Пудо уллё синэ

Удмурт Дунне
By Удмурт Дунне Март 29, 2011 08:52

Вавож ёросын пудо сиёнэн тужгес но секыт югдуре сюремын «Луч» СХПК. Озьы ке но гуртоос пудо уллёзэс утьыны тыршо.

Агропромышленность удысъя, музъем кусыпъёсъя но инкуазез утёнъя ялан ужась комиссилэн кенешаз эскеризы 2009-тӥ-2012-тӥ аръёсы ӟеч выжыё скал уллёез но йӧл поттонэз йылэтонъя программалэсь быдэсъяськемзэ. Та сярысь ивортӥз гурт удысъя но сиён-юонъя министрлэн воштӥсез Олег Пушкарёв.

Кылем арын шаерамы гидъёсты лэсьтон-тупатъян пуж-пуж мынӥз. ӝутэмын 10 выль гид, 128 пудо комплекслэн но фермалэн тӥрлыкез воштэмын. 40 гидын усьтэмын нимысьтыз скал кыскон инты, 383 фермаын тупатэмын йӧл гумыос. Хозяйствоосын пудо сиёнэз небӟыто 254 выль миксеръёс. Унояз фермаосын пуктэмын йӧл кынтон оборудование. 2010-тӥ арен ӵошатыса, 17 ёросын (кылсярысь, Алнаш, Балезино, Дэбес, Шаркан, Эгра) йӧл поттон будӥз яке 272 гурт хозяйство пӧлысь 192-аз тросгес кыскизы. Шумпоттытэ йӧллэн ӟечлыкез но. Комбинатъёсы 70 процентэз вылӥ но нырысетӥ сортэн келямын. Таӵеез республикаямы ӧй вал на.

Йӧл поттонэз гыроно-кизёно музъемъёслэн быдӟалазыя дунъяно ке, Вавож ёросын котькуд 1 сюрс гектар муысь басьтэмын шорлыдын 666 тонна йӧл, Алнашын — 598, Балезиноын — 574, Пичи Пургаын — 551 тонна. ӵошатон вылысь: пудо вордонъя азьветлӥсь кунын — Голландиын — 1 сюрс гектарысь потто 1 сюрс тонна йӧл.

Но шараяно тырмымтэосты но. Республикая шорлыдын 4 сюрс 581 килограмм йӧл кыскыса, 23 предприятиын та лыдпус 3 сюрсэз ӧз ортчы. Уг пӧрмы таза сюро пудоез, скал уллёез кулэсмонлэсь дугдытыны. Нош Россиысь Правительстволэн Тӧроез Владимир Путин пусйиз: федерал бюджетысь коньдон висъяськоз пудо уллёзэс йылэтэм яке утьыны быгатэм улосъёслы гинэ.

Тужгес но трос пудо синӥз Грак, Яр но Глазов ёросъёсын. Куд-ог интыосын пудо йыр кулэсмонэз герӟало хозяйстволэсь статуссэ воштонэн. Шуом, сое фермер хозяйствое выжтонэн. Но эскеронъёсъя со озьы ӧвӧл. Тани Глаз ёросын скал уллё кулэсмиз 212 йырлы, таин ӵош ик фермеръёслэн со йылӥз 35-лы. Республикамы йӧл поттӥсь улос бере, вань сюро таза пудо пӧлысь скалъёс ӝыныез мында луыны кулэ. Нош асьмелэн соос 36 процентэз гинэ.

ӧжыт йӧл сётӥсь скалъёсты воштон каллен мынэ. Кылем арын ӟеч выжы будэтӥсь хозяйствоос СПК-ослы но эштосъёслы вузазы 2 сюрс 330 ветыл. Азьвыл аръёслэсь со тросгес. Озьы ке но куд-ог хозяйствоос ялан возё на араз 2 сюрс 500 килограмм гинэ йӧл сётӥсь бӧксӥсьёсты.

ӧжыт вордско кунянъёс — 100 скаллэсь 79 йыр. Нормая кулэ 85. Тужгес но ӧжыт вордӥсько Юкаменск ёросын — 57, Сьӧлта палъёсын — 64. Ар ӵоже 20 сюрс йыр сюро таза пудо быре. Та лыдпус Камбарка, Каракулино, Кизнер, Кияса но Красногорск ёросъёслэн огазеям скал уллёзы мында!

Туэ, выль арысен кутскыса, йӧл толэзьлы быдэ синэ. Миымлэсь али ӧжытгес кыске 19 ёрос. ӵошатон вылысь: азьветлӥсь Эгра ёросын уй-нунал ӵоже 530 центнер кыско. Озьы республика куинетӥ толэзьзэ ини та удысъя берлань чигна. Ужез дыгомыто ляб хозяйствоос. Красногорск ёросысь «Фотон» эштосын уй-нунал ӵоже котькуд скаллэсь люкаське 1,8 килограмм, Грак ёросысь «Рассвет» но Кизнер ёросысь «АрсАн-АГРО» хозяйствоосын быдэн 1,9 килограмм. Талэн мугез валамон — нуналысь нуналэ лэчытоме пудо сиёнэн югдур.  Палэнысь турынэн скалъёссэс сюдо Алнаш, Грак, Вавож, Вотка, Дэри ёросъёсысь хозяйствоос. Талы республикалэн бюджетысьтыз висъямын 1 миллиард манет. Со сяна, 150 миллион манет чакламын палэнысь сиён ворттэм понна ыштонъёсты берыктонлы. Угось  пудо сиёнлы дун тулыс эшшо ӝутскиз на.

2010-тӥ арын республикаысьтымы 20 хозяйство, банкротэ шедьыса, мукет СПК-ослэн бурд улазы кутэмын, статуссэс воштэмын. Туэ 18 хозяйствоын секыт югдур. Озьы ке но министерствоын осконзэс уг ышто. Хозяйствоос ӝоген басьтозы нырысетӥ кварталэ вузам йӧлзы понна коньдонэз.

Иван Аркашев.

 
[ratings]

Удмурт Дунне
By Удмурт Дунне Март 29, 2011 08:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*