетскем сяна, кызьы дырзэс ортчыто  вуоно артистъёс?
- Туж уг яратӥськы одӥг интыын сылонэз,  соин ик ӧжытак ке но ваньмон дыр шеде ке, тыршисько вуылымтэ интыосы ширтыны. Тужгес но умой шутэтскон – уждэ воштон. Москвалэн культураез туж узыр бере, кельше историен герӟаськем интыостӥ поръяны. Ӵем вуылӥськомы музейёсы, театръёсы. Сокем тодмо но дано интыын дышетскиськод бере (Щепкин нимо вылӥ театральной училище Россиысь нырысетӥез артистъёсты дасян борды кутскиз), аслад культураед но вылӥын луыны кулэ.

Алёна Кабанова

(Куараос ӧвӧл на)

 Loading ...